បក្សប្រជាជនទទួលបាន៤៦អាសនៈ បក្សសម រង្ស៊ីទទួលបាន១១អាសនៈ
គណៈកម្មាធិការជាតិរៀបចំ ការ បោះឆ្នោត នៅមិនទាន់ប្រកាសលទ្ធផលជាផ្លូវការនៅឡើយមែន ប៉ុន្តែលទ្ធផលបឋមបង្ហាញថា គណបក្សប្រជាជនកម្ពុជាទទួលបាន៤៦អាសនៈ ហើយគណបក្សសមរង្ស៊ីទទួលបាន ១១អាសនៈនៅក្នុងការបោះឆ្នោតជ្រើសតាំងសមាជិកព្រឹទ្ធសភានេះ។ រហូតដល់ពេលនេះគឺមានបណ្តឹងតែមួយទេ ពីគណបក្សសម រង្ស៊ី។ ការប្រកាសលទ្ធផលផ្លូវការនឹងអាចធ្វើនៅដើមសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០១:៣១
នៅតែរង់ចាំនីតិវិធីនៃការប្រកាសលទ្ធផលជាផ្លូវការទេ ដែលអគ្គលេខាធិការនៃគណៈកម្មាធិការជាតិរៀបចំការបោះឆ្នោតលោក ទេព នីថាថ្លែងថា វានឹងអាចធ្វើនៅថ្ងៃទី៦កុម្ភៈដើមសប្តាហ៍ក្រោយ។ ប៉ុន្តែលទ្ធផលដែលគេបានដឹងបានខ្លះពីមុនការបោះឆ្នោត ហើយដែលវាបានត្រូវគ្នានឹងលទ្ធផលបណ្តោះអាសន្នបច្ចុប្បន្ននោះ គឺ គណបក្សប្រជាជនកម្ពុជានឹងទទួលបានអាសនៈ៤៦ រីឯគណបក្សសម រង្ស៊ីនឹងទទួលបាន១១អាសនៈនៅក្នុងស្ថាប័នសភាជាន់ខ្ពស់នីតិកាលទី៣នេះ។
លោកអ៊ក គឹមហានតំណាងគណបក្សប្រជាជនកម្ពុជាទទួលបន្ទុកការបោះឆ្នោត បានថ្លែងប្រាប់វិទ្យុបារាំងអន្តរជាតិថា គណបក្សប្រជាជនកម្ពុជារបស់លោកនឹងទទួលបានអាសនៈ៤៦ដែលចំនួននេះលើសពីចំនួនអាសនៈនីតិកាលទី២ដែលមាន៤៥អាសនៈ។
លោកអ៊ក គឹមហានអត្ថាធិប្បាយថាលោកពេញចិត្តនឹងលទ្ធផលនៃការបោះឆ្នោត ហើយថាគណបក្សប្រជាជនកម្ពុជាបានទទួលសម្លេងគាំទ្រពីគណបក្សនានាចំនួន៧៩៧សំឡេងទៀតផង។
លោកគួយ ប៊ុនរឿន តំណាងគណបក្សសម រង្ស៊ីវិញថ្លែងថា ថ្វីដ្បិតតែគណបក្សសម រង្ស៊ីបាត់សម្លេង១៥៧សំឡេងមែន ប៉ុន្តែគណបក្សលោកទទួលបានអាសនៈកើនឡើងពីចំនួន២នៅក្នុងនីតិកាលទី២រហូតដល់១១អាសនៈនៅក្នុងនីតិកាលទី៣នេះ។
ប៉ុន្តែថា សម្រាប់គណបក្សសម រង្ស៊ីវិញក្រោយពីការបោះឆ្នោតចប់សព្វគ្រប់ គណបក្សនេះអាចនឹងមានវិធានការដើម្បីដោះស្រាយបញ្ហាបាត់បង់ការគាំទ្រចំពោះគណបក្សពីសំណាក់សមាជិកក្រុមប្រឹក្សាឃុំសង្កាត់នៅក្នុងតំណែងក្នុងក្របខ័ណ្ឌគណបក្សសម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ