Delicious
Digg
Facebook
Twitter
Yahoo!
Technorati
រុស្ស៊ី-សីហនុ -
អត្ថបទចុះផ្សាយនៅថ្ងៃ ចន្ទ 15 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ ចន្ទ 15 តុលា 2012
សម្តេចនរោត្តមសីហនុទ្រង់បានមកកាន់ម៉ូស្គូលើកចុងក្រោយ កាលពី៤២ឆ្នាំមុន
ព្រះបាទសម្តេច នរោត្តម សីហនុ ក្នុងពិធីបុណ្យព្រះពុទ្ធសាសនាមួយនៅថ្ងៃទី១២ធ្នូ២០០២ នៅភ្នំពេញ
AFP PHOTO/Chhoy PISEI
ព្រះអង្គទ្រង់បាន បំពេញទស្សនកិច្ចកាលណោះនៅម៉ូស្គូ ក្នុងឋានៈជា ប្រមុខរដ្ឋកម្ពុជា ដើម្បីសុំថ្នាក់ដឹកនាំសូវៀត ឲ្យជះឥទ្ធិពលទៅលើទីក្រុងហាណូយ ឲ្យដក កងទ័ពវៀតកុង ចេញពីតំបន់ព្រំដែនខាងកើត នៃប្រទេសកម្ពុជា នៅតាមបណ្តោយ ជាប់នឹង វៀតណាម ដ្បិតវត្តមានទ័ពវៀតកុងនេះ បានបណ្តាលឲ្យ ស្ថានការណ័នៅកម្ពុជាពេលនោះ រំជើបរំជួល វឹកវរខ្លាំងមែនទែន។
ទស្សនកិច្ចសម្តេចរោត្តមសីហនុ បានប្រព្រឹត្តទៅ ពីថ្ងៃ ១៦ ដល់១៨មីនា ឆ្នាំ១៩៧០ ដោយថ្ងៃទី១៧មីនា ព្រះអង្គទ្រង់បាន ធ្វើកិច្ចចរចានៅវិមានក្រេមឡាំង ជាមួយ ប្រមុខរដ្ឋសូវៀត កាលណោះ គឺ លោក Nikolai Podgornyi និងថ្នាក់ដឹកនាំសូវៀតមួយចំនួនទៀត។ កម្មវត្ថុនៃកិច្ចចរចាកាលណោះ គឺព្រះអង្គ បានសុំថ្នាក់ដឹកនាំសូវៀត ឲ្យជះឥទ្ធិពលទៅលើ ថ្នាក់ដឹកនាំក្រុងហាណូយ ឲ្យដកកងទ័ព នៃចលនាតស៊ូរំដោះជាតិវៀតណាមខាងត្បូង ហៅថា វៀតកុង ចេញពីមូលដ្ឋានគេ នៅតាមតំបន់ព្រំដែនកម្ពុជាទៅ។
ថ្ងៃបន្ទាប់មកគឺថ្ងៃ១៨មីនា ពេលជួបជាមួយបណ្តានិស្សិតខ្មែរ នៅឯស្ថានទូតកម្ពុជាក្នុងក្រុងម៉ូស្គូ ព្រះអង្គ ទ្រង់បានសំដែង ការខកព្រះហឫទ័យថា ក្រោយពីឮសំណូមពរព្រះអង្គ ថ្នាក់ដឹកនាំ សូវៀតបែរទៅ ជាចោលភ្នែកសម្លឹងមើលមុខគ្នា ភ្លឹះៗទៅវិញដោយគ្មានចម្លើយអ្វីណា ជាក់ច្បាស់សោះ។
គឺថ្ងៃ១៨មីនានោះឯង ដែលនៅក្រុងភ្នំពេញ ព្រឹត្តិការណ៍ បានបោកកញ្ជ្រោកដល់កម្រិត លុះទាល់តែ រដ្ឋសភាបានបោះឆ្នោត ទម្លាក់ព្រះអង្គចេញពីតំណែងជាប្រមុខរដ្ឋ។ ប៉ុន្តែ ដំណឹងនេះ ត្រូវបាន ទម្លាយជម្រាបព្រះអង្គ គឺដោយនាយករដ្ឋមន្ត្រីសូវៀតកាលណោះ លោក Aleksei Kossyguine ពេលជិះក្នុងរថយន្តតែមួយជាមួយព្រះអង្គ តាមផ្លូវទៅកាន់អាកាសយានដ្ឋាន Vnoukovoជាអាកាសយានដ្ឋានពិសេសសម្រាប់ទទួលនិងជូនដំណើរប្រមុខរដ្ឋបរទេស។
នៅអាកាសយានដ្ឋាននោះ ពួកនិស្សិតខ្មែរ ដែលបានជូនដំណើរព្រះអង្គ បានដឹងឮ អំពី ដំណឹងនេះ គឺតាមការដំណាលរបស់ព្រះអង្គផ្ទាល់ ទាំងទឹកមុខស្រងូតស្រងាត់ថា ព្រះអង្គ ទើបត្រូវបាន ពួកក្បត់ ធ្វើ រដ្ឋប្រហារម្លាក់អង្គ។
ហើយមុននឹងបន្តដំណើរទៅកាន់ក្រុងប៉េកាំង សម្តេចនរោត្តមសីហនុ បានអំពាវនាវ និស្សិត ឲ្យសាមគ្គីគ្នា ក្នុងបុព្វហេតុសង្គ្រោះជាតិ ដោយព្រះអង្គនឹងដឹកនាំការតស៊ូ ពីទីក្រុងប៉េកាំងតែម្តង ដើម្បីផ្តួលរំលំ របបក្បត់ជាតិ លន់ណុល ឲ្យទាល់តែបាន៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ