អ.ស.ប៖ ដំណំាអាភៀនបានកើនទ្វេដងនៅអាស៊ីអាគ្នេយ៍តំាងពីឆ្នំា ២០០៦
នៅថ្ងៃពុធ ទី៣១ តុលានេះ ការិយាល័យអង្គការសហប្រជាជាតិប្រយុទ្ធប្រឆំាងគ្រឿងញាន និងឧក្រិដ្ឋភាពបានចេញផ្សាយរបាយការណ៍មួយស្តីពីស្ថានភាពដំណំាអាភៀននៅក្នុងពិភពលោក។ យោងតាមរបាយការណ៍ ដំណំាអាភៀនបានកើនទ្វេដងនៅអាស៊ីអាគ្នេយ៍តំាងពីឆ្នំា ២០០៦ មក។ កំណើនដំណំាអាភៀនដោយសារតែតម្រូវការថ្នំាជាតិអាភៀនមានការកើនឡើងនៅក្នុងប្រទេសចិន និងនៅក្នុងតំបន់។ គឺមកពីមានកំណើនតម្រូវការថ្នំាជាតិអាភៀននេះហើយ ដែលបានជម្រុញឲ្យកសិករក្នុងប្រទេសភូមា និងឡាវបង្កើនការដំាដើមអាភៀនកាន់តែច្រើនឡើង។
ចុះផ្សាយនៅថ្ងៃ៖
ស្តាប់ - ០២:២៥
យោងតាមរបាយការណ៍ មានផលិតផលអាភៀន ១ភាគ៤នៃទីផ្សារពិភពលោកត្រូវបានប្រើប្រាស់ដោយប្រជាជនរស់នៅក្នុងតំបន់អាស៊ីអាគ្នេយ៍ និងប៉ាស៊ីហ្វិក ក្នុងនោះ គ្រាន់តែប្រទេសចិនតែមួយ មានអ្នកប្រើប្រាស់គ្រឿងញានរហូតដល់ទៅ ១លាននាក់។ របាយការណ៍របស់អង្គការសហប្រជាជាតិដដែលបានបញ្ជាក់ថា នៅក្នុងចន្លោះឆ្នំា ២០១១ និង ២០១២ ជាមួយនឹងតម្លៃអាភៀនចេះតែឡើងថ្លៃ បានជម្រុញឲ្យមានការពង្រីកផ្ទៃដីដំាដើមអាភៀនរហូតដល់ទៅ ៦៦% នៅក្នុងប្រទេសឡាវ និង១៧% នៅក្នុងប្រទេសភូមា។ បច្ចុប្បន្ននេះ ឡាវមានផ្ទៃដីដំាដើមអាភៀនចំនួន ៦ ៨០០ហិចតា រីឯភូមាដែលជាប្រទេសផលិតអាភៀនស្ថិតក្នុងលំដាប់ទី២ក្នុងលោក បន្ទាប់ពីប្រទេសអាហ្វហ្កានីស្ថាន មានផ្ទៃដីដំាដើមអាភៀនរហូតដល់ទៅ ៥១ ០០០ហិចតា។ ជាសរុបឃើញថា ទោះបីជារដ្ឋាភិបាលនៃប្រទេសថៃ ភូមា និងឡាវបានប្រកាសពីការដុតបំផ្លាញដំណំាអាភៀនអស់ប្រមាណជា ២៥ ០០០ហិចតាក្នុងឆ្នំា ២០១២ ក៏ដោយ ក៏ដំណំាអាភៀនមានការកើនឡើងទ្វេដង បើគិតតំាងពីឆ្នំា ២០០៦ មក។
បើយោងតាមរបាយការណ៍របស់ការិយាល័យអង្គការសហប្រជាជាតិប្រយុទ្ធប្រឆំាងគ្រឿងញាន និងឧក្រិដ្ឋភាព ផលិតផលគ្រឿងញាននៅក្នុងប្រទេសឡាវ និងភូមាគិតជាប្រាក់មានប្រមាណជា ៤៣១លានដុល្លារក្នុងឆ្នំា ២០១២ ពោលមានការកើនឡើងចំនួន ១ភាគ៣ បើធៀបនឹងឆ្នំា ២០១១។ បើគិតជាតម្លៃក្នុងមួយគីឡូក្រាមទិញពីអ្នកដំាផ្ទាល់ គឺ ១ ៨០០ដុល្លារក្នុង១គីឡូក្រាមនៅក្នុងប្រទេសឡាវ និងតែ ៥២០ដុល្លារប៉ុណ្ណោះក្នុង១គីឡូក្រាមនៅក្នុងប្រទេសភូមា។ ទន្ទឹមគ្នានេះ ចំនួនកសិករដែលប្តូរពីការដំាដំណំាធម្មតា មកដំាដើមអាភៀនក៏មានការកើនឡើងដែរ នៅក្នុងប្រទេសភូមា និងឡាវ។
របាយការណ៍របស់អង្គការសហប្រជាជាតិបានបញ្ជាក់បន្ថែមថា ប្រជាជនភូមាដែលរស់នៅក្នុងរដ្ឋឆានស្ថិតប៉ែកឦសានប្រទេសនឹងមិនងាយបោះបង់ចោលនូវមុខរបរដំាដើមអាភៀននេះឡើយ ព្រោះថាសព្វថ្ងៃ ពួកគេកំពុងរស់នៅដោយពឹងផ្អែកទំាងស្រុងលើចំណូលដែលបានមកពីការលក់គ្រឿងញាន។ សូមជម្រាបជូនថា រដ្ឋាភិបាលភូមាបានរៀបចំផែនការបោសសំអាតដំណំាអាភៀនឲ្យអស់ចាប់ពីពេលនេះ ទៅដល់ឆ្នំា ២០១៤។ តែលទ្ធផលនៃការសិក្សារបស់ការិយាល័យអង្គការសហប្រជាជាតិប្រយុទ្ធប្រឆំាងគ្រឿងញាន និងឧក្រិដ្ឋភាព ដោយផ្អែកលើការសង្កេតតាមប្រព័ន្ធផ្កាយរណប តាមឧទ្ធម្ភាគចក្រ និងនៅកន្លែងផ្ទាល់ឲ្យដឹងថា ផែនការរបស់រដ្ឋាភិបាលភូមាប្រហែលជាមិនអាចសម្រេចបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ