រុស្ស៊ី-អ៊ីស្លាម -

អត្ថបទចុះផ្សាយនៅថ្ងៃ អង្គារ 18 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 18 កញ្ញា 2012

ភាពយន្តដែលប្រមាថសាសនាអ៊ីស្លាមនឹងត្រូវហាមផ្សព្វផ្សាយនៅរុស្ស៊ី ក្នុងពេលខាងមុខ

REUTERS/Umit Bektas

ដោយ កែវ ឆាយា

មូលហេតុ មកពីអាជ្ញាធររុស្ស៊ីបារម្ភខ្លាចក្រែង ភាពយន្តអាមេរិកាំងនេះ ក្រោមចំណងជើងថា “ភាពឆោតល្ងង់នៃពួកមូស្លីម” ញ៉ាំងឲ្យមានរលកប្រឆាំងនៃអ្នកកាន់សាសនាអ៊ីស្លាម ដូចដែលកំពុងបោកបក់ក្នុងពិភពអារ៉ាបអ៊ីចឹង។ ដ្បិតនៅរុស្ស៊ី មានសាសនិកអ៊ីស្លាមដល់ទៅ ២០លាននាក់។ មហាអយ្យការុស្ស៊ី ថ្ងៃ១៧ កញ្ញា ក្នុងពាក្យបណ្តឹងទៅតុលាការ ទាមទារឲ្យហាមការផ្សព្វផ្សាយភាពយន្តនេះក្នុងប្រទេស មកពីវាមានលក្ខណៈជ្រុលនិយម។

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

ស្តាប់ (02:08)

18/09/2012 by កែវ ឆាយា

តាមដែលកាសែតក្រុងម៉ូស្គូ Kommersant លេខថ្ងៃនេះសរសេរ ៖ ការសម្រេចចិត្តនេះរបស់ស្ថាប័នរដ្ឋអាជ្ញារុស្ស៊ី ក្លាយជាប្រតិកម្មលឿនបំផុត តាំងពីនៅរុស្ស៊ី មានចងក្រងបាន ជាបញ្ជីទាក់ទងនឹងរាល់អ្វីៗដែលជ្រុលនិយម ហើយចម្លើយទាន់ពេលវេលានេះ គឺរំលងតែប៉ុន្មានថ្ងៃសោះ ក្រោយពីតាមបណ្តាញអ៊ិនធ័រណេត មានបញ្ចាំងខ្សែភាពយន្តនោះ។ ចំណែកនៅរុស្ស៊ី ច្បាប់ស្តីអំពីអ៊ិនធ័រណេតត្រូវបានអនុម័ត គឺកាលពីកណ្តាលឆ្នាំ២០១២ នេះ។ នេះជាករណីទី១ ដែលរុស្ស៊ីចាត់ទុកជា ជ្រុលនិយម គឺស្នាដៃសិល្បៈបរទេសដែលឥតបកប្រែជាភាសារុស្ស៊ីឯណា ហើយដែលផ្សព្វផ្សាយ គឺនៅក្រៅប្រទេសរុស្ស៊ីសោះ។

តាមមតិពួកអ្នកការពារសិទ្ធិមនុស្ស ពាក្យបណ្តឹងរបស់មហាអយ្យការុស្ស៊ី គឺច្បាស់ជាត្រូវបានអនុម័តដោយយោងទៅតាមការណែនាំក្នុងជាន់ថ្នាក់ខ្ពស់បំផុត ពីព្រោះរដ្ឋអំណាចបន្តផ្តោតការយកចិត្តទុកដាក់មែនទែន ទៅលើរឿងអាស្រូវសាសនាដែលកើតឡើងបណ្តាលមកពីការសំដែងនៃក្រុមចម្រៀង Pussy Riot ក្នុងវិហារគ្រិស្តសាសនានៅរុស្ស៊ី កាលពីកន្លះឆ្នាំមុន។

ជាការកត់សម្គាល់ ស្ថាប័នរដ្ឋអាជ្ញារុស្ស៊ីដែលបានដាក់ពាក្យប្តឹងនោះ គឺបន្ទាប់ពីសមាជិកម្នាក់នៃព្រឹទ្ធសភាខាងបក្សកាន់អំណាច “ប្រទេសរុស្ស៊ីរួមធ្លុងមួយ” លោក Rouslan Gattarov បានថ្លែងបរិហារថា ៖ភាពយន្តនោះ ជាអំពើបង្កហេតុដ៏ធំធេង។ ច្បាស់ណាស់ដែលគោលដៅវា គឺដើម្បីពុះចែកសង្គម តាមភិនភាគសាសនា ហេតុដែលអាចបង្កជាផលវិបាកធ្ងន់ធ្ងរដល់សន្តិសុខ និងសណ្តាប់ធ្នាប់សាធារណៈ។

អ្នកនាំពាក្យផ្លូវការរបស់មហាអយ្យការុស្ស៊ីគូសបញ្ជាក់ថា ភាពយន្តនោះ “ប្រមាថលើមនោសញ្ចេតនាអ្នកកាន់សាសនា ហើយញុះញង់ឲ្យមានការចងគំនុំស្អប់គ្នារវាងជាតិពន្ធុ។ ក្នុងកាលទេសៈឥឡូវ ដោយនៅរង់ចាំសេចក្តីវិនិច្ឆ័យរបស់តុលាការ មហាអយ្យកាសុំឲ្យ “អង្គការរបស់សហព័ន្ធរុស្ស៊ីខាងត្រួតពិនិត្យលើប្រព័ន្ធផ្សព្វផ្សាយក្នុងប្រទេស” ហៅកាត់ថា RosKomNadzor តាមដានកុំឲ្យមានផ្សព្វផ្សាយសោះឡើយ តាមមធ្យោបាយឃោសនាមហាជនរុស្ស៊ីនូវភាពយន្តណាដែលខ្លឹមសារវា គឺស្អប់សាសនាអ៊ីស្លាម៕

tags: រុស្ស៊ី