នាយករដ្ឋមន្ត្រីចុះពិនិត្យទឹកជំនន់ក្រោយត្រឡប់ពីចិន
ទឹកជំនន់នៅតែជាក្តីកង្វល់ធំធេងរបស់រដ្ឋាភិបាលកម្ពុជា ដោយសារតែទឹកនៅតែគំរាមកំហែងខេត្តជាច្រើននៅឡើយ។ ក្រោយពីវិលត្រឡប់មុនកាលកំណត់ពីប្រទេសចិនវិញ កាលពីល្ងាចថ្ងៃសុក្រម្សិលមិញ លោកនាយករដ្ឋមន្ត្រី ហ៊ុន សែន បានចុះពិនិត្យស្ថានភាពទឹកជំនន់នៅក្នុងខេត្តមួយចំនួននាព្រឹកថ្ងៃសៅរ៍នេះ។ ទឹកជំនន់ដែលបានផ្តាច់ជីវិតពលរដ្ឋខ្មែរយ៉ាងតិចជិត២៥០នាក់។ រីឯជំនួយបរទេសក៏បានបន្តធ្លាក់មកជាបន្តបន្ទាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
រហូតមកដល់ចុងសប្តាហ៍នេះ ទឹកជំនន់បានស្រកចុះតែបន្តិចបន្តួចប៉ុណ្ណោះ នៅក្នុងបណ្តាខេត្តមួយចំនួន រីឯខេត្តមួយចំនួនទៀតនៅតែបន្តកើនឡើង។ នេះជាក្តីកង្វល់មួយមិនទាន់ផុតនៅឡើយសម្រាប់រដ្ឋាភិបាលក្រុងភ្នំពេញ។ នៅព្រឹកថ្ងៃសៅរ៍នេះ លោកនាយករដ្ឋមន្ត្រី ហ៊ុន សែន បានចុះពិនិត្យស្ថានភាពទឹកជំនន់ក្នុងខេត្តព្រៃវែង កណ្តាល កំពង់ចាម និងភ្នំពេញផងដែរ។
ក្តីកង្វល់ពីបញ្ហាទឹកជំនន់បានបង្ខំឲ្យប្រមុខរដ្ឋាភិបាលកម្ពុជាវិលត្រឡប់ពីប្រទេសចិនវិញមុនកាលកំណត់ កាលពីល្ងាចថ្ងៃសុក្រម្សិលមិញ។ យ៉ាងណាក៏ដោយ គណៈកម្មាធិការជាតិគ្រប់គ្រងគ្រោះមហន្តរាយមិនបានផ្តល់របាយការណ៍ថ្មីអំពីតុល្យការនៃចំនួនអ្នកស្លាប់ដោយទឹកជំនន់ទេ គឺនៅតែរក្សាតួលេខចំនួនអ្នកស្លាប់ ២៤៧ នាក់ដដែល បើទោះបីជាមានសេចក្តីរាយការណ៍ជាបន្តបន្ទាប់ថា មានអ្នកស្លាប់ជាច្រើនទៀតក្នុងរយៈពេលចុងក្រោយនេះក្តី។ ក្នុងដំណើរចុះទៅពិនិត្យស្ថានភាពទឹកជំនន់ក្នុងខេត្តព្រៃវែងកាលពីព្រឹកមិញ លោកនាយករដ្ឋមន្ត្រី ហ៊ុន សែន ក៏មិនបានថ្លែងសុន្ទរកថាអ្វីដែរ។
រហូតមកទល់ពេលនេះ ប្រទេសចិន គឺជាអ្នកផ្តល់អំណោយធំជាងគេក្នុងបណ្តាជំនួយសង្គ្រោះមកពីបរទេស។ ក្រៅពីផ្តល់សម្ភារៈ និងថ្នាំពេទ្យតម្លៃ៨លានដុល្លារកាលពីសប្តាហ៍មុន ចិនបានបន្ថែមជំនួយប្រហែល២លានដុល្លារទៀតដល់កម្ពុជាតាមរយៈដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន។ ប្រទេសដែលបានផ្តល់ជំនួយសម្រាប់ទឹកជំនន់នៅកម្ពុជាមាន ចិន ជប៉ុន អាមេរិក អូស្ត្រាលី និងបារាំង។ បារាំងបានផ្តល់ប្រាក់៨ម៉ឺនដុល្លារតាមរយៈកាកបាទក្រហមបារាំង ដើម្បីទិញសម្ភារៈជួយជនរងគ្រោះក្នុងខេត្តកំពង់ធំដែលកំពុងលិចលង់។
ស្របពេលជាមួយគ្នានេះដែរ ប្រទេសកូរ៉េខាងត្បូងក៏បានផ្តល់ជំនួយ ១លានដុល្លារដល់ ក្រសួងកសិកម្ម ដើម្បីបង្កើតផែនការមេសម្រាប់ជំរុញការវិនិយោគផ្នែកកសិកម្មនៅកម្ពុជា។ កសិកម្មដែលជាវិស័យអាទិភាពរបស់ប្រទេសនេះ។ ការផ្តល់ជំនួយនេះ បានធ្វើឡើងក្នុងពិធី ចុះហត្ថលេខាមួយដែលរៀបចំធ្វើឡើងនៅថ្ងៃសុក្រទី២១ខែតុលាម្សិលមិញនៅទីក្រុងភ្នំពេញ។ កូរ៉េនឹងជួយកម្ពុជាដើម្បីអភិវឌ្ឍន៍វិស័យកសិកម្ម និងការវិនិយោគលើវិស័យកសិកម្មកម្ពុជាក្រោយពីការស្រកចុះនៃទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ