សហរដ្ឋអាមេរិក -

អត្ថបទចុះផ្សាយនៅថ្ងៃ ព្រហស្បតិ៍ 02 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 02 កុម្ភៈ 2012

កងទ័ពអាមេរិកអាចបញ្ចប់បេសកកម្មវាយប្រយុទ្ធនៅអាហ្វហ្កានិស្ថានចាប់ពីឆ្នាំ២០១៣

រដ្ឋមន្ត្រីក្រសួងការពារជាតិអាមេរិកLeon Panetta (រូបឆ្វេង)ជជែគជាមួយលោក Anders Fogh Rasmussen អគ្គលេខាធិការអង្គការណាតូមុនជំនួបកំពូលនៅទីក្រុងព្រុចសែលថ្ងៃទី២កុម្ភៈ២០១២

REUTERS/Sebastien Pirlet

ដោយ នុយ ប៊ែរណាដែត

លោកLeon Panetta រដ្ឋមន្រ្តីក្រសួងការពារជាតិអាមេរិកក្នុងដំណើរទៅកាន់ទីក្រុងព្រុចសែលដើម្បីចូលរួមប្រជុំថ្នាក់រដ្ឋមន្រ្តីនៃអង្គការណាតូនៅថ្ងៃព្រហស្បតិ៍នេះបានថ្លែងថា "សហរដ្ឋអាមេរិករំពឹងទុកថានឹងអាចបញ្ចប់បេសកកម្មវាយប្រយុទ្ធរបស់ខ្លួននៅអាហ្វហ្កានិស្ថាននៅពាក់កណ្តាលឆ្នាំ២០១៣។ គោលដៅគឺដើម្បីទុកឱកាសផ្តោតទៅលើការជួយហ្វឹកហ្វឺនដល់កងកម្លាំងសន្តិសុខអាហ្វហ្កានិស្ថាន។

សេចក្តីរាយការណ៍របស់ នុយ ប៊ែរណាដែត

ស្តាប់ (02:15)

02/02/2012 by នុយ ប៊ែរណាដែត

លោករដ្ឋមន្រ្តីក្រសួងការពារជាតិអាមេរិក បានបញ្ជាក់ទៀតថា« នេះ ពុំមែនជាយុទ្ធសាស្រ្តថ្មីរបស់អាមេរិកទេ ពីព្រោះគោលដៅរបស់យើង នៅរក្សាទុកដដែល លើការអនុវត្តន៍កិច្ចព្រមព្រៀង Lisborne ដែលកំណត់ ធ្វើការដកកងទ័ពអន្តរជាតិរក្សាសន្តិភាព-ចេញពី ប្រទេសអាហ្វហ្កានិស្ថាននៅឆ្នាំ២០១៤។

លោក Leon Panetta បានបន្ថែមទៀតថា ”ទីក្រុងវ៉ាស៊ីនតោន ប្រាថ្នាចង់ឃើញបណ្តាប្រទេសទាំងអស់ដែលជាសមាជិកអង្គការ ណាតូ រួមទាំងប្រទេសបារាំងផងដែរ គោរពចំពោះប្រក្រតីទិនដែលប្រទេសសមាជិកណាតូ បានទទួលយកនៅឱកាសជំនួបកំពូលនៅទីក្រុង Lisborne កាលពីខែវិច្ឆិកា២០១០។

មួយវិញទៀត រដ្ឋការអាមេរិក ទំនងដូចជាចង់អនុវត្ត ផែនការរបស់ខ្លួននៅអាហ្វហ្កានិស្ថាននេះ ដូចនៅប្រទេសអៀរ៉ាក់ដែរ។ គឺមួយឆ្នាំ មុនពេលដែលអាមេរិក បានដកកងទ័ពខ្លួនចេញពីប្រទេសអៀរ៉ាក់ទាំងស្រុង កាលពីចុងឆ្នាំ២០១១នោះ អាមេរិក បានបញ្ចប់បេសកកម្មវាយប្រយុទ្ធខ្លួនដើម្បី ប្រមូលផ្តុំមកលើការជួយហ្វឹកបង្ហាត់ដល់កងទ័ពអៀរ៉ាក់វិញដែរ។

ក៏ប៉ុន្តែ នាអំឡុងពេលនោះ កងទ័ពអាមេរិកាំង នៅតែមានឱកាស បន្តជួយជាកម្លាំងដល់កងទ័ពអៀរ៉ាក់ដែរ ដែល នៅឱកាសប្រតិបត្តិការណ៍យោធានេះ កងទ័ពអាមេរិក បានបាត់បង់ជីវិតចំនួន៣៧០នាក់។

សូមបញ្ជាក់ថា នៅឱកាសជំនួបកំពូលនៅទីក្រុងព្រុចសែលនាថ្ងៃនេះ លោក Leon Panetta ទន្ទឹងចង់ដឹង អំពីជំហររបស់ប្រទេសបារាំង ជាពិសេស ការជូនដំណឹងរបស់លោកប្រមុខរដ្ឋនីកូឡាសាកូហ្ស៊ី ពាក់ព័ន្ធ អាហ្វហ្កានិស្ថាននេះ។ ក៏ប៉ុន្តែយោងតាមមន្ត្រីជាន់ខ្ពស់ម្នាក់នៃក្រសួងការពារជាតិអាមេរិកាំងបានឲ្យដឹងថា ជំហររបស់ បារាំងនិងណេតូ ប្រហែល ជាពុំមានការខុសគ្នាអ្វីសំខាន់ខ្លាំងនោះទេ៕