ទីក្រុងប៉េកាំងគំរាមដាក់ទណ្ឌកម្មសេដ្ឋកិច្ចទៅលើប្រទេសជប៉ុន
ទំនាក់ទំនងរវាងប្រទេសចិននិងប្រទេសជប៉ុនបន្តធ្លាក់ចុះដុនដាបនៅថ្ងៃចន្ទទី១៧កញ្ញានេះ។ សារព័ត៌មានផ្លូវការចិនបានប្រកាសគំរាមដាក់ទណ្ឌកម្មសេដ្ឋកិច្ចទៅលើទីក្រុងតូក្យូ បើប្រសិនជាអធិករណ៍នៃតំបន់ទីប្រជុំកោះDiaoyu-Senkaku ឋិតនៅក្នុងសមុទ្រចិនខាងកើតដែលឈ្លោះដណ្តើមដោយមហាអំណាចអាស៊ីទាំងពីរនៅតែបន្តកើតមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៥
ក្រុមហ៊ុនជប៉ុនធំៗខ្លះដែលប្រកបអាជីវកម្មនៅក្នុងប្រទេសចិនបានព្យួរផ្អាកសកម្មភាពរបស់ខ្លួន។ ក៏ដូចគ្នាអ៊ីចឹងដែរសម្រាប់សាលារៀនជប៉ុនជាច្រើនដែលមាននៅទីក្រុងប៉េកាំងនិងនៅទីក្រុងសៀងហៃ បាននាំគ្នាបិទទ្វារសម្រាប់សប្តាហ៍នេះ។ ក្តីបារម្ភខ្លាចបាតុកម្មហិង្សា ធ្វើឲ្យប៉ះពាល់ដល់សហគមន៍ជប៉ុនដែលគ្នាប្រមាណ៥៦ ០០០នាក់។ ទាំងនេះក្រោយពីមានបាតុកម្មហិង្សាប្រឆាំងនឹងជប៉ុនបានកើតមាននៅតាមទីក្រុងធំៗចិនជាច្រើននៅចុងសប្តាហ៍នេះ។
ចំណែកឯទីក្រុងតូក្យូវិញ បានព្រមានប្រជាជនជប៉ុនដែលរស់នៅប្រទេសចិនពីបាតុកម្មហិង្សាដែលអាចកើតមាននៅថ្ងៃអង្គារស្អែក ដែលជាថ្ងៃខួបរំលឹកដល់ ការវាយលុកឈ្លានពានដោយប្រទេសជប៉ុនទៅលើតំបន់ Mandchourie នៅឆ្នាំ១៩៣១។
គួរបញ្ជាក់ថា នៅចុងសប្តាហ៍កន្លងទៅនេះ ប្រជាជនចិនអ្នកជាតិនិយមរាប់ម៉ឺននាក់ បាននាំគ្នាធ្វើបាតុកម្មប្រឆាំងជប៉ុន ក្រោយពីមានការប្រកាសដោយទីក្រុងតូក្យូថា បានទិញពីម្ចាស់ឯកជននូវកោះមួយចំនួនដែលចិនហៅថា កោះ Diaoyu ឬកោះ Senkaku ជាភាសាជប៉ុន។
បាតុកម្មហិង្សាបានផ្ទុះកើតមាននៅក្នុងទីក្រុងចិនធំៗចំនួនយ៉ាងតិចប្រាំ សម្ដែងប្រឆាំងនឹងស្ថានទូតឬស្ថានកុងស៊ុលជប៉ុន ឬហាងលក់ទំនិញ ភោជនីយដ្ឋាន ឬហាងលក់រថយន្តម៉ាកជប៉ុនដូចជា តូយ៉ូតា ឬ ហុងដា។
ស្ថានភាពអាចធ្លាក់ចុះដុនដាបនៅថ្ងៃចន្ទនេះ ពីព្រោះសារព័ត៌មានប្រជាជនដែលជាសារព័ត៌មានផ្លូវការរបស់បក្សកុម្មុយនិស្តចិនបានផ្សាយឲ្យដឹងថា មាននាវាប្រមាណជា១ ០០០បានចេញដំណើរទៅទីប្រជុំកោះ ហើយប្រហែលជាអាចទៅដល់ទីប្រជុំកោះ Diaoyu ឬ Senkaku នៅថ្ងៃចន្ទទី១៧កញ្ញានេះ។
ក្រោយពីមានកិច្ចសន្ទនាជាមួយរដ្ឋមន្ត្រីក្រសួងការពារជាតិអាមេរិក លោក Leon Panetta លោករដ្ឋមន្ត្រីក្រសួងការបរទេសជប៉ុនបានថ្លែងប្រកាសថា “សហរដ្ឋអាមេរិកនិងប្រទេសជប៉ុនចងភ្ជាប់នឹងគ្នាដោយសន្ធិសញ្ញាសន្តិសុខ ដូច្នេះពាក់ព័ន្ធនឹងបញ្ហា ទីប្រជុំកោះ Senkaku ក៏ដូចគ្នាអ៊ីចឹងដែរ”។
គួរកត់សម្គាល់ថា ទោះបីជាប្រទេសចិននិងប្រទេសជប៉ុនមានអធិករណ៍ប្រវត្តិសាស្ត្រនិងអធិករណ៍ដែនដីនឹងគ្នាយ៉ាងណាក៏ដោយ ក៏ប្រទេសចិនបានក្លាយទៅជា “ដៃគូពាណិជ្ជកម្មទីមួយ” របស់ប្រទេសជប៉ុន។ នៅឆ្នាំ២០១១កន្លងទៅនេះ ការដោះដូរពាណិជ្ជកម្មរវាងប្រទេសទាំងពីរបានកើនឡើង១៤,៣% ឬកើនឡើងដល់កម្រិតឯតទគ្គកម្ម ៣៤៥ពាន់លានដុល្លារឬត្រូវជា ២៦៣ពាន់លានអឺរ៉ូ។
សារព័ត៌មានប្រជាជនដែលជាសារព័ត៌មានផ្លូវការរបស់បក្សកុម្មុយនិស្តចិនបានព្រមានទីក្រុងតូក្យូនៅថ្ងៃចន្ទនេះទៀតថា ប្រទេសជប៉ុនអាចជួបនឹង “ទសវត្សរ៍ខាតបង់សេដ្ឋកិច្ច”មួយដ៏ធ្ងន់ធ្ងរ ឬ “អាចបោះជំហានថយក្រោយម្ភៃឆ្នាំផងទៀត” បើប្រសិនជាប្រទេសចិនសម្រេចដាក់ “ទណ្ឌកម្មសេដ្ឋកិច្ច”ទៅលើប្រទេសជប៉ុន។
រីឯរដ្ឋមន្ត្រីក្រសួងការពារជាតិអាមេរិកលោក Leon Panetta បានថ្លែងប្រាប់ទីក្រុងតូក្យូនិងទីក្រុងប៉េកាំងថា “វាជាផលប្រយោជន៍របស់ប្រទេសជប៉ុននិងប្រទេសចិនដែលចេះថែរក្សាឲ្យមានទំនាក់ទំនងល្អនឹងគ្នា ហើយចៀសវាកុំបង្កឲ្យមានភាពតានតឹងនៅក្នុងតំបន់”។
លោក Leon Panetta បានថ្លែងបន្ថែមទៀតថា “សហរដ្ឋអាមេរិកនិងប្រទេសជប៉ុនចងភ្ជាប់ដោយសន្ធិសញ្ញាជួយការពារសន្តិសុខគ្នាទៅវិញទៅមក ហើយយើងគោរពសន្ធិសញ្ញានេះដែលមានជាយូរមកហើយ គ្មានអ្វីប្រែប្រួលឡើយ”។
រដ្ឋមន្ត្រីក្រសួងការពារជាតិអាមេរិកបានបញ្ជាក់ថា “សហរដ្ឋអាមេរិកមានទាហាន៤៧ ០០០នាក់នៅលើដែនដីជប៉ុន ក៏ប៉ុន្តែទីក្រុងវ៉ាស៊ីនតោនមានគោលការណ៍នយោបាយក្រៅប្រទេសមួយពោលគឺមិនលូកដៃចូលទៅក្នុងបញ្ហាជម្លោះដែនដីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ