កម្ពុជា -

អត្ថបទចុះផ្សាយនៅថ្ងៃ ពុធ 08 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 08 សីហា 2012

កម្ពុជានឹងរៀនមេរៀនព្រំដែនកម្ពុជាវៀតណាមព្រឹកថ្ងៃព្រហស្បតិ៍

ប្រវត្តិព្រំដែនកម្ពុជា-វៀតណាមដែលប្រមុខរដ្ឋាភិបាលកម្ពុជា ហ៊ុន សែន គ្រោងពេល៤ម៉ោងដើម្បីពន្យល់នៅក្នុងរដ្ឋសភា

ដោយ លាង ដឺលុច

នៅព្រឹកថ្ងៃព្រហស្បតិ៍ទី៨សីហាស្អែកនេះ ប្រជាពលរដ្ឋកម្ពុជាទាំងមូលត្រូវបានអំពាវនាវអោយតាមដានបទបង្ហាញរបស់លោកនាយករដ្ឋមន្ត្រីហ៊ុន សែនលើសំណុំរឿងព្រំដែនកម្ពុជាវៀតណាម។ ការអំពាវនាវត្រូវបានផ្សពផ្សាយយ៉ាងទូលំទូលាយ។ នៅតាមទីសាធារណៈ វត្តអារ៉ាមក៏ត្រូវបានណែនាំអោយដាក់ទូរទស្សន៍ដែលបញ្ចាំងពីការផ្សាយផ្ទាល់ការបកស្រាយរបស់ប្រមុខរដ្ឋាភិបាលកម្ពុជាពីសាលប្រជុំពេញអង្គរដ្ឋសភាផងដែរ។

សេចក្តីរាយការណ៍របស់ លាង ដឺលុច

ស្តាប់ (01:58)

08/08/2012 by លាង ដឺលុច

តាំងពីពលរដ្ឋសាមញ្ញ រហូតដល់មន្ត្រីរាជការ មន្ត្រីនគរបាល យោធា សិស្ស និស្សិត រួមទាំងក្រុមនិស្សិតស្ម័គ្រចិត្តដែលកំពុងជួយវាស់វែងដីធ្លីអោយប្រជាពលរដ្ឋនៅតាមខេត្ត និងជនបទផងនោះ ពួកគេបានទទួលបញ្ជា និងការណែនាំអោយតាមដានការបកស្រាយជាសាធារណៈរបស់លោកនាយករដ្ឋមន្ត្រីហ៊ុន សែននៅព្រឹកថ្ងៃព្រហស្បតិ៍ស្អែកនេះ។ គឺជាការលើកឡើងអំពីសារបាននៃប្រវត្តិព្រំដែនកម្ពុជាវៀតណាមដែលប្រមុខរដ្ឋាភិបាលកម្ពុជាលោកហ៊ុន សែនបានគ្រោងពេលវេលា៤ម៉ោងឯណោះនៅក្នុងរដ្ឋសភា។

វត្តមានរបស់លោកនាយករដ្ឋមន្ត្រីនៅថ្ងៃស្អែកនេះគឺជាការឆ្លើយតបទៅនឹងសំណើរបស់អ្នកតំណាងរាស្ត្រគណបក្សសម រង្ស៊ី។
តាំងពីល្ងាចថ្ងៃអង្គារម្សិលមិញ សេចក្តីជូនដំណឹងរបស់ទីស្តីការគណៈរដ្ឋមន្ត្រី និងសាលារាជធានីភ្នំពេញផង ត្រូវបានផ្សព្វផ្សាយយ៉ាងទូលំទូលាយដើម្បីអោយប្រជាពលរដ្ឋគ្រប់មជ្ឈដ្ឋានត្រៀមចាប់ស្តាប់ការបកស្រាយរបស់លោកនាយករដ្ឋមន្ត្រី។ ការត្រៀមដាក់ទូរទស្សន៍ដើម្បីបញ្ចាំងការផ្សាយផ្ទាល់ការបកស្រាយរបស់លោកហ៊ុន សែនត្រូវបានគ្រោងនៅតាមបេនឡាន ទីផ្សារ វត្តអារ៉ាម តាមឃុំ សង្កាត់ និងនៅតាមទីសាធារណៈនានាផ្សេងទៀតតាមតែអាជ្ញាធរមូលដ្ឋានអាចធ្វើបាន។ មន្ត្រីរាជការក៏ត្រូវអនុញ្ញាតអោយជួបប្រជុំមើលការផ្សាយផ្ទាល់នេះដែរ។ នេះគឺជាយុទ្ធនាការមួយដែលពុំធ្លាប់មានពីមុនមកទេ ខណៈដែលរបៀបវារៈព្រំដែនគឺជារបៀបដ៏រសើបមួយរបស់អ្នកនយោបាយកន្លងមក។ បញ្ហាព្រំដែនតែងតែជាប្រធានបទនៃការឃោសនាបោះឆ្នោតរបស់គណបក្សជំទាស់ ក្នុងការវាយប្រហាររដ្ឋាភិបាល។

នៅថ្ងៃនេះដែរ លោកនាយករដ្ឋមន្ត្រីបានថ្លែងតាមមីក្រូពីពិធីសម្ពោធផ្លូវជាតិខេត្តព្រះវិហារបន្ថែមទៀតអំពីព្រឹត្តិការណ៍នៅព្រឹកស្អែកនេះ ដោយចាត់ទុកថា នោះគឺជាការរៀនសូត្រអំពីមេរៀនប្រវត្តិសាស្ត្រដ៏សំខាន់មួយសម្រាប់ពលរដ្ឋខ្មែរគ្រប់រូប។

ព្រោះតែឆ្លើយតបតាមសំណើររបស់តំណាងរាស្ត្រគណបក្សសម រង្ស៊ី លោកនាយករដ្ឋមន្ត្រីបានថ្លែងចំអករួចហើយទៅកាន់តំណាងរាស្ត្រគណបក្សប្រឆាំងមួយនេះ ដើម្បីមិនអោយពួកគេដើរចេញពីកិច្ចប្រជុំសភានៅស្អែកនេះ៕