រដ្ឋសភាយល់ព្រមលើការកែប្រែច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម
នៅព្រឹកថ្ងៃពុធនេះ រដ្ឋសភាបានអនុម័តយល់ព្រមលើការកែប្រែមាត្រាមួយចំនួនក្នុងច្បាប់ ស្តីពីការប្រឆាំងនឹងការសម្អាតប្រាក់និងហិរញ្ញប្បទានភេរវកម្ម។ ច្បាប់ស្តីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ត្រូវបានអនុម័តនិងប្រកាសឲ្យប្រើដោយព្រះរាជក្រម ចុះថ្ងៃទី២៤ ខែមិថុនា ឆ្នាំ២០០៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៥
សមាជិករដ្ឋសភា ៨៣ រូប ក្នុងចំណោមសមាជិករដ្ឋសភា ៨៩ រូប ដែលមានវត្តមានក្នុងកិច្ចប្រជុំរដ្ឋសភា នាព្រឹកថ្ងៃទី៨ ខែឧសភា ឆ្នាំ២០១៣ បានលើកដៃអនុម័តលើការកែប្រែវិសោធនកម្ម មាត្រា៣ មាត្រា២៩ និងមាត្រា ៣០ នៃច្បាប់ ស្តីពីការប្រឆាំងនឹងការសម្អាតប្រាក់ និងហិរញ្ញប្បទានភេរវកម្ម។
ច្បាប់ស្តីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ដែលបានប្រកាសឲ្យប្រើប្រាស់ កាលពីឆ្នាំ២០០៧ នៅមាត្រា៣ និយាយពីនិយមន័យនៃពាក្យបច្ចេកទេស មាត្រា២៩ កំណត់ពីទណ្ឌកម្មខាងព្រហ្មទណ្ឌ និងមាត្រា៣០ និយាយពីការឃាត់ទុកនិងរឹបអូសទ្រព្យសម្បត្តិ។
ការកែប្រែមាត្រា ២៩ថ្មី បានកំណត់ថា ការសម្អាតប្រាក់ ត្រូវផ្តន្ទាទោសដាក់ពន្ធនាគារ ពី២ឆ្នាំ ទៅ ៥ឆ្នាំ និងពិន័យជាប្រាក់ពី ៤០ លានរៀល រហូតដល់ ១០០ លានរៀល។ ចំណែកការបដិសេធផ្តល់ព័ត៌មានពាក់ព័ន្ធនឹងការប្រឆាំងការសម្អាតប្រាក់ ត្រូវផ្តន្ទាទោសដាក់ពន្ធនាគារពី ៦ ថ្ងៃ ដល់ ១ ខែ និងពិន័យជាប្រាក់ ១ សែនរៀល ដល់ ១ លានរៀល ឬក៏ផ្តន្ទាទោសទាំងពីរ។
ក្នុងការកែប្រែមាត្រា ២៩ នៃច្បាប់ស្តីពីការប្រឆាំងនឹងការសម្អាតប្រាក់និងហិរញ្ញប្បទានភេរវកម្ម ក៏បានកំណត់ពីការផ្តល់លុយសម្រាប់បម្រើអំពើភេរវកម្ម ត្រូវផ្តន្ទាទោស ដាក់ពន្ធនាគារ ពី ១០ ឆ្នាំ ដល់ ២០ ឆ្នាំ។
ទេសាភិបាលធនាគារជាតិកម្ពុជា លោក ជា ចាន់តូ ដែលបានចូលការពារច្បាប់នៅរដ្ឋសភា ព្រឹកមិញ បានថ្លែងថា ច្បាប់ស្តីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ត្រូវបានប្រកាសឲ្យប្រើប្រាស់ កាលពីឆ្នាំ២០០៧ គឺមុនពេលដែលបង្កើតក្រមព្រហ្មទណ្ឌ។ ម្យ៉ាងទៀត ច្បាប់ក្រមព្រហ្មទណ្ឌនិងច្បាប់ស្តីពីការប្រឆាំងនឹងភេរវកម្ម នៅពុំទាន់បានបំពេញឲ្យគ្នាទៅវិញទៅមក ដូច្នេះហើយរាជរដ្ឋាភិបាលក៏សម្រេចធ្វើការកែសម្រួល។
តាមរាជរដ្ឋាភិបាល ការកែប្រែមាត្រា៣ មាត្រា២៩ និងមាត្រា៣០ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ដើម្បីការពារ គ្រប់គ្រង និងទប់ស្កាត់ឲ្យបាននូវរាល់ប្រតិបត្តិការ ឬបទល្មើសទាក់ទងនឹងសកម្មភាពសម្អាតប្រាក់និងហិរញ្ញប្បទានភេរវកម្ម ដែលអាចរក្សាមុខមាត់របស់ប្រទេសកម្ពុជា នៅក្នុងតំបន់ និងអន្តរជាតិ ថាកម្ពុជាជាកន្លែងស្អាតស្អំ និងមានសុវត្ថិភាពសម្រាប់ការបោះទុននិងការវិនិយោគ។
ការកែប្រែច្បាប់នោះក៏សម្រាប់ការពារហានិភ័យនៃការនិយាយបំផ្លើសថា កម្ពុជាជាឋានសួគ៌សម្រាប់ការសម្អាតប្រាក់ និងហិរញ្ញប្បទានភេរវកម្ម ព្រមទាំងការពង្រឹងនិងពង្រីកកិច្ចសហប្រតិបត្តិការទ្វេភាគី និងពហុភាគីជាមួយប្រទេសនៅក្នុងតំបន់និងពិភពលោក លើការងារប្រឆាំងនិងទប់ស្កាត់ការសម្អាតប្រាក់ និងហិរញ្ញប្បទានភេរវកម្ម។
ក៏ប៉ុន្តែសម្រាប់លោក យឹម សុវណ្ណ អ្នកតំណាងរាស្ត្រគណបក្សសមរង្ស៊ី បទឧក្រិដ្ឋលាងលុយកខ្វក់នៅកម្ពុជា កើតចេញពីអំពើពុករលួយ ការជួញដូរមនុស្ស និងការជួញដូរគ្រឿងញៀន ព្រមទាំងអំពើឧក្រិដ្ឋផ្សេងៗទៀត។ លោកបន្តថា សង្គមស៊ីវិល អ្នកវិភាគឯករាជ្យ និងគណបក្សប្រឆាំង បានរកឃើញថា នៅកម្ពុជា ក្នុងមួយឆ្នាំៗ កម្ពុជាបាត់លុយពី ៥០០ ទៅ ១.០០០ លានដុល្លារ ហើយត្រូវបានបង្វិលទៅជាការរកស៊ីដើម្បីលាងលុយ។
លោក យឹម សុវណ្ណ ក៏ស្នើឲ្យរាជរដ្ឋាភិបាល ចាត់វិធានការលុបបំបាត់អំពើពុករលួយ ហើយតាំងចិត្តអនុវត្តច្បាប់ ដើម្បីទប់ស្កាត់ការលាងលុយកខ្វក់ និងកាត់បន្ថយភាពក្រីក្រ ឲ្យស្របតាមកំណើនសេដ្ឋកិច្ច នាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ