កញ្ចប់សុវត្ថិភាព “ក” ទាំង១៣ការិយាល័យនៅខេត្តក្រចេះ មានភាពមិនប្រក្រតី
ពេញមួយព្រឹកថ្ងៃអាទិត្យទី២៥ សីហានេះ កញ្ចប់សុវត្ថិភាព “ក” នៅឃុំស្វាយជ្រះ ទាំង ១៣ការិយាល័យ នៅមណ្ឌលខេត្តក្រចេះ ត្រូវបានបើកដើម្បីផ្ទៀងផ្ទាត់ហើយ នៅទីស្តាក់ការគ.ជ.ប។ ពិធីបើកការផ្ទៀងផ្ទាត់នេះដែរ មានការចូលរួមពីតំណាងក្រុមប្រឹក្សាធម្មនុញ្ញចំនួន៣រូប តំណាងគណបក្សនយោបាយទាំង៧ សមាសភាពគ.ជ.ប អ្នកអង្កេតការណ៍ជាតិ និងអន្តរជាតិ រួមទាំងអ្នកសារព័ត៌មានរាប់សិបនាក់ផងដែរ។ តែយ៉ាងណាក៏ដោយ គណបក្សសង្គ្រោះជាតិដែលជាដើមបណ្តឹង អះអាងថា មានភាពមិនប្រក្រតីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
កញ្ចប់សុវត្ថិភាព “ក” ទាំង១៣ការិយាល័យនៅឃុំស្វាយជ្រះ ក្នុងមណ្ឌលខេត្តក្រចេះ មានភាពមិនប្រក្រតីទាំងអស់ ដែលធ្វើឱ្យប៉ះពាល់ដល់ចំនួនអាសនៈរបស់គណបក្សសង្គ្រោះជាតិ។ នេះតាមការបញ្ជាក់របស់លោក គួយ ប៊ុនរឿន តំណាងគណបក្សសង្គ្រោះជាតិ ដែលបានថ្លែងទៅកាន់អ្នកសារព័ត៌មានបន្ទាប់ពីការពិនិត្យរួច។
តំណាងរាស្ត្រគណកប្សសង្គ្រោះជាតិរូបនេះ បានបង្ហាញករណីនៃភាពមិនប្រក្រតីទាំងនោះដែលរួមមានកញ្ចប់សុវត្ថិភាព “ក” ចំនួន៦ការិយាល័យ ត្រូវបានបើកចំហរ ចំនួនសន្លឹកឆ្នោតមិនបានការប្រែប្រួលខុសគ្នាពីទម្រង់១១០៤ ដែលគ.ជ.ប ផ្តល់ថ្ងៃទី២៨ កក្កដា និងថ្ងៃទី៣០ កក្កដា រួមទាំងការកោសលុប និងសរសេរថ្មីលើលទ្ធផលចាស់ជាដើម។ សម្រាប់លោក គួច ប៊ុនរឿន ប្រសិនភាពមិនប្រក្រតីមានតែ២៥ ទៅ៥០ សម្លេងនោះ វានឹងធ្វើឱ្យគណកប្សប្រជាជនកម្ពុជា ឬគណបក្សសង្គ្រោះជាតិបាត់អាសនៈដែលនឹងត្រូវទទួលបាន។ ហេតុដូច្នេះហើយ មន្ត្រីគណបក្សសង្គ្រោះជាតិរូបនេះ បានទទូចឱ្យក្រុមប្រឹក្សាធម្មនុញ្ញបើកការស៊ើបអង្កេតលើបណ្តឹងទាំង១៥ខេត្ត-ក្រុង របស់គណបក្សសង្គ្រោះជាតិថែមទៀត។
គ្មានការឆ្លើយតបភ្លាមៗពីក្រុមប្រឹក្សាធម្មនុញ្ញ ចំពោះការបើកកញ្ចប់សុវត្ថិភាពនៅក្នុងខេត្តផ្សេងទៀត ដូចការចង់បានរបស់គណបក្សសង្គ្រោះជាតិនោះឡើយ។ ប៉ុន្តែ លោក ព្រហ្ម ញាណវិចិត្រ តំណាងក្រុមប្រឹក្សាធម្មនុញ្ញ បានថ្លែងអោយដឹងថា ក្រោយពីក្រុមប្រឹក្សាធម្មនុញ្ញ ពិនិត្យមើលឃើញភាពមិនប្រក្រតីទាំងនេះហើយ ស្ថាប័នកំពូលមួយនេះនឹងពិចារណាលើការបើកសវនាការជាសាធារណ លើភាពមិនប្រក្រតីទាំងនេះ ដើម្បីផ្តល់យុត្តិធម៌ជូនដើមបណ្តឹង។ លោក ព្រហ្ម ញាណវិចិត្រ បានបញ្ជាក់ថា ក្រុមប្រឹក្សាធម្មនុញ្ញនឹងដោះស្រាយរាល់បណ្តឹងទាំងអស់របស់គណបក្សសង្គ្រោះជាតិ ឱ្យបានមុនថ្ងៃប្រកាសលទ្ធផលជាផ្លូវការរបស់គណៈកម្មាធិការជាតិរៀបចំកាបោះឆ្នោត នៅថ្ងៃទី៨ កញ្ញាខាងមុខនេះ។ គួរបញ្ជាក់ថា យោងតាមប្រក្រតិទិននៃការបោះឆ្នោត ក្រុមប្រឹក្សាធម្មនុញ្ញមានរយៈពេលតែ២០ថ្ងៃប៉ុណ្ណោះសម្រាប់ការដោះស្រាយភាពមិនប្រក្រតីនៃការបោះឆ្នោត។
ប៉ុន្តែ ដោយសារភាពមិនប្រប្រតីនៃការបោះឆ្នោតនៅក្នុងមណ្ឌលខេត្តក្រចេះត្រូវបានរកឃើញយ៉ាងដូច្នេះ មន្ត្រីគណបក្សសង្គ្រោះជាតិស្នើអោយមានការពន្យារពេលប្រកាសលទ្ធផលបោះឆ្នោតផ្លូវការ។
គួររំលឹកថា លទ្ធផលប្រកាសបណ្តោះអាសន្នរបស់គ.ជ.ប សម្រាប់មណ្ឌលខេត្តក្រចេះ គណបក្សសង្គ្រោះជាតិទទួលបាន១ អាសនៈ និងគណបក្សប្រជាជនកម្ពុជាទទួលបាន២ អាសនៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ