រុស្ស៊ី-អាមេរិក -

អត្ថបទចុះផ្សាយនៅថ្ងៃ សុក្រ 29 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 29 មិថុនា 2012

ជំនួបរវាងប្រមុខការទូតអាមេរិក និង រុស្ស៊ី នៅក្រុង Saint-Petersbourg

ទង់ជាតិរុស្ស៊ី និងអាមេរិក

ដោយ កែវ ឆាយា

លោកស្រីរដ្ឋមន្ត្រីការបរទេសអាមេរិក Hillary Clinton ថ្ងៃនេះជួបចរចាជាមួយសមភាគីរុស្ស៊ី លោករដ្ឋមន្ត្រីការបរទេស Serguei Lavrov ដោយផ្តោតទៅលើស្ថានការណ៍វិបត្តិនៅប្រទេសស៊ីរី។ ជំនួបនេះ ប្រព្រឹត្តទៅនៅក្រុងរុស្ស៊ី Saint-Petersbourg ជាទីដែលលោកស្រីបានអញ្ជើញមកដល់យប់មិញ ដើម្បីចូលរួម ក្នុងវេទិកា “តួនាទីស្ត្រី និង សេដ្ឋកិច្ច”។

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

ស្តាប់ (02:30)

29/06/2012

ជំនួបនេះ ធ្វើឡើង ក្នុងផ្ទៃនៃសំណើលោក Kofi Annan ជាបេសកជនពិសេសរបស់អ.ស.ប.ខាងរកច្រកចេញដោយសន្តិវិធី ឲ្យស្ថានការណ៍វិបត្តិរ៉ាំរ៉ៃនៅស៊ីរី ទើបស្នើឲ្យបង្កើតឡើងនៅស៊ីរីជា រដ្ឋាភិបាលអន្តរកាល។

ម្សិលមិញ ក្នុងសន្និសីទសារព័ត៌មាន នៅម៉ូស្គូ ក្រោយពីជួបចរចាជាមួយសមភាគីទុយនីស៊ីមក តបនឹងសំនួរអ្នកកាសែត “តើរដ្ឋាភិបាលអន្តរកាលនោះ ដែលនឹងផ្សំឡើងពីពួកអ្នកតំណាង អាជ្ញាធរស៊ីរីសព្វថ្ងៃ និង ពីពួកអ្នកតំណាងខាងភាគីប្រឆាំងនៅស៊ីរីផង មានន័យឬទេថា នឹងពុំមានរូបប្រធានាធិបតី អាសាដ វត្តមានឡើយ? លោករដ្ឋមន្ត្រីការបរទេសរុស្ស៊ី Serguei Lavrov ឆ្លើយបំភ្លឺថា ៖ ទី១- ក្នុងដំណាក់កាលឥឡូវ រុស្ស៊ីនៅមិនទាន់ថ្លែងគាំទ្រដល់ផែនការថ្មីណាមួយឡើយ ខាងធ្វើដំណោះស្រាយឲ្យស្ថានការណ៍នៅស៊ីរី។ ទី២-រឿងចាកចេញពីតំណែងនៃប្រធានាធិបតីប្រទេសនេះ មិនដែលត្រូវភាគីរុស្ស៊ីលើកយកទៅពិភាក្សាឡើយ។ មិនតែប៉ុណ្ណោះ មកទល់ឥឡូវ នៅមិនទាន់លេចចេញមក ជាឯកសារអ្វីណាជាផ្លូវការប្រភេទនេះឡើយ។

អ្នកកាសែតអារ៉ាប ដែលបានចោទសំនួរខាងលើ គឺមកពីទីភ្នាក់ងារព័តមានអន្តរជាតិនានា ដោយយោងទៅលើប្រភពការទូត នាំគ្នាផ្សាយថា រុស្ស៊ីបានថ្លែងគាំទ្រទៅហើយដល់សំណើលោក Kofi Annan សំណើដែលត្រូវអនុម័តជាផ្លូវការ ក្នុងសន្និសីទអន្តរជាតិស្តីអំពីប្រទេសស៊ីរី នៅក្រុងហ្សឺណែវ ថ្ងៃស្អែកទី៣០មិថុនា។

រីឯគោលជំហរប្រកាន់យក ដោយទីក្រុងវ៉ាស៊ីនតោន ដូចដែលលោកស្រីប្រមុខការទូតអាមេរិក Hillary Clinton រមែងថ្លែងហើយថ្លែងទៀត គឺថាប្រធានាធិបតី អាសាដ ត្រូវតែចុះចេញពីតំណែង ដ្បិតរូបគាត់ជាឧបសគ្គរាំងរាដល់ដំណោះស្រាយនៅស៊ីរី និងជាប្រធានាធិបតីលែងស្របច្បាប់ទៅហើយ មកពីគាត់បានប្រព្រឹត្តឧក្រិដ្ឋកម្ម សម្លាប់រង្គាលជីវិតប្រជាជនស៊ីរីផ្ទាល់។

ចំពោះរឿងនេះ គោលជំហររបស់រុស្ស៊ី គឺផ្ទុយស្រឡះ ៖ បញ្ហាតើនរណា ដែលត្រូវកាន់អំណាចនៅស៊ីរី វាជាកិច្ចការផ្ទៃក្នុងដែលត្រូវអារកាត់ដោយប្រជាជនស៊ីរីផ្ទាល់។ រុស្ស៊ី ប្រឆាំងនឹងអំពើជ្រៀតជ្រែកពីក្រៅ ទៅក្នុងស្ថានការណ៍នៅស៊ីរី ដ្បិតអំពើជ្រៀតជ្រែកនេះ មុខជានឹងហែហមទៅដោយផលវិបាកកាន់តែវិនាស ជាងនៅប្រទេសលីប៊ីទៅទៀត។

តើលទ្ធផលនៃកិច្ចចរចាថ្ងៃនេះ នឹងចប់ទៅដោយលទ្ធផលយ៉ាងណាៗ នោះប្រមុខការទូតរុស្ស៊ី និង អាមេរិក នឹងប្រកាសឲ្យដឹងក្នុងសន្និសីទកាសែតតែម្តង៕