កម្ពុជា -

អត្ថបទចុះផ្សាយនៅថ្ងៃ សុក្រ 28 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 28 កញ្ញា 2012

នាយករដ្ឋមន្ត្រីប្រកាសពីការបន្តផ្អាកផ្តល់ដីសម្បទានសេដ្ឋកិច្ចដល់ក្រុមហ៊ុន

លោកនាយករដ្ឋមន្ត្រីហ៊ុនសែន

RFI/Siv Channa

ដោយ លី ម៉េងហួរ

ក្នុងកិច្ចប្រជុំពេញអង្គគណៈរដ្ឋមន្ត្រី កាលពីព្រឹកថ្ងៃសុក្រទី២៨កញ្ញានេះ លោកនាយករដ្ឋមន្ត្រី ហ៊ុន សែន បានប្រកាសបញ្ជាក់ជាថ្មីថា ការផ្អាកផ្តល់ដីសម្បទានសេដ្ឋកិច្ច ទៅដល់ក្រុមហ៊ុនឯកជននឹងនៅតែបន្តមានប្រសិទ្ធភាព រហូតដល់លោកចូលនិវត្តន៍ ឈប់ធ្វើនយោបាយ។ ការផ្អាកជាបណ្តោះអាសន្នលើការផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនឯកជន ត្រូវបានលោកនាយករដ្ឋមន្ត្រីធ្វើឡើង តាមបទបញ្ជាលេខ ០១ ចុះថ្ងៃទី៧ ខែឧសភាឆ្នាំ២០១២ ស្តីពី វិធានការពង្រឹងនិងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច។

សេចក្តីរាយការណ៍របស់ លី ម៉េងហូរពីភ្នំពេញ

ស្តាប់ (03:25)

28/09/2012 by លី ម៉េងហួរ

យោងតាមបទបញ្ជាលេខ ០១ ប.ប. ចុះថ្ងៃទី៧ ខែឧសភា ឆ្នាំ២០១២ ស្តីពី វិធានការពង្រឹង និងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច លោកនាយករដ្ឋមន្ត្រី ហ៊ុន សែន ក្នុងកិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃសុក្រនេះ បានរំលឹក និងបញ្ជាក់ជាថ្មីទៀតថា ការផ្អាកជាបណ្តោះអាសន្ននូវការផ្តល់សម្បទានដីសេដ្ឋកិច្ច ត្រូវបន្តក្នុងរយៈពេលវែង ហើយអាចនឹងឈានទៅដល់ពេលដែលលោកចូលនិវត្តន៍ពីឆាកនយោបាយ។

សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី បង្ហាញថា ក្នុងកិច្ចប្រជុំគណៈរដ្ឋមន្ត្រី នៅព្រឹកមិញ លោកនាយករដ្ឋមន្ត្រី ហ៊ុន សែន បានបញ្ជាក់បន្ថែមថា ក្រុមហ៊ុនដែលទទួលបានសិទ្ធិគ្រប់គ្រងដីសម្បទានសេដ្ឋកិច្ច អាចនឹងរកដៃគូក្រុមហ៊ុនវិនិយោគបាន តែមិនអនុញ្ញាតឲ្យមានការផ្ទេរសិទ្ធិគ្រប់គ្រងដីសម្បទានសេដ្ឋកិច្ច ទៅក្រុមហ៊ុនផ្សេងទៀតបានឡើយ។

លោកនាយករដ្ឋមន្ត្រី បានព្រមានថា បើក្រុមហ៊ុនវិនិយោគណា ដែលរំលោភលើបទបញ្ជានេះ នឹងត្រូវដកហូតសិទិ្ធគ្រប់គ្រង និងបង្កកដីសម្បទានសេដ្ឋកិច្ច ហើយដកហូតទុកធ្វើជាដីសម្បទានសង្គមកិច្ច ចែកជូនប្រជាពលរដ្ឋ។

សូមរម្លឹកថា ក្នុងបទបញ្ជាលេខ០១ ចុះថ្ងៃទី៧ ខែឧសភា ឆ្នាំ២០១២ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន បានដាក់ចេញនូវសេចក្តីសម្រេច ៤ ចំណុច ដែលរួមទាំងការសម្រេចផ្អាកជាបណ្តោះអាសន្ននូវការផ្តល់សម្បទានដីសេដ្ឋកិច្ច ទៅឲ្យក្រុមហ៊ុនវិនិយោគ។ ជាសេចក្តីសម្រេច ដើម្បីការពង្រឹងប្រព័ន្ធគ្រប់គ្រង បែងចែក និងប្រើប្រាស់ដីធ្លី ជាពិសេស ដោយពិនិត្យឃើញតម្រូវការចាំបាច់ និងបន្ទាន់ចំពោះមុខ ក្នុងការធានាសមធម៌ និងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច។
បទបញ្ជាលេខ០១នោះ ក៏ផ្តោតការយកចិត្តទុកដាក់លើការអនុវត្តកិច្ចសន្យាស្តីពីសម្បទានដីសេដ្ឋកិច្ច ពិសេសគឺការអនុវត្តតាមគោលនយោបាយ រូបមន្តស្បែកខ្លានិងការមិនធ្វើឲ្យប៉ះពាល់ដល់ដីធ្លីសហគមន៍ និងជីវភាពរស់នៅរបស់ប្រជាពលរដ្ឋ ក្នុងគោលដៅធ្វើឲ្យសម្បទានដីសេដ្ឋកិច្ច បានផ្តល់ផលប្រយោជន៍ពិតប្រាកដ ជូនដល់ប្រទេសជាតិ និងប្រជាជន។

អង្គការ អាដហុក លើកឡើងថា ក្នុងឆ្នាំ២០១១ រដ្ឋាភិបាលបានចេញអនុក្រឹត្យចំនួន ១២៣ ដើម្បីផ្តល់ដីសម្បទានសេដ្ឋកិច្ចទៅឲ្យក្រុមហ៊ុនឯកជន ចំនួន ៧៥១.៨៨២ ហិកតា។ ក្នុងនោះ ផ្ទៃដីជាង ២ ភាគ ៣ បានកាត់ចេញពីដីការពារដោយព្រះរាជក្រឹត្យ ដែលជាតំបន់ការពារសត្វព្រៃ និងព្រៃឈើ។
គិតមកទល់នឹងឆ្នាំ២០១១ រដ្ឋាភិបាល បានផ្តល់ដីសម្បទានសេដ្ឋកិច្ច សរុបប្រមាណ ២.២៧៦.៣៤៩ ហិកតាទៅដល់ក្រុមហ៊ុនឯកជនចំនួន២២៥ក្រុមហ៊ុនតាមរយៈក្រសួងកសិកម្មនិងតាមរយៈអនុក្រឹត្យ ផ្តល់ដីសម្បទានសេដ្ឋកិច្ច ពីប្រមុខរាជរដ្ឋាភិបាលដោយផ្ទាល់។ តាមអាដហុក ការផ្តល់ដីសម្បទានសេដ្ឋកិច្ចដ៏ច្រើននេះ ជាមូលហេតុដ៏ចម្បងដែលបង្កឲ្យមានទំនាស់ដីធ្លីនាពេលបច្ចុប្បន្ន និងទៅបណ្តាឆ្នាំខាងមុខៗទៀត។

ក្នុងកិច្ចប្រជុំគណៈរដ្ឋមន្ត្រី នៅព្រឹកមិញ លោកនាយករដ្ឋមន្ត្រី ក៏បានប្រកាសសម្រេចតម្រូវឲ្យក្រុមហ៊ុនវិនិយោគដែលទទួលបានដីសម្បទានសេដ្ឋកិច្ច បង់ថ្លៃឈ្នួលដីចំនួន៥ដុល្លារ សហរដ្ឋអាមេរិក ក្នុងដីមួយ ១ ហិកតា ចាប់ពីឆ្នាំទី៦ នៃការវិនិយោគ។ ថ្លៃឈ្នួលដីចំនួន ៥ ដុល្លារសហរដ្ឋអាមេរិក ក្នុង ១ហិកតានេះ នឹងត្រូវកើនឡើង ១ភាគរយ ជារៀងរាល់ឆ្នាំ។

សេចក្តីសម្រេចដូច្នេះ ក្នុងគោលបំណងជំរុញនិងលើកទឹកចិត្តដល់ការធ្វើផលិតកម្ម លើវិស័យកសិកម្ម។ កិច្ចប្រជុំគណៈរដ្ឋមន្ត្រី នៅព្រឹកមិញ ក៏បានអនុម័ត បង្កើតឧត្តមក្រុមប្រឹក្សាការពារជាតិ ដែលមានព្រះមហាក្សត្រ ជាប្រធាន និងនាយករដ្ឋមន្ត្រី ជាអនុប្រធាន៕