រុស្ស៊ី-អ៊ីរ៉ង់ -

អត្ថបទចុះផ្សាយនៅថ្ងៃ សុក្រ 10 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 10 សីហា 2012

ទីក្រុងម៉ូស្គូកំញើញឈប់គាំទ្រដល់កម្មវិធីនុយក្លេអ៊ែររបស់អ៊ីរ៉ង់

ដោយ កែវ ឆាយា

ឈប់គាំទ្រនេះ ប្រសិនបើអ៊ីរ៉ង់នៅតែពុំព្រមដកទៅវិញទេពាក្យប្តឹងទៅ “តុលាការមជ្ឈត្តវិនិច្ឆ័យ” ( Cour d’arbitrage ) នៅក្រុង ហ្សឺណែវ ទល់នឹងរុស្ស៊ី ឲ្យរុស្ស៊ីសងជម្ងឺចិត្តអ៊ីរ៉ង់ក្នុងទឹកប្រាក់ដល់ទៅ ៤.០០០លានដុល្លារអាមេរិកចំពោះការដែលទីក្រុងម៉ូស្គូ ដោយបំពេញតាមសេចក្តីសម្រេច របស់ក្រុមប្រឹក្សាសន្តិសុខអ.ស.ប. ប្រកែកមិនលក់ទៅឲ្យអ៊ីរ៉ង់នូវប្រព័ន្ធមីស្ស៊ីលការពារដែនអាកាសធុន S-300 តែក្នុងតម្លៃ ៨០០លានដុល្លារប៉ុណ្ណោះ។

សេចក្តីរាយការណ៍របស់ កែវ ឆាយា

ស្តាប់ (02:48)

10/08/2012 by កែវ ឆាយា

ដំណឹងនេះ ទើបចុះផ្សាយដោយកាសែតដ៏ហំហួននៃក្រុងម៉ូស្គូ ឈ្មោះ Kommersant យោងទៅលើប្រភពក្នុងរដ្ឋាភិបាលរុស្ស៊ី ដែលហៅពួកអ៊ីរ៉ង់ ថាជាពួក”អកតញ្ញូ” ពីព្រោះពួកគេ មិនចេះឲ្យតម្លៃដល់ការខិតខំរបស់ម៉ូស្គូ ការពារយ៉ាងខ្ជាប់ខ្ជួន មហិច្ឆិតានុយក្លេអ៊ែររបស់អ៊ីរ៉ង់។ រួចឥឡូវ ដោយមកពីកាយវិការ”មិនល្អមើល” របស់អាជ្ញាធរអ៊ីរ៉ង់ដែលបានដាក់ពាក្យប្តឹងទល់នឹងរុស្ស៊ី ហើយប្រកែកពុំព្រមដកពាក្យប្តឹងនោះទៅវិញ ម៉ូស្គូនឹងមួលខ្ចៅបន្តឹងគោលជំហរខ្លួន ដោយចម្លងរឿងដែលមាន ចេញពីផ្ទៃតុលាការទៅក្នុងផ្ទៃនយោបាយតែម្តង។

ប្រភពក្នុងរដ្ឋាភិបាលរុស្ស៊ី ក៏បង្ហើបឲ្យកាសែត Kommersant ដឹងថា ៖ទៅទល់កិច្ចប្រជុំមួយលើកថ្មី នៃ ៦អន្តរការីអន្តរជាតិទទួលបន្ទុកខាងបញ្ហានុយក្លេអ៊ែរអ៊ីរ៉ង ពោលគឺ ៥ប្រទេស សមាជិកអចិន្ត្រៃយនៃក្រុមប្រឹក្សាសន្តិសុខអ.ស.ប. និងអាល្លឺម៉ង់ដែលតំណាងឲ្យសហភាពអឺរ៉ុប ដែលនឹងធ្វើនៅម៉ូស្គូចុងខែសីហានេះ គណៈប្រតិភូរដ្ឋាភិបាលរុស្ស៊ី នឹងសាកល្បងបញ្ចុះបញ្ចូលអ៊ីរ៉ង់ ឲ្យដកពាក្យបណ្តឹងនោះទៅវិញទៅ ពុំនោះសោតទេ អ៊ីរ៉ង់នឹងដោះស្រាយបញ្ហានុយក្លេអ៊ែររបស់ខ្លួនលើឆាកអន្តរជាតិ គឺតែដោយម្ចាស់ការខ្លួនឯងទៅ។

រីឯប្រភពក្នុងក្រសួងការបរទេសរុស្ស៊ី ខ្សឹបប្រាប់កាសែតនេះថា ពួកអ្នកការទូតរុស្ស៊ី បានទទួលបទបញ្ជាឲ្យនាកិច្ចចរចាជាមួយភាគីអ៊ីរ៉ង់ប្រកាន់ខ្ជាប់នូវបន្ទាត់ខាងលើ។
ចំណែកប្រភពក្នុងវិមានក្រេមឡាំង បានថ្លែងថា ៖ “ម៉ូស្គូ នៅតែសង្ឃឹម និយាយឲ្យបានត្រូវគ្នាជាមួយក្រុងតេហេរ៉ង់ក្នុងស្មារតី ”យល់យោគគ្នា និង នៅក្រៅផ្លូវតុលាការ”។

ដូចគេដឹងស្រាប់ ម៉ូស្គូតែងចេញមុខប្រឆាំងនឹងការបន្តឹងទណ្ឌកម្មថែមទៀតទល់នឹងអ៊ីរ៉ង់ហើយ រមែងស្ថិតនៅខាងធ្វើដំណោះស្រាយកម្មវិធីនុយក្លេអ៊ែរអ៊ីរ៉ង់តែតាមផ្លូវចរចា។ ប៉ុន្តែ បើកិច្ចចរចានោះ នៅតែធ្លាក់ក្នុងបរាជ័យ ហើយក្នុងលក្ខណៈកាលដែលរុស្ស៊ីដកខ្លួន ឈប់គាំទ្រអ៊ីរ៉ង់នោះប្រទេសនេះ មុខជានឹងក្រោមការគំរាមជាពុំខានដោយការវាយប្រហារពីខាងអ៊ីស្រាអែល។

គួររំលឹកថា គឺក្នុងឆ្នាំ២០០៧ដែលអ៊ីរ៉ង់បានចុះកុងត្រាទិញប្រព័ន្ធមីស្ស៊ីលការពារដែនអាកាស ធុន S-300 ចំនួន៤ប្រព័ន្ធពីរុស្ស៊ីក្នុងទឹកប្រាក់ ៨០០លានដុល្លារ ប៉ុន្តែ លោកប្រធានាធិបតី មេដវេដេវ នៅខែមិថុនាឆ្នាំ២០១០ ដោយគោរពតាមសេចក្តីសម្រេចលេខ ១៩២៩ របស់ក្រុមប្រឹក្សាសន្តិសុខអ.ស.ប. បានបញ្ជាទៅក្រុមហ៊ុនរដ្ឋរុស្ស៊ីខាងលក់អាវុធទៅក្រៅ ហៅថា RosOboronExport កុំឲ្យបំពេញកុងត្រានេះអី។ ទោះបីរុស្ស៊ី បានសងទៅអ៊ីរ៉ង់នូវប្រាក់កក់ ក្នុងទំហំ ១៦៧លានដុល្លារក្តី ក៏អ៊ីរ៉ង់នៅតែមិនស្ងប់ចិត្ត ហើយមានះដាក់ពាក្យប្តឹងទៅតុលាការមជ្ឈត្តវិនិច្ឆ័យក្រុង Genève ទារជម្ងឺចិត្តពីរុស្ស៊ីដល់ទៅ ៤.០០០លានដុល្លារឯណោះ៕