ទំនាក់ទំនងសាំញ៉ាំរវាងអាមេរិក និងចិន
លោក ហ៊ូជិនតាវ (Hu Jintao) ប្រធានាធិបតីចិន បានចាកចេញពីទីក្រុងប៉េកាំងហើយ កាលពីប៉ុន្មានម៉ោងនេះ ដើម្បីអញ្ជើញទៅបំពេញទស្សនកិច្ចផ្លូវរដ្ឋនៅសហរដ្ឋអាមេរិក រយៈពេលបួនថ្ងៃ។ នៅថ្ងៃស្អែក លោក ហ៊ូ ជិនតាវ នឹងត្រូវជួបពិភាក្សាជាមួយលោកប្រធានាធិបតីអាមេរិក បារ៉ាក់ អូបាម៉ា នៅសេតវិមាន ស្តីអំពីប្រធានបទដ៏រសើបមួយចំនួន មានជាអាទិ៍បញ្ហាប្រាក់យ័ន យោធា សិទ្ធិមនុស្ស និងនុយក្លេអ៊ែរកូរ៉េខាងជើង។ល។ និង។ល។ ដែលបានធ្វើឲ្យទំនាក់ទំនងចិន-អាមេរិក គ្រោតគ្រាតអស់ពេញមួយឆ្នាំ ២០១០។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ អៀង សុខម៉ិញ
ទស្សនកិច្ចរបស់លោក ហ៊ូ ជិនតាវ នៅសហរដ្ឋអាមេរិកជាទស្សនកិច្ចដែលគ្រប់គ្នាទន្ទឹងរង់ចាំបំផុត និងប្រុងប្រៀបរៀបចំយ៉ាងហ្មត់ចត់ក្រៃលែង ដើម្បីសាកល្បងរឹតចំណងទំនាក់ទំនងទ្វេភាគី ចិន-អាមេរិក ដែលជួបនឹងភាពអាប់អួក្នុងឆ្នាំ២០១០ ឲ្យប្រសើរឡើងវិញ។
ភាពចម្រូងចម្រាស និងគំនិតខ្វែងគ្នា លើបញ្ហារសើបៗមួយចំនួន ដែលមានជាអាទិ៍ បញ្ហាប្រាក់យ័នដែលចិនចង់ប្រែក្លាយឲ្យទៅជាប្រាក់អន្តរជាតិដូចដុល្លារ បញ្ហាកូរ៉េខាងជើង និងនុយក្លេអ៊ែរ ត្រូវបានបង្ហើបឲ្យដឹងមុននឹងលោក ហ៊ូ ជិនតាវ អញ្ជើញទៅដល់ក្រុងវ៉ាស៊ីនតោន។
បើតាមអ្នកវិភាគ ទស្សនកិច្ចនេះ ទំនងជាមានទម្រង់ដូចជាដំណើរទស្សនកិច្ចរបស់លោកអូបាម៉ានៅចិន កាលពីឆ្នាំ ២០០៩ គឺមានន័យថា មានតែសេចក្តីថ្លែងការណ៍ល្អៗជាលក្ខណៈទូទៅ មានការប្រកាសកិច្ចព្រមព្រៀងពាណិជ្ជកម្មទ្វេភាគី ប៉ុន្តែទំនងជានឹងគ្មានការរីកចម្រើនទៅមុខលើចំណុចធំខ្វែងគ្នាទេ។
ចំណុចខ្វែងគ្នាមិនអាចដោះស្រាយបាន ព្រោះបើតាមសហរដ្ឋអាមេរិក គឺបណ្តាលមកពី ភាគីចិន គ្មានចេតនាពិតប្រាកដ និងបង្ហាញកាយវិការធ្វើប្រតិបត្តិការរួមគ្នាតិចតួចពេក ទោះមានការរិះគន់ជាបន្តបន្ទាប់ក៏ដោយ។
ក្នុងខណៈនេះ លោក ហ៊ូ ជិនតាវ មិនអាចធ្វើសម្បទានអ្វីបានឡើយ ដ្បិតនេះជានយោបាយរបស់ប្រទេស និងម្យ៉ាងទៀត ពេលនេះជាអន្តរកាល។ លោកហ៊ូ ជិនតាវ នឹងបញ្ចប់អាណត្តិរបស់លោក នៅក្នុងឆ្នាំ២០១២ ដូច្នេះសំណុំរឿងធំៗ និងរសើបៗនឹងត្រូវទុកឲ្យប្រធានាធិបតីក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ