អ៊ីស្លាម-ស.រ.អា -

អត្ថបទចុះផ្សាយនៅថ្ងៃ សុក្រ 14 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 14 កញ្ញា 2012

ពិភពអារ៉ាប់ឆេះសន្ធោសន្ធៅដោយហេតុមានខ្សែភាពយន្តប្រមាថប្រឆាំងសាសនាអ៊ីស្លាម

បាតុករប្រមូលប្រជុំគ្នាសម្តែងការប្រឆាំងទល់នឹងខ្សែភាពយន្តប្រមាថសាសនាអ៊ីស្លាមនៅទីក្រុងគែរជិតស្ថានទូតអាមេរិកនៅថ្ងៃទី១៣កញ្ញាឆ្នាំ២០១២

REUTERS/Mohamed Abd El Ghany

ដោយ សៀក សារិន

បាតុកម្មដ៏ហិង្សាប្រឆាំងនឹងភាពយន្តប្រមាថសាសនាអ៊ីស្លាមដែលផលិតដោយជនជាតិអាមេរិក បានឆាបឆេះសន្ធោសន្ធៅនៅទួទាំងពិភពអារ៉ាប់។ នៅថ្ងៃព្រហស្បតិ៍ម្សិលមិញ បាតុករវាយស្ថានទូតអាមេរិកនៅប្រទេសយេម៉ែនបានបណ្តាលឲ្យមានមនុស្សស្លាប់បួននាក់។ នៅទីក្រុងគែរនៃប្រទេសអេហ្ស៊ីប បាតុកម្មដ៏ហិង្សានៅតែបន្តកើតមាន ហើយគេបារម្ភខ្លាចទង្វើហិង្សាកើនកាន់តែខ្លាំងឡើងៗ ជាពិសេសនាឱកាសបាតុកម្មនៅថ្ងៃសុក្រនេះនៅអាស៊ី។

សេចក្តីរាយការណ៍របស់សៀក សារិន

ស្តាប់ (02:44)

14/09/2012 by សៀក សារិន

បាតុករបានប្រមូលប្រជុំគ្នាដើម្បីសម្តែងការប្រឆាំងរបស់ពួកគេទល់នឹង ខ្សែភាពយន្តប្រមាថសាសនាអ៊ីស្លាមដែលផលិតដោយជនជាតិអាមេរិក។ បាតុកម្មដ៏ហិង្សាទាំងនេះ គេឃើញកើតមាននៅទូទាំងពិភពអារ៉ាប់ ដូចជានៅប្រទេសអេហ្ស៊ីប លីប៊ី អ៊ីរ៉ង់ អ៊ីរ៉ាក់ ទុយនីស៊ី យេម៉ែន អាហ្វហ្កានីស្ថាន ឬនៅតំបន់ហ្កាហ្សា ។ល។ ចំណែកឯប្រទេសអាស៊ីមួយចំនួនដែលកាន់សាសនាអ៊ីស្លាមក៏បានខិតខំពង្រឹងសន្តិសុខនៅជុំវិញស្ថានទូតអាមេរិកដើម្បីការពារទប់ទល់នឹងបាតុកម្មនៅថ្ងៃសុក្រនេះ ដែលជាថ្ងៃសូត្រធម៌បន់ស្រន់ប្រចាំសប្តាហ៍ដ៏ធំសម្រាប់សាសនាអ៊ីស្លាម។

គួរបញ្ជាក់ថា បាតុកម្មប្រឆាំងនឹងខ្សែភាពយន្តអាមេរិកាំងនេះនៅតែបន្តមានកាន់តែខ្លាំងឡើងៗ ក្រោយពីមានបាតុកម្មវាយប្រហារទៅលើស្ថានកុងស៊ុលអាមេរិកនៅទីក្រុងបេងហ្កាហ្ស៊ីនៃប្រទេសលីប៊ីដែលបានផ្តាច់ជិវិត ឯកអគ្គរដ្ឋទូតអាមេរិកប្រចាំប្រទេសលីប៊ី លោក Christopher Stevens ហើយនិងអតីតទាហានអាមេរិកាំងបីនាក់ទៀត។

នៅឯទីក្រុងសាណានៃប្រទេសយេម៉ែនឯណោះ ការវាយប្រហារទៅលើស្ថាទូតអាមេរិកបានបណ្តាលឲ្យមានមនុស្សស្លាប់បួននាក់ ហើយរថយន្តជាច្រើនគ្រឿងរបស់ស្ថានទូតបានត្រូវគេដុតចោល។ នៅឯប្រទេសអ៊ីរ៉ាក់វិញ ប្រមុខដឹកនាំសាសនាអ៊ីស្លាម Moqtada Sdr បានប្រកាសអំពាវនាវឲ្យរដ្ឋាភិបាលអ៊ីរ៉ាក់ហាមឃាត់កុំឲ្យជនជាតិអាមេរិកជាន់លើទឹកដីនៃប្រទេសអ៊ីរ៉ាក់។

ចំណែកឯប្រទេសឥណ្ឌូនេស៊ីដែលជាប្រទេសមានប្រជាជនកាន់សាសនាអ៊ីស្លាមច្រើនជាងគេនៅលើលោក បានទាមទារឲ្យ You Tube ធ្វើការខាឃាំងកុំឲ្យមានការផ្សព្វផ្សាយភាពយន្តអាមេរិកាំងដែលប្រមាថសាសនាអ៊ីស្លាមនេះទៀត។ រដ្ឋាភិបាលអាហ្វហ្កានីស្ថានឯណោះវិញ បានធ្វើការហាមឃាត់ទាំងស្រុងពុំឲ្យមានការចាក់ផ្សាយភាពយន្តនេះឡើយ។ ក៏ដូចគ្នាអ៊ីចឹងដែរ សម្រាប់ប្រទេសប៉ាគីស្ថាន។
ប្រទេសឥណ្ឌាបានខិតខំធ្វើការពង្រឹងសន្តិសុខនៅជុំវិញស្ថានទូតអាមេរិក។

គួររំលឹកថា កាលនៅខែវិច្ឆិកាឆ្នាំ២០០៤ សមិទ្ធិករនៃប្រទេសហូឡង់ម្នាក់ឈ្មោះ Theo Van Gohg បានត្រូវសម្លាប់ដោយអ្នកកាន់សាសនាអ៊ីស្លាមជ្រុលនិយមម្នាក់ ដោយហេតុតែលោក Theo Van Gohg បានផលិតភាពយន្តមួយខ្សែ ទិតៀនទៅលើកង្វះសិទ្ធិសេរីភាពរបស់ស្ត្រីនៅក្នុងសាសនាអ៊ីស្លាម។

ហើយនៅខែកុម្ភៈឆ្នាំ២០១២ថ្មីៗកន្លងទៅនេះ ទាហានអាមេរិកាំងនៅក្នុងពន្ធនាគារ Bagram នៅប្រទេសអាហ្វហ្កានីស្ថានបានដុតគម្ពីរ Coran បានបណ្តាលឲ្យកើតមានបាតុកម្មប្រឆាំងអាមេរិកដ៏ហិង្សា ដែលកាលណោះបានបណ្តាលឲ្យប្រជាជនអាហ្វហ្កានីស្ថាន៣០នាក់និងទាហានអាមេរិកាំង៦នាក់បាត់បង់ជីវិត។

ដូច្នេះហើយបានជានៅថ្ងៃព្រហស្បតិ៍ម្សិលមិញថា សេតវិមានបានថ្លែងប្រាប់ថា ស.រ.អា.នឹងតាមដានស្ថានការណ៍យ៉ាងមធ្យ័តបំផុត ហើយនិងការពារស្ថានទូតនិងស្ថានកុងស៊ុលរបស់ខ្លួនដែលមាននៅលើពិភពលោក ដោយបារម្ភខ្លាចមានបាតុកម្មហិង្សាកើតមាននៅក្នុងពិភពអារ៉ាប់នៅថ្ងៃសុក្រទី១៤កញ្ញាឆ្នាំ២០១២នេះ៕