កម្ពុជា -

អត្ថបទចុះផ្សាយនៅថ្ងៃ ពុធ 03 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 03 តុលា 2012

លោក គង់ គាំ នឹងក្លាយជាប្រធានគណបក្ស សម រង្ស៊ី

វីដេអូខុនហ្វេរិនគណបក្សសង្គ្រោះជាតិ

ដោយ លាង ដឺលុច

លោកសម រង្ស៊ីបានសម្រេចលាលែងពីគណបក្សសមរង្ស៊ីហើយ ដើម្បីទៅដឹកនាំគណបក្សសង្គ្រោះជាតិដែលក្រសួងមហាផ្ទៃបានសម្រេចយល់ព្រមហើយ។ នៅឯគណបក្សសមរង្ស៊ីឯណោះវិញ លោក គង់ គាំ នឹងឈឈ្មោះជាបេក្ខភាពប្រធានគណបក្សសមរង្ស៊ី និងលោកស្រីជូឡុង សូមួរ៉ា ជាបេក្ខភាពអនុប្រធានគណបក្ស។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:44)

03/10/2012

លោកសម រង្ស៊ីបានផ្ញើលិខិតមួយមកលោកគង់ គាំកាលពីថ្ងៃទី២តុលាម្សិលមិញ ដោយបញ្ជាក់ថា លោកសុំលាលែងពីគណបក្សសម រង្ស៊ី។ ការសម្រេចចិត្តនេះធ្វើឡើងចំថ្ងៃតែមួយ ដែលក្រសួងមហាផ្ទៃបានជូនដំណឹងជាផ្លូវការមកគណបក្សសង្គ្រោះជាតិ ដែលលោកសម រង្ស៊ីធ្វើជាប្រធាននោះ ថាគណបក្សនេះត្រូវបានទទួលស្គាល់ដោយក្រសួងមហាផ្ទៃហើយ។

លោកគង់ គាំ បច្ចុប្បន្នប្រធានស្តីទីគណបក្សសម រង្ស៊ីបានថ្លែងប្រាប់វិទ្យុបារាំងអន្តរជាតិនៅថ្ងៃពុធនេះថា គណៈកម្មាធិការអចិន្ត្រៃយ៍ និងគណៈកម្មការនាយករបស់គណបក្សសម រង្ស៊ីបានជួបប្រជុំគ្នារួចហើយដែរក្នុងរយៈពេល២ថ្ងៃកន្លងមកនេះជ្រើសរើសបេក្ខភាពប្រធានគណបក្សបន្តពីលោកសម រង្ស៊ីនោះ។ លោកគង់ គាំបានបញ្ជាក់ថា ថ្នាក់ដឹកនាំគណបក្សសម រង្ស៊ីបានសម្រេចអោយលោកឈឈ្មោះតែម្នាក់ឯងធ្វើជាបេក្ខជនប្រធានគណបក្ស និងលោកស្រី ជូឡុង សូមួរ៉ាធ្វើជាបេក្ខជនអនុប្រធានគណបក្សសម រង្ស៊ី។ ហើយថាការបោះឆ្នោតជ្រើសតាំងប្រធាន និងអនុប្រធានគណបក្សនេះ នឹងត្រូវរៀបចំនៅក្នុងសមាជវិសាមញ្ញមួយដែលត្រូវបានគ្រោងធ្វើនៅថ្ងៃទី២ខែវិច្ឆិកាខាងមុខនេះ។

បើទោះជាលោកសម រង្ស៊ីអស់សមាជិកភាពពីគណបក្សដែលប្រើឈ្មោះរបស់លោក ហើយដែលលោកគឺជាស្ថាបនិកមួយរូបនោះ គណបក្សសម រង្ស៊ីនៅមិនទាន់សម្រេចថា តើគណបក្សដែលមានឈ្មោះសម រង្ស៊ីនេះនឹងត្រូវផ្លាស់ប្តូរដែរ ឬយ៉ាងណានោះទេ។ អនាគតប្រធានគណបក្សសម រង្ស៊ីគឺលោកគង់ គាំបានពន្យល់ថា ចំនុចនេះវាអាស្រ័យលើសេចក្តីសម្រេចរបស់សមាជថ្នាក់ជាតិរបស់គណបក្ស។ ប៉ុន្តែ បើជាគំនិតផ្ទាល់ខ្លួនរបស់លោកនោះ លោកចង់ទាមទារអោយគណបក្សនេះ នៅតែមានឈ្មោះសម រង្ស៊ីដដែល។

ចំពោះគណបក្សសង្គ្រោះជាតិវិញ លោក សម រង្ស៊ី នឹងជួបជាមួយលោក កឹម សុខា នៅប្រទេសអូស្ត្រាលី ដើម្បីពិភាក្សាអំពីរចនាសម្ព័ន្ធនៃគណបក្សថ្មីនេះ នៅថ្នាក់ជាតិ ថ្នាក់ខេត្ត និងថ្នាក់មូលដ្ឋានបន្តទៀត៕