ជប៉ុន-ចិន -

អត្ថបទចុះផ្សាយនៅថ្ងៃ អង្គារ 31 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 31 កក្កដា 2012

ទីក្រុងតូក្យូបារម្ភពីឥទ្ធិពលយោធាចិនដែលមានកាន់តែខ្លាំងឡើងៗនៅក្នុងវិស័យការទូតចិន

កោះសេនកាគូឬកោះ Diaoyu ដែលឈ្លោះដណ្តើមចង់បានដោយទីក្រុងតូក្យូនិងទីក្រុងប៉េកាំង

REUTERS/Taiwan Coast Guard/Handout/Files

ដោយ សៀក សារិន

នៅក្នុងសៀវភៅសប្រចាំឆ្នាំស្តីពីការពារជាតិ ទីក្រុងតូក្យូបានសម្តែងឲ្យឃើញនូវក្តីបារម្ភរបស់គេពាក់ព័ន្ធនឹង “ឥទ្ធិពលនៃយោធាចិនដែលមានកាន់តែខ្លាំងឡើងៗនៅក្នុងនយោបាយការបរទេសចិន”។

សេចក្តីរាយការណ៍របស់សៀក សារិន

ស្តាប់ (01:45)

31/07/2012 by សៀក សារិន

បើយោងតាមរបាយការណ៍របស់ជប៉ុន កងកម្លាំងយោធាចិនបានលូកដៃកាន់តែជ្រៅទៅៗ ចូលទៅក្នុងវិស័យនយោបាយរបស់ប្រទេសចិន។ “ទំនាក់ទំនងរវាងគណបក្សកុម្មុយនិស្តចិន និងកងកម្លាំងយោធាប្រជាមានិតចិនមានលក្ខណៈកាន់តែស្មុគស្មាញឡើងៗ”។ នេះជាការបញ្ជាក់បន្ថែមរបស់សៀវភៅសប្រចាំឆ្នាំជប៉ុន។

លោក Toshinori Tanaka ប្រធាននាយកដ្ឋានខាងវិភាគនិងព័ត៌មានយុទ្ធសាស្ត្រនៃក្រសួងការពារជាតិបានថ្លែងឲ្យដឹងថា “ទាំងនេះបានបណ្តាលឲ្យគេមានការពិបាកយល់ដឹងពីគោលបំណងនិងឆន្ទៈរបស់ទីក្រុងប៉េកាំង”។

ក៏ប៉ុន្តែ សៀវភៅសជប៉ុនក៏បានបញ្ជាក់ឲ្យដឹង ពីឥទ្ធិពលរបស់កងកម្លាំងយោធាចិនដែលអាចស្គាល់ការធ្លាក់ស្រុតចុះ ដោយហេតុតែចំនួននៃអ្នកទទួលខុសត្រូវយោធានៅក្នុងរង្វង់ថ្នាក់ដឹកនាំចិនមានកាន់តែតិចទៅៗ។ ថ្នាក់ដឹកនាំចិនដែលគេគ្រោងចាត់តាំងឲ្យមានសម្រាប់រយៈពេល១០ឆ្នាំនៅសរទរដូវខាងមុខនេះ។

គួរបញ្ជាក់ថា កាលពីខែមីនាកន្លងទៅ លោកនាយករដ្ឋមន្ត្រីចិន វិន ជាប៉ាវ ធ្លាប់បានថ្លែងនៅមុខសភាប្រជាមានិតចិនថា “នៅឆ្នាំ២០១២ទីក្រុងប៉េកាំងនឹងពន្លឿនការធ្វើទំនើបកម្មទៅលើកងកម្លាំងយោធារបស់ខ្លួន”។ កងកម្លាំងយោធាចិនដែលមានចំនួនទាហានច្រើនជាងគេក្នុងលោក ហើយដែលថវិកានៃក្រសួងការពារជាតិមានអត្រាកំណើនប្រមាណ១១,២%ក្នុងមួយឆ្នាំ។

សូមបញ្ជាក់ថា ទំនាក់ទំនងរវាងប្រទេសចិននិងប្រទេសជប៉ុន ក៏ដូចជាទំនាក់ទំនងរវាងប្រទេសចិនជាមួយប្រទេសជិតខាងមួយចំនួនដូចជាប្រទេសវៀតណាមនិងប្រទេសហ្វីលីពីន បានស្គាល់ការរកាំរកូស ដោយហេតុតែមានការឈ្លោះដណ្តើមចង់បានកោះមួយចំនួននៅក្នុងសមុទ្រចិនខាងកើត ហើយនិងសមុទ្រចិនខាងត្បូង មានដូចជា កោះសេនកាគូឬកោះ Diaoyu ដែលឈ្លោះដណ្តើមចង់បានដោយទីក្រុងតូក្យូនិងទីក្រុងប៉េកាំង៕