នៅ​ដើមអត្ថបទ លោកពូទីនរំលឹកថា នាប៉ុន្មានឆ្នាំចុងក្រោយ តាមគំនិតផ្តួចផ្តើម របស់ លោក​ប្រធានាធិបតីមេដវេដេវ ថ្នាក់ដឹកនាំប្រទេសខិតខំធ្វើកំណែទម្រង់មួយចំនួន សំដៅ​កែឲ្យ​ប្រសើរ​​​ឡើង បរិយាកាស Business នៅរុស្ស៊ី។ ប៉ុន្តែ គ្មានការចម្រើនទៅមុខជាដុំកំភួនឡើយ។
រុស្ស៊ី ចាញ់គេខាង យុត្តាធិការប្រជែង ពីព្រោះ Business ដែលរកស៊ីនៅរុស្ស៊ី ជាញឹក​ញយ​និយម​​ ចុះ​បញ្ជី​និង​ចុះ​កិច្ចសន្យា​ គឺ​នៅ​បរទេស​ទេតើ។
​
តាមសំដីប្រមុខរដ្ឋាភិបាលរុស្ស៊ី មូលហេតុ គឺមិនមែនមកពីរបបពន្ធនៅរុស្ស៊ីទេ ដ្បិតជាទូទៅ របបពន្ធនេះ គឺអាចប្រជែងនឹងរបបពន្ធនៅក្រៅ ហើយក៏មិនមែនមកពីគ្មានទេ ច្បាប់ ដែលថា ឆ្លើយស្របនឹងការទាមទារនៃសម័យបច្ចុប្បន្ន។ ច្បាប់នេះ រុស្ស៊ីមានយ៉ាងជាក់លាក់ ប៉ុន្តែ​គ្រាន់​តែ ​តម្រូវឲ្យកែវាបានសុក្រឹតឡើង។ បញ្ហាចម្បង​ គឺមកពី ខ្វះតម្លាភាព ខ្វះការ​ត្រួត​ពិនិត្យ​ពី​ខាង​សង្គម លើការងារនៃពួកអ្នកតំណាងរដ្ឋអំណាច តាំងពីស្ថាប័នគយនិងពន្ធ​ រហូតដល់ ប្រព័ន្ធតុលាការ និង អង្គការមហាផ្ទៃ។ បើនិយាយឲ្យចំឈ្មោះទៅ សាច់រឿង គឺមកពី អំពើ​ពុក​រលួយ​ដែល​ប្រទាក់ក្រឡាគ្នា។
 
លោកពូទីនបំភ្លឺថា បើនរណាហ៊ានបង់ថ្លៃច្រើន អ្នកនោះឯងខិតទៅជិតនឹង មនុស្សដែលស្ថិត ក្នុង​យន្តការរដ្ឋផ្ទាល់។ ដូច្នេះ គឺមិនចាំបាច់គោរពច្បាប់ទេ ដោយមានអាណាព្យាបាល នៅពី ក្រោយខ្នង រួចមកបានដៃនឹងពន្លិចគូប្រជែង។ ម៉្លោះហើយ បានជាភារកិច្ចជាគ្រឹះគន្លឹះរបស់រដ្ឋ គឺ​សម្អាតផ្លូវ​សម្រាប់ឯកជន ធ្វើ Business ដោយសុចរិត។
 
អត្ថបទលោកពូទីន ប្រមើលថាក្នុង៤ឆ្នាំចំពោះមុខ គឺទៅទល់ឆ្នាំ២០១៦ បន្ថយ​ឲ្យ​បាន​មែន​ទែន​ ហ៊ុនរបស់រដ្ឋក្នុងក្រុមហ៊ុនធំៗ ដែលមិនមែនជាក្រុមហ៊ុនវត្ថុធាតុដើម និងឧស្សាហកម្ម​យោធា។
 
រដ្ឋនឹងផ្តោតការយកចិត្តទុកដាក់ទៅលើ សាជីវកម្មមានសមត្ថភាពប្រជែងក្នុងលោក ដែលក្នុង សកម្មភាពខ្លួន តាំងពីធ្វើការស្រាវជ្រាវ រហូតដល់ផ្តល់បានជា ផលិតផល​នៃបច្ចេក​វិជ្ជា​ឈាន​មុខ ​ដើម្បីដណ្តើមឲ្យបាន ទីផ្សារពិភពលោក បែបយ៉ាងខាងផលិតយន្តហោះ នាវាសមុទ្រ បច្ចេក​វិជ្ជាNano គឺវត្ថុធាតុក្នុងរង្វាស់តែ១ភាគនៃ១ពាន់លាន ថ្នាំពេទ្យ បរិក្ខារពេទ្យ ហើយ ប្រាកដ​ណាស់ ​វិស័យថាមពលបរមាណូ និងអវកាស ដែលរុស្ស៊ីតែងនាំមុខជានិច្ច។
 
ជាការរម្លឹក បើអត្ថបទទី៣របស់បេក្ខជនពូទីន គឺនិយាយអំពីសេដ្ឋកិច្ច នោះអត្ថបទ​ទី១​របស់​គាត់​ គឺប៉ះលើ “ការប្រមូលផ្តុំកម្លាំងរបស់រុស្ស៊ី ទល់នឹងការគំរាមពីក្រៅ” ហើយអត្ថបទទី២ គឺ ”អំពី នយោបាយជនជាតិនៅរុស្ស៊ី” ចំណែកអត្ថបទទី៤នៅថ្ងៃមុខ នឹងឧទ្ទិសដល់ “នយោបាយ​រដ្ឋ​រុស្ស៊ី សម្រាប់បម្រើសង្គម”៕