នាយករដ្ឋមន្ត្រី ប្រកាសបន្តពិភាក្សាលើសេចក្តីព្រាងច្បាប់អង្គការ
នៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានប្រកាសទុកលទ្ធភាព៣ ទៅ ៤ ឆ្នាំទៀត ដើម្បីឲ្យក្រសួងមហាផ្ទៃ និងសង្គមស៊ីវិល ជជែកគ្នាបន្តលើសេចក្តីព្រាងច្បាប់ ស្តីពី សមាគម និងអង្គការមិនមែនរដ្ឋាភិបាល ឬហៅថា ច្បាប់អង្គការ។ តាមលោកនាយករដ្ឋមន្ត្រី រដ្ឋាភិបាល មិនប្រញាប់ប្រញាល់ ក្នុងការអនុម័តពង្រាងច្បាប់ដ៏ចម្រូងចម្រាសនោះទេ។ សង្គមស៊ីវិល បានសាទរ និងស្វាគមន៍ចំពោះការបន្ទន់ជំហររបស់រដ្ឋាភិបាលដូច្នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅវិទ្យាស្ថាន វ៉ាន់ដា ព្រឹកថ្ងៃទី២៨ធ្នូ ឆ្នាំ២០១១ លោកនាយករដ្ឋមន្ត្រី ហ៊ុនសែន បានប្រកាសថា ពង្រាងច្បាប់សមាគម និងអង្គការមិនមែនរដ្ឋាភិបាល ដែលមិនទាន់ចុះសម្រុង គឺសង្គមស៊ីវិល និងក្រសួងមហាផ្ទៃ អាចជួបជជែកគ្នា ចាប់ពីពេលនេះ រហូតដល់ឆ្នាំ២០១៤ រហូតដល់មានការស្រុះស្រួលគ្នារវាងសង្គមស៊ីវិល និងក្រសួងមហាផ្ទៃ។ លោកនាយករដ្ឋមន្ត្រី បញ្ជាក់ថា រដ្ឋាភិបាលមិនប្រញាប់ប្រញាល់ឲ្យចេញច្បាប់នោះទេ។
ជាមួយគ្នានោះលោកនាយករដ្ឋមន្ត្រី ហ៊ុន សែន ក៏បានលើកឡើងពីសារៈសំខាន់របស់សង្គមស៊ីវិល ដែលជាផ្នែកមួយដ៏សំខាន់នៃការអភិវឌ្ឍន៍ប្រទេសកម្ពុជា។ រដ្ឋាភិបាលក៏បានយល់ដឹងច្បាស់អំពីភាពចាំបាច់នៃភាពជាដៃគូ ដែលមិនអាចខ្វះបានរបស់សង្គមស៊ីវិល ជាមួយរដ្ឋាភិបាលផងដែរ។
ក៏ប៉ុន្តែលោកនាយករដ្ឋមន្ត្រី បានបញ្ជាក់ថា ច្បាប់អង្គការនោះ ត្រូវឲ្យស្រប និងទទួលយកបានទាំងអស់គ្នា ដើម្បីបង្កលក្ខណៈ កុំឲ្យរាំងស្ទះដល់ដំណើរការណាមួយរបស់សង្គមស៊ីវិល ដែលកំពុងធ្វើសកម្មភាពនៅកម្ពុជាសព្វថ្ងៃ។ តាមលោកនាយករដ្ឋមន្ត្រី ពង្រាងច្បាប់អង្គការនោះ មិនមែនធ្វើឡើង ដើម្បីគាបសង្កត់ទៅលើអង្គការសង្គមស៊ីវិលណាមួយទេ។
ដោយបញ្ជាក់ថា កម្ពុជាត្រូវតែមានច្បាប់អង្គការជាចាំបាច់ លោកនាយករដ្ឋមន្ត្រី ក៏បានអំពាវនាវឲ្យសង្គមស៊ីវិល និងក្រសួងមហាផ្ទៃ ត្រូវខិតខំស្វែងរករូបមន្តណា ដើម្បីធ្វើឲ្យច្បាប់នោះ ចេញទៅបម្រើដល់ភាពស្របច្បាប់ និងសកម្មភាពទាំងឡាយរបស់សង្គមស៊ីវិល ហើយឲ្យសង្គមស៊ីវិលនោះ អាចទទួលបាននូវផលប្រយោជន៍។
ការលើកឡើងដូច្នេះ ទទួលបានការស្វាគមន៍ភ្លាមៗពីសកម្មជនសិទ្ធិមនុស្ស។ លោក អំសំអាត អ្នកគ្រប់គ្រងបច្ចេកទេស ឃ្លាំមើលសិទ្ធិមនុស្ស របស់អង្គការលីកាដូ បានសម្តែងការស្វាគមន៍ និងគាំទ្រជំហររបស់ប្រមុខរដ្ឋាភិបាល ហើយថា ការបើកទូលាយឲ្យមានកិច្ចពិភាក្សាបន្តនោះ នឹងមានច្បាប់មួយដែលស្របតាមស្តង់ដារអន្តរជាតិ ដែលអាចការពារ និងសម្រួលដល់ការងាររបស់សង្គមស៊ីវិល។
ក្រៅពីស្វាគមន៍នូវជំហររបស់លោកនាយករដ្ឋមន្ត្រី ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានចង់ឲ្យមានវប្បធម៌ជជែកគ្នា មិនមែនសម្រាប់តែច្បាប់អង្គការនេះទេ តែត្រូវមានការជជែកលើច្បាប់ដទៃៗ ដើម្បីឲ្យសង្គមស៊ីវិល អាចជូនយោបល់ទៅក្រសួងពាក់ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ