តំណាងពិសេសរបស់អគ្គលេខាធិការអង្គការសហប្រជាជាតិមកដល់កម្ពុជា
តំណាងពិសេសរបស់អគ្គលេខាធិការអង្គការសហប្រជាជាតិទទួលបន្ទុកការកាត់បន្ថយហានិភ័យគ្រោះមហន្ដរាយមកបំពេញទស្សនកិច្ចនៅក្នុងប្រទេសកម្ពុជារយៈពេល៥ថ្ងៃដើម្បីពិនិត្យមើលការខូចខាតបណ្តាលមកពីគ្រោះមហន្តរាយធម្មជាតិកាលពីឆ្នាំមុន។ កាលពីឆ្នាំទៅមនុស្សច្រើនជាង ២៤៧ នាក់បានបាត់បង់ជីវិត និងប្រជាជន ១លាន៦សែននាក់ផ្សេងទៀតបានរងការប៉ះពាល់ដោយសារទឹកជំនន់ក្នុងនោះប្រជាពលរដ្ឋ៧សែននាក់គឺជាកុមារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
លោកស្រី ម៉ាហ្ការ៉ែតា វ៉លស្ដ្រុម តំណាងពិសេសរបស់អគ្គលេខាធិការអង្គការសហប្រជាជាតិទទួលបន្ទុកការកាត់បន្ថយហានិភ័យគ្រោះមហន្ដរាយដែលទើបមកដល់ប្រទេសកម្ពុជាកាលពីថ្ងៃសុក្រម្សិលមិញបានចាប់ផ្តើមបេសកកម្មរបស់គាត់ហើយនៅថ្ងៃសៅរ៍នេះនៅក្នុងខេត្តព្រៃវែង។
ការចាប់ផ្តើមទស្សនកិច្ចនៅក្នុងខេត្តព្រៃវែងមិនមែនជារឿងចៃដន្យទេ តាមពិត លោកស្រីចាប់ផ្តើមនៅក្នុងខេត្តនេះពីព្រោះខេត្តព្រៃវែងជាខេត្តដែលមានប្រជាពលរដ្ឋច្រើនជាងគេរងផលប៉ះពាល់ដោយសារទឹកជំនន់កាលពីឆ្នាំ២០១១កន្លងមក។ កាលពីឆ្នាំមនុស្ស៥២នាក់បានស្លាប់នៅក្នុងខេត្តព្រៃវែង ប្រជាជនជាង៤ម៉ឺនគ្រួសារបានរងផលប៉ះពាល់ដោយសារទឹកជំនន់ និងដំណាំស្រូវប្រមាណជា៥ម៉ឺនហិកតារត្រូវបានបំផ្លាញ។ នៅក្នុងដំណើរទស្សនកិច្ចនេះ លោកស្រីគ្រោងនឹងជួបលោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងលោក ម៉ុក ម៉ារ៉េត រដ្ឋមន្ត្រីក្រសួងបរិស្ថាន។
ដំណើរទស្សនកិច្ចរបស់លោកស្រី ម៉ាហ្ការ៉ែតា វ៉លស្ដ្រុម នៅកម្ពុជានៅពេលនេះ គឺដើម្បីពិភាក្សាអំពីការកាត់បន្ថយហានិភ័យនៃគម្រោងមហន្ដរាយទៅក្នុងកម្មវិធីអភិវឌ្ឍន៍ដើម្បីបន្ស៊ាំទៅនឹងផលប៉ះពាល់នៃការប្រែប្រួលអាកាសធាតុ និងការពារសហគមន៍កម្ពុជាទល់នឹងគ្រោះមហន្ដរាយដែលទាក់ទងនឹងធាតុអាកាសអោយមានប្រសិទ្ធិភាពជាងមុន។ នេះបើយោងតាមសេចក្តីជូនដំណឹងរបស់អង្គការសហប្រជាជាតិ។
សូមបញ្ជាក់ថា ទស្សនកិច្ចរបស់លោកស្រីនៅក្នុងប្រទេសកម្ពុជានៅពេលនេះបានធ្វើឡើងស្របពេលដែលមានសេចក្តីរាយការណ៍ពីខ្យល់ព្យុះមួយចំនួនបានបំផ្លាញជីវិតមនុស្ស និងបំផ្លាញទ្រព្យសម្បត្តិរបស់ប្រជាពលរដ្ឋមួយចំនួននៅតាមបណ្តាខេត្តនៃប្រទេសកម្ពុជាកាលពីប៉ុន្មានថ្ងៃចុងក្រោយនេះ។
សេចក្តីជូនដំណឹងរបស់អង្គការសហប្រជាជាតិបានបញ្ជាក់ទៀតថា ទឹកជំនន់គឺជាបាតុភូតដែលកើតឡើងជាញឹកញាប់ និងបង្កការខូចខាតដល់កម្ពុជា ហើយបើយោងតាមការព្យាករណ៍របស់អ្នកជំនាញ បាតុភូតនេះអាចកាន់តែអាក្រក់ឡើងនាពេលអនាគត។ ទឹកជំនន់និងខ្យល់ព្យុះមានលក្ខណៈកាន់តែធ្ងន់ធ្ងរ និងញឹកញាប់ជាងមុន ដោយសារតែផលប៉ះពាល់នៃការប្រែប្រួលអាកាសធាតុ។
កាលពីឆ្នាំទៅ មនុស្សច្រើនជាង ២៤៧ នាក់បានបាត់បង់ជីវិត និងប្រជាជន ១លាន៦សែនលាននាក់ផ្សេងទៀតបានរងការប៉ះពាល់ដោយសារទឹកជំនន់ ក្នុងនោះ មាន៧សែននាក់គឺជាកុមារ។
ប្រធានផ្នែកកាត់បន្ថយហានិភ័យនៃគ្រោះមហន្ដរាយនៃអង្គការសហប្រជាជាតិ លោកស្រី ម៉ាហ្ការ៉ែតា វ៉លស្ដ្រុម ចាប់ផ្ដើមបេសកកម្មរបស់លោកស្រីនៅថ្ងៃសៅរ៍ទី២១ខែមេសានេះហើយនឹងបញ្ចប់ទៅវិញនៅថ្ងៃទី២៥ខែមេសាសប្តាហ៍ក្រោយនេះដោយមានធ្វើសន្និសីទកាសែតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ