ONU -

អត្ថបទចុះផ្សាយនៅថ្ងៃ អង្គារ 02 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 02 តុលា 2012

ONU សម្គាល់ឃើញពីការគំាងស្ទះសំណុំរឿងដើមបូព៌ា និងការរីកចម្រើនក្នុងសំណុំរឿងអាហ្រ្វិក

លោកនាយករដ្ឋមន្រ្តីម៉ាលី Cheikh Modibo Diarra

REUTERS/Ray Stubblebine

ដោយ គួច គន្ធារ៉ា

មហាសន្និបាតអង្គការសហប្រជាជាតិលើកទី៦៧បានបិទបញ្ចប់នៅថ្ងៃច័ន្ទ ទី១ តុលាម្សិលមិញ។ ជាលទ្ធផល មហាសន្និបាតបានកត់សម្គាល់ឃើញពីអសមត្ថភាពរបស់ខ្លួននៅក្នុងដំណោះស្រាយសំណុំរឿងនៅមជ្ឈិមបូព៌ា តែមានការរីកចម្រើនខ្លះពាក់ព័ន្ធនឹងបញ្ហានៅក្នុងទ្វីបអាហ្រ្វិក។ នៅក្នុងទ្វីបអាស៊ីវិញ មហាសន្និបាតបានផ្តល់ពិន្ទុល្អឲ្យទៅប្រទេសភូមា។ អ្វីជាការកត់សម្គាល់ បញ្ហាប៉ាឡេស្ទីនហាក់ដូចជាមិនសូវបានគេចាប់អារម្មណ៍ប៉ុន្មានទេ។

សេចក្តីរាយការណ៍របស់ គួច គន្ធារ៉ា

ស្តាប់ (02:21)

02/10/2012 by គួច គន្ធារ៉ា

សម្រាប់មហាសន្និបាតអង្គការសហប្រជាជាតិឆ្នំានេះ មានថ្នាក់ដឹកនំាជាច្រើនបានលើកយកវិបត្តិក្នុងប្រទេសស៊ីរីទៅនិយាយនៅក្នុងសុន្ទរកថារបស់ខ្លួន។ ទន្ទឹមគ្នានេះ កិច្ចប្រជុំជាច្រើននៅក្រៅក្របខ័ណ្ឌមហាសន្និបាតអង្គការសហប្រជាជាតិក៏បានផ្តោតលើវិបត្តិស៊ីរីដែរ។ តែយ៉ាងណាក៏ដោយ គ្មានដំណោះស្រាយណាមួយត្រូវបានរកឃើញទេ។ ក្រៅពីវត្តមានថ្នាក់ដឹកនំារដ្ឋាភិបាលស៊ីរីបច្ចុប្បន្ន ក៏គេសង្កេតឃើញមានវត្តមានតំណាងអ្នកប្រឆំាងរដ្ឋាភិបាលស៊ីរីដែរ។ ក្រុមអ្នកប្រឆំាងដែលទទួលបានកិច្ចសន្យាជំនួយចំនួន ១៥លានដុល្លារបន្ថែមទៀតពីសហរដ្ឋអាមេរិក ក្រោមរូបភាពជាបរិក្ខារទូរគមនាគមន៍ និងការបង្ហាត់បង្រៀន។

គ្មានទេ ដំណោះស្រាយចំពោះវិបត្តិនៅក្នុងប្រទេសស៊ីរី តែមានការរីកចម្រើនគួរឲ្យកត់សម្គាល់ពាក់ព័ន្ធនឹងវិបត្តិនៅក្នុងប្រទេសម៉ាលី។ កិច្ចប្រជុំមួយរៀបចំដោយលោកអគ្គលេខាធិការអង្គការសហប្រជាជាតិ បាន គីមូន ក្រោមវត្តមានរបស់លោកប្រធានាធិបតីបារំាង François Hollande និងប្រមុខរដ្ឋអាហ្វ្រិកផ្សេងទៀត បានផ្តល់សន្ទុះនយោបាយថ្មីទៀតដល់ជម្លោះនៅក្នុងប្រទេសម៉ាលី។ លោកនាយករដ្ឋមន្រ្តីម៉ាលី Cheikh Modibo Diarra បានស្នើជាផ្លូវការឲ្យមានអន្តរាគមន៍យោធាពីសហគមន៍អន្តរជាតិដើម្បីដណ្តើមយកមកវិញនូវដែនដីប៉ែកខាងជើង។ ជាគោលការណ៍ សំណើនេះត្រូវបានយល់ព្រមហើយ តែអ្វីដែលបន្តស្រពិចស្រពិលនោះ គឺពាក់ព័ន្ធនឹងរឿងថវិកា និងប្រក្រតិទិន។

ងាកទៅមើលទ្វីបអាស៊ីម្តង សុន្ទរកថារបស់លោកប្រធានាធិបតីភូមា ថេន សេនត្រូវបានធ្វើឲ្យមហាសន្និបាតអង្គការសហប្រជាជាតិចាប់អារម្មណ៍ខ្លំាងជាងគេ។ លោក ថេន សេនដែលបានអំពាវនាវសហគមន៍អន្តរជាតិឲ្យសម្លឹងមើលចំណុចវិជ្ចមាននៅភូមា និងធានាថា ភូមាបាននិងកំពុងធ្វើដំណើរនៅលើផ្លូវឆ្ពោះទៅកាន់លទ្ធិប្រជាធិបតេយ្យ។

ចុងក្រោយ និងអ្នកដែលខកចិត្តខ្លំាងជាងគេនោះ គឺភាគីប៉ាឡេស្ទីន។ បន្ទាប់ពីបានទាមទារសុំចូលជាសមាជិកអង្គការសហប្រជាជាតិកាលពីឆ្នំាទៅមិញមក លោកប្រធានរដ្ឋអំណាចប៉ាឡេស្ទីន Mahmoud Abbas បានឡើងថ្លែងសុន្ទរកថារបស់ខ្លួន ចំពេលដែលមានវត្តមានថ្នាក់ដឹកនំាមិនដល់ពាក់កណ្តាលផងនៅក្នុងសាលមហាសន្និបាត។ លោក Abbas បានបញ្ជាក់ថា លោកនឹងស្នើសុំលក្ខន្តិកៈរដ្ឋមួយមិនមែនជាសមាជិករបស់អង្គការសហប្រជាជាតិសម្រាប់ប៉ាឡេស្ទីន។ តែលោកមិនបានប្រាប់ពីថ្ងៃ ខែស្នើសុំពិតប្រាកដទេ ដើម្បីចៀសវាងកុំឲ្យអាមរិកខឹង នៅមុនការបោះឆ្នោតប្រធានាធិបតីអាមេរិកនាថ្ងៃទី៦ វិច្ឆិកាខាងមុខ៕