NGOព្រួយបារម្ភចំពោះជម្លោះរវាងសហចៅក្រមស៊ើបអង្កេតជាតិនិងអន្តរជាតិ
គណៈកម្មាធិការប្រព្រឹត្តិកម្ម បានធ្វើសេចក្តីថ្លែងការណ៍ជំរុញអោយរដ្ឋាភិបាលកម្ពុជាប្រញាប់តែងតាំងសហចៅក្រមស៊ើបអង្កេតអន្តរជាតិ។ អង្គការក្រៅរដ្ឋាភិបាលក៏បានអំពាវនាវអោយអង្គការសហប្រជាជាតិដាក់សម្ពាធលើរដ្ឋាភិបាលកម្ពុជាចំពោះការចោទប្រកាន់អំពីការពាក់ព័ន្ធផ្នែកនយោបាយចូលទៅក្នុងដំណើរការសាលាក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ក្រុមអង្គការក្រៅរដ្ឋាភិបាលធំៗ ដែលជាអ្នកតាមដានដំណើរការសាលាក្តីខ្មែរក្រហម បានសម្តែងការព្រួយបារម្ភចំពោះបញ្ហារបស់សាលាក្តីបច្ចុប្បន្ន ដែលទាក់ទងនឹងការតែងតាំងសហចៅក្រមស៊ើបអង្កេតអន្តរជាតិ។
គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជាដែលជាបណ្តុំអង្គការក្រៅរដ្ឋាភិបាលចំនួន២៣ស្ថាប័នបានធ្វើសេចក្តីថ្លែងការណ៍កាលពីថ្ងៃទី១៩មករា ជំរុញរដ្ឋាភិបាលឲ្យអនុវត្តកាតព្វកិច្ចដោយយុត្តិធម៌និងឯករាជ្យក្នុងការតែងតាំងសហចៅក្រមស៊ើបអង្កេតអន្តរជាតិជាបន្ទាន់។
នៅក្នុងសេចក្តីថ្លែងការណ៍របស់ខ្លួន ក្រុមអង្គការសង្គមស៊ីវិលបាននិយាយចំៗតែម្តងលើសំណុំរឿងតែងតាំងសហចៅក្រមស៊ើបអង្កេតអន្តរជាតិនេះដោយយោងទៅលើបទបញ្ជាផ្ទៃក្នុងរបស់សាលាក្តីខ្មែរក្រហមនេះផង។ ក្រុមសង្គមស៊ីវិលសរសេរថាអង្គការសហប្រជាជាតិដែលបានស្នើបេក្ខភាពសហចៅក្រមស៊ើបអង្កេតបម្រុងអន្តរជាតិហើយនោះ ត្រូវទទួលការតែងតាំងជាសហចៅក្រមស៊ើបអង្កេតអន្តរជាតិពេញសិទ្ធិនៅក្នុងសាលាក្តីខ្មែរក្រហមនេះ។
ទាក់ទងនឹងនីតិវិធីនៃការតែងតាំងសហចៅក្រមស៊ើបអង្កេតអន្តរជាតិដែលមានការចោទប្រកាន់ថាមានការពន្យារពេលអោយយូរនេះ គណៈកម្មាធិការប្រព្រឹត្តិកម្មក៏បានអំពាវនាវអោយសហចៅក្រមស៊ើបអង្កេតជាតិលោកយូ ប៊ុនឡេងចុះចេញសមាជិកភាពជាសមាជិកនៅក្នុងឧត្តមក្រុមប្រឹក្សានៃអង្គចៅក្រមដើម្បីចៀសវាងទំនាស់ផលប្រយោជន៍។ គួរបញ្ជាក់ថា លោកចៅក្រមយូ ប៊ុនឡេងមានតួនាទីមួយជាប្រធានសាលាឧទ្ធរណ៍។ ហើយប្រធានសាលាឧទ្ធរណ៍គឺសមាជិកមួយរូបនៅក្នុងឧត្តមក្រុមប្រឹក្សានៃអង្គចៅក្រមដែលត្រូវសម្រេចយល់ព្រម ឬបដិសេធសមាសភាពនៃចៅក្រមនៅសាលាក្តីខ្មែរក្រហមនោះ។
តាំងពីមានការចោទប្រកាន់ថា ឧត្តមក្រុមប្រឹក្សានៃអង្គចៅក្រមបដិសេធមិនតែងតាំងលោក Laurent Kasper Ansermet នោះមក រហូតដល់ពេលនេះ គេនៅមិនទាន់ដឹងសេចក្តីសម្រេចផ្លូវការរបស់ស្ថាប័ននេះនៅឡើយទេ។ កាសែតក្នុងស្រុកគ្រាន់តែបានផ្សាយឲ្យដឹងនៅថ្ងៃនេះ ដោយដកស្រង់ប្រសាសន៍លោករដ្ឋមន្ត្រីក្រសួងយុត្តិធម៌ថា សេចក្តីសម្រេចរបស់ឧត្តមក្រុមប្រឹក្សានៃអង្គចៅក្រមត្រូវបានផ្ញើទៅរដ្ឋាភិបាលហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ