ស៊ីរី-អ.ស.ប.-តួកគី -

អត្ថបទចុះផ្សាយនៅថ្ងៃ សុក្រ 05 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 05 តុលា 2012

អ.ស.ប.ថ្កោលទោសការបាញ់ផ្លោងរបស់ស៊ីរីទៅលើតួកគីនិងអំពាវនាវឲ្យតួគីអត់ធ្មត់

នៅលើទឹកដីស៊ីរីការវាយប្រយុទ្ធគ្នានៅតែបន្តឥតស្រាកស្រាន្តនៅថ្ងៃទី៤តុលាម្សិលមិញ ដូចជានៅទីក្រុង Alepដែលរងអន្តរាយដោយការទម្លាក់គ្រាប់បែកពីយន្តហោះរដ្ឋាភិបាលស៊ីរី.

REUTERS/Abdalghne Karoof

ដោយ នុយ ប៊ែរណាដែត

ក្រោយពីចរចាគ្នាយ៉ាងយូរអស់រយៈពេលជាច្រើនម៉ោងមក រវាងបណ្តាប្រទេសលោកខាងលិចនិងរុស្ស៊ី ក្រុមប្រឹក្សាសន្តិសុខរបស់អ,ស,ប. បានផ្សព្វផ្សាយនូវសេចក្តីថ្លែងការណ៍មួយកាលពីយប់មិញ បរិហារអំពីការបាញ់ផ្លោងរបស់ស៊ីរីទៅលើភូមិមួយក្នុងទឹកដីតួកគីជិតព្រំដែនដែលបណ្តាលឲ្យស្លាប់ជនស៊ីវិលតួកគី៥នាក់កាលពីយប់ថ្ងៃពុធទី៣តុលា។ សេចក្តីថ្លៃងការណ៍ បានអំពាវនាវផងដែរ សុំឲ្យប្រទេសជិតខាងទាំងពីរគឺស៊ីរីនិងតួកគី ខំអត់ធ្មត់ចិត្តរៀងខ្លួន។

សេចក្តីរាយការណ៍របស់ នុយ ប៊ែរណាដែត

ស្តាប់ (02:53)

05/10/2012 by នុយ ប៊ែរណាដែត

ក្រោយពី ចរចាគ្នាអស់រយៈពេល២៤ម៉ោងមក ក្រុមប្រឹក្សាសន្តិសុខ បានចេញសេចក្តីថ្លែងការណ៍ ថ្កោលទោសក្នុងន័យដ៏ម៉ឺងម៉ាត់ ចំពោះការបាញ់ផ្លោងរបស់កងទ័ពស៊ីរីទៅលើភូមិ Akcakal ក្នុងទឹកដីតួកគី ដែលបានបណ្តាលឲ្យស្លាប់ជនស៊ីវិលតួកគី៥នាក់កាលពីថ្ងៃពុធ៣តុលាមុន។

ប្រទេសទាំង១៥សមាជិកក្រុមប្រឹក្សាសន្តិសុខ បានស្នើសុំឲ្យរដ្ឋាភិបាលស៊ីរី គោរពទាំងស្រុង “បូរណភាពនិងអធិបតេយ្យភាពដែនដីនៃបណ្តាប្រទេសជិតខាងខ្លួន"និង អំពាវនាវឲ្យស៊ីរីនិងតួកគី ខំអត់ធ្មត់ចិត្តរៀងខ្លួន។ ក្រោយពីមរណៈភាពនៃប្រជាជនស៊ីវិលខ្លួនក្រោមគ្រាប់ផ្លោងស៊ីរីមក ប្រទេសតួកគី បានវាយប្រហារតបស៊ីរីវិញកាលពីម្សិលមិញ ដោយបាញ់ផ្លោងទៅលើទីតាំងយោធាស៊ីរីនៅតាមបណ្តោយព្រំដែន។

ក្នុងន័យនេះ សមាជិកក្រុមប្រឹក្សាសន្តិសុខ បានយល់ស្របគ្នា អំពីផលវិបាកដ៏ធ្ងន់ធ្ងរនៃវិបត្តិស៊ីរីដែលជះឥទ្ធិពលទៅលើសន្តិសុខ នៃប្រទេសជិតខាងស៊ីរីក៏ព្រមទាំងស្ថិរភាពនិងសន្តិភាពនៅក្នុងតំបន់។ មិនតែប៉ុណ្ណោះ ក្រុមប្រឹក្សាសន្តិសុខ បានទាមទារ«ឲ្យបញ្ចប់ជាបន្ទាន់និងមិនឲ្យកើតមានជាថ្មីទៀតឡើយ ឧប្បត្តិហេតុបែបខាងលើនេះ។

មួយវិញទៀត ក្រុមប្រឹក្សាសន្តិសុខ អាចនឹងត្រូវអនុម័តនៅថ្ងៃសុក្រនេះ សេចក្តីថ្លែងការណ៍មួយ ដែលបរិហារអំពើភេរវកម្មនៅទីក្រុងអាឡិបប៉ែកខាងជើងស៊ីរីដែលបង្កឡើងកាលពីថ្ងៃពុធមុននិងបណ្តាលមនុស្សស្លាប់យ៉ាងតិច៤៨នាក់ក្នុងនោះភាគច្រើនជាយោធា-នេះបើយោងតាមក្រុមអ្នកការទូត។ សេចក្តីថ្លែងការណ៍នេះ- ដែលបានទាមទារដោយរបបដាម៉ាស ក៏ជាសម្បទានមួយរបស់រុស្ស៊ីដល់សម្ព័ន្ធមិត្តរបស់ខ្លួន គឺរបបលោក Bachar-al-Assad និងបានជួយដល់ការសម្រុះសម្រួលគ្នាមួយដែរ។

ចំណែកឯកអគ្គរដ្ឋទូតស៊ីរីប្រចាំអសប បានថ្លែងបញ្ជាក់ថា ទីក្រុងដាម៉ាស គ្មានចេតនា ស្វែងរកការបង្កហេតុណ៍ណាមួយ ជាមួយប្រទេសជិតខាងខ្លួនឡើយ រួមទាំងប្រទេស តួកគី។ ក៏ប៉ុន្តែ ឯកអគ្គរដ្ឋទូតស៊ីរី បដិសេធ ពុំព្រមសុំទោសតួគីឡើយនៅក្នុងការស្លាប់ប្រជាជនតួកគីកាលពីថ្ងៃពុធមុន ដោយគ្រាន់តែ សុំចូលរួមមរណៈទុក្ខជាមួយតួគីប៉ុណ្ណោះ ដោយ បានថ្លែងទៀតថា ស៊ីរីនឹងនៅតែបន្តការស៊ើបអង្កេតរបស់ខ្លួនតទៀតពាក់ព័ន្ធការបាញ់ផ្លោងរបស់តួកគីទៅលើទីតាំងយោធាស៊ីរី។

ប្រតិកម្មចំពោះ ឯកអគ្គរដ្ឋទូតស៊ីរី លោកនាយករដ្ឋមន្ត្រីតួកគី Recep Tayyip Erdogan ម្សិលមិញ បានថ្លែងតបតថា ប្រទេសតួគី ពុំដែលមាន ចេតនាក្នុងការ បង្កឲ្យផ្ទុះសង្គ្រាមជាមួយស៊ីរីម្តងណាឡើយ៕

tags: តួកគី