អង្គការសហប្រជាជាតិបន្ថែមទម្ងន់ទណ្ឌកម្មលើកូរ៉េខាងជើង
ក្រុមប្រឹក្សាសន្តិសុខអង្គការសហប្រជាជាតិ បានពង្រឹងទណ្ឌកម្មប្រឆាំងនឹងកូរ៉េខាងជើង ដែលទើបបាញ់បង្ហោះផ្កាយរណបមិនសម្រេច និងដែលប្រឆាំងមិនឱ្យក្រុមអធិការកិច្ចនៃទីភ្នាក់ងារថាមពលបរមាណូអន្តរជាតិ ទៅត្រួតពិនិត្យកម្មវិធីចម្រើនធាតុអ៊ុយរ៉ានីញ៉ូម។ មិនតែប៉ុណ្ណោះ សេចក្តីសម្រេចចិត្តមួយ ថ្កោលទោសយ៉ាងចាស់ដៃ ទង្វើរបស់កូរ៉េខាងជើង ត្រូវបានអនុម័តជាឯកច្ឆ័ន្ទ នៅល្ងាចថ្ងៃចន្ទម្សិលមិញ។
ចុះផ្សាយនៅថ្ងៃ៖
ស្តាប់ - ០១:២១
ចិនជាសម្ព័ន្ធមិត្តដ៏ស្និទ្ធតែមួយគត់របស់កូរ៉េខាងជើង ក៏បានអនុម័តរួមគ្នាជាឯកច្ឆន្ទ លើសេចក្តីសម្រេចចិត្តថ្កោលទោសរបស់ក្រុមប្រឹក្សាសន្តិសុខអង្គការសហប្រជាជាតិ ចំពោះទង្វើ បាញ់បង្ហោះកាំជ្រួច កាលពីថ្ងៃសុក្រទី ១៣មេសា របស់កូរ៉េខាងជើង និងការមិនទទួលស្វាគមន៍ភ្នាក់ងារថាមពលបរមាណូអន្តរជាតិ AIEA ឱ្យទៅត្រួតពិនិត្យកម្មវិធីចម្រើនធាតុអ៊ុយរ៉ានីញ៉ូម ថាជាការរំលោភយ៉ាងធ្ងន់ធ្ងរបំផុតលើសេចក្តីសម្រេចចិត្តលេខ១៧១៨ (២០០៦) និងលេខ ១៨៧៤ (២០០៩)។
សេចក្តីសម្រេចចិត្តនេះបានរំលឹកឡើងវិញ អំពីទណ្ឌកម្មដែលអង្គការសហប្រជាជាតិធ្លាប់បានដាក់លើរបបក្រុងព្យុងយ៉ាង កាលពីឆ្នាំ២០០៦ និង ២០០៩ និងសើរើវិធានការខ្លះ។ គណៈកម្មាធិការដាក់ទណ្ឌកម្មរបស់អង្គការសហប្រជាជាតិនឹងបំពេញ ព្រមទាំងបញ្ជាក់បន្ថែម បញ្ជីឈ្មោះមនុស្ស ក្រុមហ៊ុន កូរ៉េខាងជើង ដែលរកស៊ី ឬមានជាប់ពាក់ព័ន្ធនឹងឧស្សាហកម្មនុយក្លេអ៊ែរ ឬការជួញដូរអាវុធជាមួយព្យុងយ៉ាង ក្នុងបញ្ជីទណ្ឌកម្ម នៅ១៥ថ្ងៃខាងមុខនេះ។
កូរ៉េខាងជើង នឹងត្រូវទទួលរងផលវិបាក ធ្ងន់ធ្ងរខ្លាំងជាងពេលណាៗទាំងអស់ ព្រោះពេលនេះ សូម្បីតែចិនជាសម្ព័ន្ធមិត្តចាក់ទឹកមិនលិចរបស់ព្យុងយ៉ាង ក៏បានយល់ព្រម ជាមួយសហគមន៍អន្តរជាតិ គាំទ្រការដាក់ទណ្ឌកម្មថ្មីទៀតប្រឆាំងនឹងកូរ៉េខាងជើងដែរ ប្រសិនបើកូរ៉េខាងជើងហ៊ានបាញ់សាកល្បងកាំជ្រួច ឬមីស្ស៊ីល ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ