កម្ពុជា -

អត្ថបទចុះផ្សាយនៅថ្ងៃ សុក្រ 03 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 03 សីហា 2012

លោកស្រី មូរ សុខហួរ ទទួលបាននីតិសម្បទាតំណាងរាស្ត្រវិញ

លោកស្រី មូរ សុខហួរ នៅមុខតុលាការឧទ្ធរណ៍ ថ្ងៃទី ៣ សីហា ២០១២

ដោយ លាង ដឺលុច

ព្រឹកថ្ងៃសុក្រទី៣សីហានេះសភាស៊ើបសួររបស់សាលាឧទ្ធរណ៍បានសម្រេចផ្តល់នីតិសម្បទារជូនលោកស្រីមួរសុខហួរវិញហើយ។ ប៉ុន្តែលោកស្រីត្រូវរង់ចាំរយៈពេលមួយខែទៀត តាមនីតិវិធីដើម្បីរង់ចាំថា តើអាចមានបណ្តឹងជំទាស់នឹងសេចក្តីសម្រេចរបស់សភាស៊ើបសួរនេះ។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:35)

03/08/2012

សភាស៊ើបសួរនៃសាលាឧទ្ធរណ៍បានសម្រេចផ្តល់និតិសម្បទាជូនលោកស្រីមូរ សុខហួរ អ្នកតំណាងរាស្ត្រគណបក្សសម រង្ស៊ីវិញហើយនៅព្រឹកថ្ងៃសុក្រទី៣សីហានេះ។ នីតិសម្បទានេះហើយដែលបើកផ្លូវអោយរដ្ឋសភាប្រគល់អភ័យឯកសិទ្ធិសភាជូនលោកស្រីតំណាងរាស្ត្រគណបក្សប្រឆាំងរូបនេះ។ ក៏ប៉ុន្តែ យោងតាមនីតិវិធី លោកស្រីត្រូវរង់ចាំរយៈមួយខែទៀត ដើម្បីរង់ចាំមើលថា តើមានបណ្តឹងជំទាស់ឬយ៉ាងណា។ ប្រសិនបើគ្មានបណ្តឹងទេ សេចក្តីសម្រេចផ្តល់នីតិសម្បទានេះនឹងចូលជាស្ថាពរ ហើយលោកស្រីនឹងទទួលបានអភ័យឯកសិទ្ធិសភាវិញ។

លោកស្រី មូរ សុខហួរ បន្ទាប់ពីត្រូវបានប្តឹងដោយលោកនាយករដ្ឋមន្ត្រីហ៊ុន សែនកាលឆ្នាំ២០០៩ហើយនោះត្រូវបានតុលាការអនុវត្តនីតិវិធីស្នើសុំព្យួរអភ័យឯកសិទ្ធិសភាដើម្បីចាត់ការតាមបណ្តឹងរបស់លោកនាយករដ្ឋមន្ត្រី។

ក្រោយពីបានស្តាប់សវនាការនៅព្រឹកថ្ងៃសុក្រនេះ លោកស្រីមួរ សុខហួរបានអះអាងថា លោកស្រីអាចទទួលយកការសម្រេចរបស់សភាស៊ើបសួរនេះ។ អ្នកតំណាងរាស្ត្របក្សប្រឆាំងរូបនេះបានឲ្យដឹងថា លោកស្រីបានទន្ទឹងរង់ចាំនីតិសម្បទានេះរយៈពេលជិត៣ឆ្នាំមកហើយ។ សមាជិកជាន់ខ្ពស់គណបក្សសម រង្ស៊ីដដែលបានបញ្ជាក់ប្រាប់អ្នកកាសែតថា បើទោះបីជាគ្មានអភ័យឯកសិទ្ធិ និងបាត់បង់នីតិសម្បទាដោយសារតែតុលាការបានកាត់ក្តីឲ្យចាញ់លោកនាយក រដ្ឋមន្ត្រីក៏ដោយ ក៏លោកស្រីបានបំពេញកិច្ចការក្នុងឋានៈជាអ្នកតំណាងរាស្ត្រដដែល។

គួររម្លឹកថា លោកស្រីបានចាញ់ក្តីលោកនាយករដ្ឋមន្ត្រី ហើយតុលាការបាន ឲ្យលោកស្រីបង់ប្រាក់ជំងឺចិត្ត និងប្រាក់ពិន័យសរុប ១៦,៥ លានរៀល។ រដ្ឋសភាបានកាត់ប្រាក់ខែលោកស្រីមួរ សុខហួរដើម្បីបង់ជូនដើមបណ្តឹង និងបានបង់ទៅអោយរដ្ឋតាមការទាមទាររបស់តុលាការ៕