កងទ័ពកម្ពុជា និងកងម៉ារីនអាមេរិក ជួបគ្នា ក្នុងសមយុទ្ធសង្គ្រោះមនុស្សធម៌
នៅថ្ងៃពុធនេះ កងទ័ពកម្ពុជា និងកងទ័ពម៉ារីនអាមេរិក បានបើកកិច្ចប្រជុំ ស្តីពី សមយុទ្ធផ្តល់ ជំនួយសង្គ្រោះ ក្នុងគ្រោះមហន្តរាយ និងជំនួយមនុស្សធម៌។ កិច្ចប្រជុំនៅទីក្រុងភ្នំពេញ ចាប់ពីថ្ងៃទី៣០ ខែវិច្ឆិកា ដល់ថ្ងៃទី៩ ខែធ្នូ គឺជាលំហាត់សមយុទ្ធបែបធ្វើត្រាប់ ដោយផ្តោតសំខាន់លើការចែករំលែកបច្ចេកទេសឆ្លើយតប និងផ្តល់ជំនួយសង្គ្រោះមហន្តរាយ និងជំនួយមនុស្សធម៌ ដើម្បីលើកកម្ពស់ និងសម្របសម្រួលទំនាក់ទំនងប្រកបដោយវិជ្ជាជីវៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កិច្ចប្រជុំស្តីពីលំហាត់សមយុទ្ធ ក្នុងការផ្តល់ជំនួយសង្គ្រោះមហន្តរាយ និងជំនួយមនុស្សធម៌ រវាងកងទ័ពកម្ពុជា និងកងទាហានម៉ារីនរបស់អាមេរិកពេលនេះ ក្រៅតែពីរឹតចំណងរវាងកងទ័ពកម្ពុជា និងអាមេរិក កិច្ចប្រជុំនោះ ក៏នឹងជួយធ្វើអោយប្រសើរឡើងនូវលទ្ធភាពរបស់បណ្តាប្រទេសនៅតំបន់អាស៊ីប៉ាស៊ីហ្វិក ដើម្បីធ្វើការរួមគ្នា ប្រកបដោយប្រសិទ្ធិភាព ក្នុងការផ្តល់ជំនួយសង្គ្រោះ និងជំនួយមនុស្សធម៌ ក្នុងព្រឹត្តិការណ៍មានវិបត្តិ និងគ្រោះមហន្តរាយធម្មជាតិផ្សេងៗ។
លោក Jeff Daigle ភារធារីស្ថានទូតអាមេរិកបានមានប្រសាសន៍ថា “ភាពជាដៃគូរវាងកងទ័ពកម្ពុជា និងអាមេរិក គឺជាការបញ្ជាក់អោយឃើញនូវការប្តេជ្ញាចិត្តរួមគ្នារបស់ប្រទេសទាំងពីរ ក្នុងការពង្រឹងទំនាក់ទំនងរវាងកងម៉ារីនសហរដ្ឋអាមេរិក និងកងយោធពលខេមរភូមិន្ទ ហើយផ្តល់ឱកាសមួយទៀតដល់រដ្ឋាភិបាលសហរដ្ឋអាមេរិក ក្នុងការជួយលើកកម្ពស់សមត្ថភាពរួមរបស់កងយោធពលខេមរភូមិន្ទ”។
តាមតំណាងស្ថានទូតអាមេរិក កិច្ចប្រជុំនិយាយពីសមយុទ្ធធ្វើត្រាប់រយៈពេល ១០ ថ្ងៃ ចាប់ពីថ្ងៃ៣០វិច្ឆិកានេះ មានសារៈសំខាន់ណាស់ សម្រាប់ភាគីសហរដ្ឋអាមេរិក និងកម្ពុជា ក្នុងកិច្ចសហប្រតិបត្តិការរួមគ្នា ដើម្បីដោះស្រាយក្នុងប្រតិបត្តិការគ្រោះធម្មជាតិ និងវិបត្តិផ្សេងៗ។ អ្វីដែលសំខាន់ កម្មវិធីនេះ បានពង្រឹងសមត្ថភាពរបស់ភាគីទាំងពីរ នៅក្នុងកិច្ចសហប្រតិបត្តិការប្រកបដោយប្រសិទ្ធិភាព និងវិជ្ជាជីវៈ ព្រមទាំងបង្កើនទំនាក់ទំនងភាគីទាំងពីរ។
ចំណែកលោកឧត្តមសេនីយ៍ត្រី សាត ចន្ថា ស្នងការរងនៃស្នងការដ្ឋានផែនការ របស់កងរាជអាវុធហត្ថ បានលើកឡើងថា កិច្ចប្រជុំជាមួយកងម៉ារីនអាមេរិកពេលនេះ ជាការផ្តល់នូវការបណ្តុះបណ្តាល ក៏ដូចជាការហ្វឹកហាត់ ដល់កងរាជអាវុធហត្ថ និងកងប្រដាប់អាវុធកម្ពុជា ដើម្បីពង្រឹងសមត្ថភាពក្នុងការបំពេញការងារជំនួយមនុស្សធម៌ សង្គ្រោះក្នុងពេលមានគ្រោះមហន្តរាយនានា។
កងទ័ពកម្ពុជា ត្រូវបានបញ្ជូនទៅជួយសង្គ្រោះ ក្នុងគ្រោះមហន្តរាយ ដោយសារទឹកជំនន់ កាលពីខែកញ្ញា និងតុលា ឆ្នាំ២០១១។ ប៉ុន្តែកងទ័ពកម្ពុជា ជួបប្រទះបញ្ហាមួយចំនួន ទាក់ទងនឹងសមត្ថភាព និងខ្វះខាតសម្ភារៈ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ