លោកNawaz Sharifទទួលជ័យជំនះជាប្រវត្តិសាស្ត្រនៅក្នុងការបោះឆ្នោតសភា
ការបោះឆ្នោតសភានៅប្រទេសប៉ាគីស្ថានកាលពីថ្ងៃអាទិត្យម្សិលមិញត្រូវប្រព្រឹត្តទៅនៅក្នុងភាពតានដ៏តានតឹង ដោយសារតែមានការវាយប្រហារពីសំណាក់ពួកឧទ្ទាមតាលីបង់ដែលបណ្តាលឲ្យមនុស្សស្លាប់យ៉ាងតិច២៦នាក់។ ទោះជាយ៉ាងនេះក្តី ក៏អត្រានៃអ្នកចូលរួមបោះឆ្នោតមានចំនួនយ៉ាងច្រើនរហូតដល់ ៦០% គឺជាអត្រាដ៏ខ្ពស់បំផុតចាប់តាំងពីឆ្នាំ១៩៧៧មក។ នៅថ្ងៃអាទិត្យនេះ ខណៈដែលការរើរាប់សន្លឹកឆ្នោតនៅតែបន្ត អតីតនាយករដ្ឋមន្ត្រីប៉ាគីស្ថាន លោក Nawaz Sharif បានប្រកាសថាគណបក្សសម្ព័ន្ធអ៊ីស្លាមរបស់លោកដណ្តើមបានជ័យជំនះដ៏ធំធេងនៅក្នុងការបោះឆ្នោតសភានេះ។
ចុះផ្សាយនៅថ្ងៃ៖
ស្តាប់ - ០២:៤៤
យោងតាមលទ្ធផលជាបឋមនៃការបោះឆ្នោតសភាប៉ាគីស្ថាន កាលពីម្សិលមិញ គណបក្សសម្ព័ន្ធអ៊ីស្លាមរបស់ អតីតនាយករដ្ឋមន្ត្រី Nawaz Sharif ដែលជាគណបក្សប្រឆាំងដ៏ចំបងតាំងពី៥ឆ្នាំមក ជាអ្នកទទួលបានជ័យជំនះដោយ ដណ្តើមបានអសនៈជាង១១០ នៅក្នុងរដ្ឋសភាជាតិ ដែលមានសរុប២៧២អសនៈ។
គណបក្សចលនាដើម្បីយុត្តិធម៌(PTI)របស់ អតីតតារាខាង កីឡា Cricket Imran khan បានទទួលស្គាល់បរាជ័យខ្លួន ដោយ បានតែ៣៤អសនៈ និងស្ថិតនៅលេខរៀងទីពីរ។ ចំណែកគណបក្សប្រជាជនប៉ាគីស្ថាន(PPP) របស់លោកប្រធានាធិតី Asif Ali Zardari ដែលជាបក្សកាន់អំណាចនៅក្នុងប្រទេសតាំងពីឆ្នាំ២០០៨មក ត្រូវទទួលបរាជ័យដ៏សែនជូចត់។ បរាជ័យដោយសារតែគណបក្សកាន់អំណាចនេះ ត្រូវបានមតិសាធារណៈចោទប្រកាន់យ៉ាងច្រើននៅក្នុងការប្រព្រឹត្តអំពើពុករលួយ។
យ៉ាងណាមិញ ជ័យជំនះដ៏ធំធេងនៅក្នុងការបោះឆ្នោតសភាកាលពីម្សិលមិញរបស់លោក Nawaz Sharif ដែលគេឲ្យឈ្មោះក្រៅថា ”« សិង្ហនៅ Pendjab »នឹងអនុញ្ញាតឲ្យលោក ក្លាយជានាយករដ្ឋមន្ត្រីជាលើកទី៣នៅក្នុងប្រវត្តិសាស្ត្រប្រទេសប៉ាគីស្ថាន។ លោក NAWAZ SHARIF ដែលមានឥទ្ធិពលរឹងមាំដូចដែកថែប ត្រូវបានគេចាត់ទុកថា ជាអ្នកគ្រប់គ្រងរដ្ឋ ដ៏ប្រសើរមួយរូបនិងមានជំហរ បើកចំហរក្នុងកិច្ចចរចានានាជាមួយពួកឧទ្ទាមតាលីបង់។
ធ្លាក់ពីអំណាច ដោយរដ្ឋប្រហារយោធានៅក្នុងឆ្នាំ១៩៩៩ លោក Nawaz Sharif,ក្នុងអាយុ៦៣ឆ្នាំ បានផ្តើមកសាងខ្លួនឡើងវិញប្រកបដោយចិត្តអំណត់អត់ធន់ នៅក្នុងជួរគណបក្សប្រឆាំង មុននឹងលោក ដណ្តើមបានឡើងវិញ ជ័យជំនះដ៏ធំធេងនៅក្នុងការបោះឆ្នោតនេះ។ ជ័យជំនះដែលលោកបានទទួលការគាំទ្រខ្លាំងជាអាទិ៍នៅក្នុងតំបន់កាន់កាប់របស់លោកនៅ Pendjab ដែលជាខេត្តមួយសម្បូរណ៍រុងរឿងនិងក៏មានប្រជាជនច្រើនជាងគេបំផុតនៅក្នុងប្រទេស។
ធ្លាប់ធ្វើជានាយករដ្ឋមន្ត្រីប៉ាគីស្ថានពីរលើក ពីឆ្នាំ១៩៩០ រហូតដល់១៩៩៣ បន្ទាប់មកពីឆ្នាំ ១៩៩៧ ដល់ឆ្នាំ ១៩៩៩ លោក Nawaz Sharif ក៏ពុំមានអ្វីជាពិសេសបញ្ជាក់ពីរូបគាត់ទេ ក៏ប៉ុន្តែលោកអាងទៅលើ បទពិសោធន៍ដ៏ឧត្តុង្គឧត្តមរបស់លោកដែលធ្លាប់ដឹកនាំប្រទេសពីពេលមុន។
ម្យ៉ាងទៀត លោក Nawaz Sharif ត្រូវបានប្រទេសលោកខាងលិច ចាត់ទុកជាអ្នកនយោបាយប្រាកដនិយម ទោះបីជាលោក ធ្លាប់បានធ្វើសេចក្តីថ្លែងការណ៍នានា ប្រទូស្តរាយនឹងសង្គ្រាមប្រឆាំងទល់នឹងពួកតាលីបង់ដែលដឹកមុខដោយអាមេរិកនៅក្នុងតំបន់ក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ