ការដោះលែងព្រះសង្ឃ Gambira
អាជ្ញាធរភូមាបន្ទាប់ពីបានឃុំខ្លួនព្រះសង្ឃដ៏ល្បីឈ្មោះGambiraអស់មួយថ្ងៃម្សិលមិញមក បានដោះលែងវិញប៉ុន្មានម៉ោងប៉ុណ្ណោះក្រោយពីមានការប្រឆាំងពីសំណាក់ទីក្រុងវ៉ាស៊ីនតោន។យោងតាមអាជ្ញាធរភូមា ការចាប់ខ្លួនសង្ឃ Gambira ចេញពីទីវត្តអារាមនៅម្សិលមិញនេះ គឺដើម្បីអនុញ្ញាតឲ្យ អាជ្ញាធរ អាចសាកសួរចម្លើយពីបទដែលសង្ឃអង្គនេះ ហ៊ានចូលទាំងបំពានទៅកម្ទេចសោទ្វារនៃវត្តអារាមចំនួន៣ដែល អាជ្ញាធរបានបិទទ្វារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
យោងតាមមន្ត្រីទទួលខុសត្រូវម្នាក់របស់ភូមា ការចាប់ខ្លួន សង្ឃ Gambira ដោយហេតុមកពីសង្ឃអង្គនេះ បានបំពានច្បាប់ដោយ បានចូលលុកលុយក្នុងទីវត្តអារាមចំនួន៣ដែលអាជ្ញាធរភូមាបានបិទទ្វារបន្ទាប់ពីចលនាបដិវត្តន៍លឿងទុំនៅឆ្នាំ ២០០៧។ ប៉ុន្តែ បន្ទាប់ពីបានសាកសួរចម្លើយពីសំណាក់អាជ្ញាធរនិងការជួយណែនាំពីមេគណរបស់ខ្លួនមក សង្ឃ Gambira ក៏ត្រូវបានគេដោះលែងឲ្យមានសេរីភាពវិញដែរ កាលពីយប់ថ្ងៃសុក្រម្សិលមិញ។នេះជាការអះអាងបញ្ជាក់របស់មន្រ្តីភូមា។
ការដោះលែងនេះ បានធ្វើឡើងតែប៉ុន្មានម៉ោងប៉ុណ្ណោះបន្ទាប់ពីទីក្រុងវ៉ាស៊ីនតោនបានបញ្ចេញប្រតិកម្មយ៉ាងក្លៀវក្លា ទាមទារ ឲ្យរដ្ឋាភិបាលស៊ីវិលភូមាដោះលែងជាបន្ទាន់និងដោយគ្មានលក្ខខណ្ឌសង្ឃ Gambira និងឲ្យធ្វើការពន្យល់បំភ្លឺដែរ ពីមូលហេតុពិតប្រាកដនៃការចាប់ខ្លួននេះ -នេះជាសេចក្តីថ្លែងរបស់លោកស្រី Victoria Nulandអ្នកនាំពាក្យនៃក្រសួងការបរទេសអាមេរិក ។
លោកស្រី Victoria Nuland បានបន្ថែមទៀតថា៖ « ដោយយោងទៅលើសេចក្តីថ្លែងការណ៍ នានា របស់រដ្ឋាភិបាលថ្មីភូមាដែលបានសន្យាថា នឹងធ្វើកំណែទម្រង់នៅក្នុងប្រទេសឲ្យបានស៊ីជម្រៅ ក៏ព្រមទាំងជំរុញ ដំណើរប្រជាធិបតេយ្យូបនីយកម្មនោះ សហរដ្ឋអាមេរិក អំពាវនាវឲ្យភូមារក្សា ការពារសិទ្ធិសេរីភាពជាមូលដ្ឋាន របស់ពលរដ្ឋខ្លួនជាទូទៅដែរ »។
គួររំលឹកថា ព្រះសង្ឃ Gambira ត្រូវបានរបបសឹកកាន់អំណាចនៅភូមាចាប់ខ្លួននិងផ្តន្ទាទោសដាក់ ពន្ធនាគារចំនួន៦៨ឆ្នាំពីបទបានដើរតួនាទីដ៏សំខាន់នៅក្នុងការ ដឹកនាំចលនាបដិវត្តន៍លឿងទុំដែលជាមហាបាតុកម្មរបស់ព្រះសង្ឃភូមានៅ ឆ្នាំ២០០៧។
ម្យ៉ាងទៀតការចាប់ខ្លួនសង្ឃ Gambira ម្សិលមិញក៏បានប្រព្រឹត្តទៅ នៅខណៈដែលរបបថ្មីភូមាបង្កើនកាយវិការបើកចំហ របស់ខ្លួនចាប់តាំងពីច្រើនខែកន្លងមកហើយ ក្នុងគោលដៅដើម្បី កុំឲ្យប្រទេសភូមា ស្ថិតនៅតែលតោលឯកា តទៅមុខទៀត។
របបសឹកភូមាបានរំលាយខ្លួនឯង និងផ្ទេរអំណាចរបស់ខ្លួនទៅឲ្យរដ្ឋាភិបាលថ្មីមួយនៅឆ្នាំ២០១១ដែលខ្លួនហៅថាជារដ្ឋាភិបាលស៊ីវិល ក៏ប៉ុន្តែនៅតែកាន់កាប់ដោយអតីតមេទាហានភូមាដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ