«កម្មសិទ្ធិបញ្ញា» ប្រធានបទសំខាន់នៃជំនួបពាណិជ្ជកម្មរវាងអាមេរិក ចិន
នៅថ្ងៃចន្ទ ទី១០ ធ្នូ ក្រសួងពាណិជ្ជកម្មអាមេរិកំាងបានប្រកាសឲ្យដឹងថា កម្មសិទ្ធិបញ្ញា និងការបញ្ជូនបច្ចេកវិទ្យា គឺជាប្រធានបទសំខាន់នៃជំនួបថ្នាក់រដ្ឋមន្រ្តី ស្តីអំពីពាណិជ្ជកម្មរវាងសហរដ្ឋអាមេរិក និងចិនដែលគ្រោងនឹងរៀបចំធ្វើនៅថ្ងៃទី១៨ និង១៩ ធ្នូខាងមុខក្នុងទីក្រុងវ៉ាស៊ីនតោន។
ចុះផ្សាយនៅថ្ងៃ៖
ស្តាប់ - ០១:២៦
នេះជាលើកចុងក្រោយហើយ ដែលឧបនាយករដ្ឋមន្ត្រីចិនលោក Wang Qishan អញ្ជើញទៅចូលរួមក្នុងជំនួបពាណិជ្ជកម្មប្រចាំឆ្នាំ មុននឹងទៅកាន់តំណែងថ្មី ក្នុងផ្នែកប្រយុទ្ធប្រឆាំងនឹងអំពើពុករលួយ។ មានជំនាញផ្នែកសេដ្ឋកិច្ច ជាទីគោរពរបស់វ៉ាស៊ីនតោន លោក Wang ក៏ទំនងជានឹងជួបពិភាក្សាជាមួយលោក Ron Kirk តំណាងអាមេរិកផ្នែកពាណិជ្ជកម្ម ដែលបានចេញសេចក្តីថ្លែងការណ៍មួយនៅថ្ងៃចន្ទម្សិលមិញ ចាត់ទុកវេទិកាពិភាក្សាពាណិជ្ជកម្មនេះ ថាជាកូនសោនៃទំនាក់ទំនងពាណិជ្ជកម្មរវាងក្រុងប៉េកាំង និងវ៉ាស៊ីនតោន។
បើតាមលោក Kirk ការគោរពកម្មសិទ្ធិបញ្ញា ការប្រយុទ្ធប្រឆាំងនឹងបញ្ជូនបច្ចេកវិទ្យា លុបចោលនូវនយោបាយជាន់ពន្លិចដៃគូ លើកចេញនូវឧបសគ្គនៃការនាំចេញ នឹងត្រូវភាគីអាមេរិកលើកមកពិភាក្សាជាមួយចិន នៅសប្តាហ៍ក្រោយ។
សូមបញ្ជាក់ថា ភាពតានតឹងដែលកើតមានរវាងចិនអាមេរិក ច្រើនតែបណ្តាលមកពីបញ្ហាពាណិជ្ជកម្ម។ អាមេរិកធ្លាប់ចោទចិនជាញឹកញាប់ ថាធ្វើឱ្យខូចផលប្រយោជន៍ក្រុមហ៊ុនអាមេរិកតាមរយៈការលួចចម្លងផលិតផល តែអនុគ្រោះខ្លាំងក្រុមហ៊ុនចិន។ អាមេរិកបានធ្វើសកម្មភាពយ៉ាងច្រើនប្រឆាំងនឹងចិន នៅចំពោះមុខអង្គការពាណិជ្ជកម្មពិភពលោក OMC ដើម្បីបរិហារការប្រកួតប្រជែងដែលគ្មានលក្ខណៈសុចរិតបែបនេះ។ ឯចំណែកចិនវិញបន្ទោសអាមេរិកថាមាននយោបាយការពារនិយមជ្រុល និងទាមទារឱ្យអាមេរិកលុបចោលការហាមឃាត់ផ្នែកលក់បច្ចេកវិទ្យា។
តាំងពីថ្ងៃចន្ទទី ១០ធ្នូម្សិលមិញមក អនុរដ្ឋលេខាធិការទទួលបន្ទុកចំណោទអន្តរជាតិ នៃក្រសួងហិរញ្ញវត្ថុអាមេរិក បានធ្វើដំណើរទៅកាន់ក្រុងប៉េកាំងដើម្បីឃោសនាអំពីសមភាពរវាងក្រុមហ៊ុនអាមេរិកនិងគូប្រជែងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ