ស៊ីរី -

អត្ថបទចុះផ្សាយនៅថ្ងៃ អាទិត្យ 19 សីហា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 19 សីហា 2012

អ្នកសង្កេតការណ៍អង្គការសហប្រជាជាតិចាកចេញពីស៊ីរីដោយជូរចត់

លោក Babacar Gaye ប្រមុខដឹកនាំក្រុមអ្នកសង្កេតការណ៍ អ.ស.ប. នៅស៊ីរី

REUTERS/Stringer

ដោយ អៀង សុខម៉ិញ

ក្រុមអ្នកសង្កេតការណ៍អង្គការសហប្រជាជាតិ បានចាប់ផ្តើមចាកចេញពីប្រទេសស៊ីរីបណ្តើរៗហើយ។ អាណត្តិនៃការបំពេញបេសកកម្មសង្កេតការណ៍ ត្រូវផុតឱសានវាទនៅថ្ងៃអាទិត្យទី ១៩សីហា ឆ្នាំ២០១២ វេលាម៉ោង១២អាធ្រាត្រ។ ប្រមុខដឹកនាំក្រុមមួកខៀវ បានចោទប្រកាន់ទាំងសងខាង ទាំងខាងរដ្ឋាភិបាលក្រុងដាម៉ាស និងទាំងខាងពួកបះបោរថា សុទ្ធតែបានសម្លាប់ជនស៊ីវិល។

សេចក្តីរាយការណ៍របស់ អៀង សុខម៉ិញ

ស្តាប់ (01:40)

19/08/2012

ជាការចាកចេញដ៏ជូរចត់ណាស់ សម្រាប់ក្រុមអ្នកសង្កេតការណ៍អង្គការសហប្រជាជាតិ នៅស៊ីរី ! ក្នុងរយៈពេលបួនខែ វត្តមានរបស់ក្រុមមួកខៀវនេះ បានត្រឹមឈរមើលឃើញ ប្រទេសជាតិមួយទាំងមូលធ្លាក់ផ្លុងចូលក្នុងជ្រោះនៃសង្គ្រាមស៊ីវិល ដោយមានការប្រយុទ្ធគ្នា កាន់តែសាហាវឡើងៗជារៀងរាល់ថ្ងៃ។

នៅក្នុងសន្និសីទកាសែតចុងក្រោយ ប្រមុខដឹកនាំក្រុមអ្នកសង្កេតការណ៍ លោកឧត្តមសេនីយ៍ Babacar Gaye បានសម្គាល់ឱ្យដឹងថា តាំងពីខែមិថុនាមក គូបដិបក្ខទាំងពីរ សុទ្ធតែបានបង្កើនទង្វើហិង្សា ហើយទាំងកងកម្លាំងរដ្ឋាភិបាលស៊ីរី និងទាំងក្រុមឧទ្ទាមអ្នកបះបោរ មិនដែលគោរពឡើយច្បាប់ ឬស្គាល់អ្វីជាសិទ្ធិមនុស្សធម៌ ដែលតម្រូវឱ្យការពារជីវិតជនស៊ីវិលនោះទេ។

ក្នុងស្ថានការណ៍បែបនេះ ក្រុមប្រឹក្សាសន្តិសុខអង្គការសហប្រជាជាតិ យល់ថា រក្សាវត្តមានក្រុមអ្នកសង្កេតការណ៍គ្មានអាវុធនៅនឹងដៃ ពិតជាមានគ្រោះថ្នាក់ខ្លាំងណាស់ ទើបសម្រេចត្រូវតែបិទបញ្ចប់ត្រឹមណេះ។ ម្យ៉ាងក្រុមមួកខៀវទាំងអស់នេះ តាំងពីដើមបេសកម្មមក នៅតែក្នុងសណ្ឋាគារ។

អង្គការសហប្រជាជាតិរក្សាទុកតំណាងរបស់ខ្លួនតែប្រមាណជាង២០នាក់ ឱ្យប្រចាំការនៅក្នុងក្រុងដាម៉ាស។ អន្តរការីពិសេសថ្មី លោក Lakhdar Brahimi នឹងត្រូវអញ្ជើញទៅកាន់ទីក្រុងញូវយ៉កសប្តាហ៍ក្រោយ ដើម្បីស្នើដំណោះស្រាយថ្មី ធ្វើយ៉ាងណានាំភាគីរដ្ឋាភិបាល និងក្រុមអ្នកបះបោរឱ្យចូលតុចរចា។ ការចរចាដែលពួកអ្នកប្រឆាំងមិនបានត្រៀមទទួលយកសោះ។ ពួកគេត្រូវការតែម្យ៉ាង គឺទម្លាក់របបដឹកនាំលោក បាស្ហារ អាលអាសាទ ហើយដើម្បីសម្រេចបំណងនេះបាន ពួកឧទ្ទាមបានទាមទារឱ្យបង្កើតតំបន់ហោះហើរហាមឃាត់ ប៉ុន្តែរុស្ស៊ីប្រឆាំងដាច់ខាតចំណុចនេះ៕