កម្ពុជា -

អត្ថបទចុះផ្សាយនៅថ្ងៃ អាទិត្យ 15 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 16 កក្កដា 2012

លោកម៉ម សូណង់ដូត្រូវបានប៉ូលិសចាប់ខ្លួនទាក់ទងបញ្ហាដីធ្លី

លោក ម៉ម សូណង់ដូប្រធានសមាគមអ្នកប្រជាធិបតេយ្យនិងជានាយកវិទ្យុសំបុកឃ្មុំ FM 105 MHz នៅព្រលានយន្តហោះភ្នំពេញនាពេលត្រឡប់មកកម្ពុជាវិញ

RFI/Siv Channa

ដោយ ប៉ែន បូណា

លោកម៉មសូណង់ដូប្រធានសមាគមអ្នកប្រជាធិបតេយ្យនិងជានាយកវិទ្យុសំបុកឃ្មុំFM 105 MHz ត្រូវបានសមត្ថកិច្ចចាប់ខ្លួនបញ្ជូនទៅក្រសួងមហាផ្ទៃហើយនៅព្រឹកថ្ងៃអាទិត្យនេះ។ការចាប់ខ្លួននេះបានធ្វើឡើងតាមដីការបស់តុលាការខេត្តក្រចេះក្រោមបទចោទប្រកាន់ចំនួន៤ករណីទាក់ទងនឹងការញុះញង់ប្រជាពលរដ្ឋឲ្យកាន់អាវុធខុសច្បាប់និងប្រឆាំងអាជ្ញាធរស្របច្បាប់។ អង្គការការពារសិទ្ធិមនុស្សបានហៅការចាប់ខ្លួននេះ ថាជាការរំលោភសិទ្ធិមនុស្សធ្ងន់ធ្ងរនិងអំពាវនាវឲ្យសមត្ថកិច្ចដោះលែងលោក ម៉ម សូណង់ដូឲ្យមានសេរីភាពឡើងវិញ។

សេចក្តីរាយការណ៍របស់ ប៉ែនបូណាពីភ្នំពេញ

ស្តាប់ (02:35)

15/07/2012 by ប៉ែន បូណា

ក្នុងកម្លាំងប៉ូលិសក្រសួងមហាផ្ទៃរាប់សិបនាក់បានចុះទៅចាប់ខ្លួនលោកម៉ម សូណង់ដូនៅព្រឹកថ្ងៃអាទិត្យនេះ ក្នុងគេហដ្ឋានរបស់លោកនៅក្នុងសង្កាត់បឹងទំពុនខណ្ឌមានជ័យរាជធានីភ្នំពេញ។ ក្រុមប៉ូលិសបានបង្ហាញដីកាចាប់ខ្លួនដែលចេញដោយសាលាដំបូងខេត្តក្រចេះចុះថ្ងៃទី២ខែកក្កដាឆ្នាំ២០១២ ។

យោងតាមដីកាចាប់ខ្លួននោះ លោក ម៉ម សូណង់ដូ ត្រូវបានចោទប្រកាន់ពីបទល្មើសទាក់ទងនឹងការផ្តួមផ្តើមគំនិតប្រឆាំងអ្នករាជការសាធារណៈ, បទធ្វើកុបកម្មជ្រៀតជ្រែកខុសច្បាប់ទៅនឹងការបំពេញមុខងារសាធារណៈរបស់អាជ្ញាធរ, បទញុះញង់ឲ្យប្រជាពលរដ្ឋកាន់អាវុធខុសច្បាប់និងបទប្រឆាំងអាជ្ញាធរស្របច្បាប់។ បន្ទាប់ពីការចាប់ខ្លួន លោក ម៉ម សូណង់ដូ ត្រូវបានបញ្ជូនទៅអគ្គស្នងការនគរបាលជាតិនៃក្រសួងមហាផ្ទៃដើម្បីកសាងសំណុំរឿងបញ្ជូនទៅតុលាការ។

ការចាប់ខ្លួនលោក ម៉ម សូណង់ដូ នៅពេលនេះគឺជាប់ពាក់ព័ន្ធនឹងបញ្ហាដីធ្លីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ រហូតដល់រដ្ឋាភិបាលប្រើកម្លាំងបង្ក្រាប កាលពីថ្ងៃទី១៦ ខែឧសភា ឆ្នាំ២០១២ កន្លងទៅ។ រដ្ឋាភិបាលបានហៅករណីនោះថាជាចលនាចាប់ដីខុសច្បាប់ដែលមានមេខ្លោងនៅពីក្រោយខ្នងញុះញង់ឲ្យប្រជាពលរដ្ឋបង្កើតតំបន់អបគមន៍។

ព្រឹត្តិការណ៍បង្ក្រាបនោះបាននាំឲ្យក្មេងស្រីម្នាក់ស្លាប់ និងមនុស្សជាច្រើននាក់ត្រូវបានចាប់ខ្លួន។ មនុស្សយ៉ាងហោចណាស់៥នាក់ផ្សេងទៀតក្នុងនោះមានឈ្មោះប៊ុន រដ្ឋាដែលជាសមាជិកសមាគមអ្នកប្រជាធិបតេយ្យរបស់លោកម៉មសូណង់ដូត្រូវបានគេចាត់ទុកជាមេខ្លោងដែលត្រូវតាមចាប់ខ្លួន។

ក្រោយមកលោកនាយករដ្ឋមន្ត្រី ហ៊ុន សែនបានប្រកាសជាសាធារណៈថាជាមេខ្លោងនៅពីក្រោយខ្នងធំបំផុតក្នុងរឿងនេះគឺប្រធានសមាគមអ្នកប្រជាធិបតេយ្យដែលគេស្គាល់ថាគឺ លោក ម៉ម សូណង់ដូ ។ ប៉ុន្តែ លោកម៉ម សូណង់ដូដែលកាលណោះកំពុងស្ថិតនៅឯសហរដ្ឋអាមេរិកបានបដិសេធការចោទប្រកាន់នេះ។ លោកបានវិលត្រឡប់មកដល់ភ្នំពេញវិញកាលពីយប់ថ្ងៃព្រហស្បតិ៍ដើម្បីប្រឈមមុខនឹងបញ្ហានេះ។

លោក ចាន់ សូវ៉េតមន្ត្រីអ្នកស៊ើបអង្កេតសិទ្ធិមនុស្សរបស់សមាគម អាដហុក បានហៅការចាប់ខ្លួនលោក ម៉ម សូណង់ដូ ថាជាការរំលោភសិទ្ធិមនុស្សធ្ងន់ធ្ងរនិងជាការគំរាមកំហែងអ្នកប្រជាធិបតេយ្យ។ លោកអះអាងថា មុននឹងចាប់ខ្លួនអាជ្ញាធរត្រូវស៊ើបអង្កេតឲ្យបានច្បាស់លាស់។ បើតាមលោក ចាន់ សូវ៉េត ក្រុមអង្គការសិទ្ធិមនុស្សបានផ្តល់មេធាវីម្នាក់គឺ លោកមេធាវី សុក សំអឿន នាយកគម្រោងការពារសិទ្ធិកម្ពុជា( CDP) ដើម្បីការពារលោក ម៉ម សូណង់ដូ។

លោក បានអំពាវនាវឲ្យអាជ្ញាធរដោះលែងលោកម៉ម សូណង់ដូ ឲ្យមានសេរីភាពឡើងវិញ។ ក្រុមអង្គការសិទ្ធិមនុស្សគ្រោងជួបប្រជុំគ្នានៅថ្ងៃស្អែក និងចេញសេចក្តីថ្លែងការណ៍មួយទាក់ទងនឹងការចាប់ខ្លួនលោក ម៉ម សូណង់ដូ ផងដែរ៕