គណបក្សសិទ្ធិមនុស្សប្រកាសខ្លួនជាគូប្រជែងទី១ របស់គណបក្សប្រជាជន
គណបក្សសិទ្ធិមនុស្សរបស់លោកកឹម សុខា ដែលមានតែបីកៅអីក្នុងរដ្ឋសភាបានបើកសន្និបាតក្រុមប្រឹក្សាជាតិ លើកទី២របស់ខ្លួន នៅថ្ងៃសៅរ៍នេះ នៅឯទីស្នាក់ការគណបក្សនៅទីក្រុងភ្នំពេញ។ សន្និបាតនេះធ្វើឡើងដើម្បីពិនិត្យមើលផែនការយុទ្ធសាស្ត្រសម្រាប់ ការបោះឆ្នោតខាងមុខ។ ដោយមិនខ្វល់ខ្វាយអំពីគណបក្សសម រង្ស៊ីដែលជាបក្សប្រឆាំងធំជាងគេនៅកម្ពុជា លោកកឹម សុខា បានប្រកាសថា គណបក្សសិទ្ធិមនុស្សរបស់លោកកំពុងក្លាយជាគូប្រជែងទី១របស់គណបក្ស កាន់អំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ទោះបីជាគណបក្សសិទ្ធិមនុស្សមានតែបីកៅអីក្នុងរដ្ឋសភាក៏ដោយ ក៏លោក កឹម សុខា ប្រធាននេះបានប្រកាស ដោយឥតរារែក នៅថ្ងៃនេះថា អំណើះតទៅមានតែគណបក្សសិទ្ធិមនុស្សតែ១ប៉ុណ្ណោះដែលប្រជែងតទល់ជាមួយគណបក្សកាន់អំណាច ដើម្បីឲ្យមានការផ្លាស់ប្តូរសម្រាប់ការបោះឆ្នោតជាតិ នៅឆ្នាំ២០១៣។ សេចក្តីថ្លែងការណ៍របស់លោកកឹម សុខាបានធ្វើឡើង នៅក្នុងសន្និបាតក្រុមប្រឹក្សាជាតិលើកទី២របស់គណបក្សសិទ្ធិមនុស្ស នៅព្រឹកថ្ងៃទី៣០កក្កដា ឆ្នាំ២០១១នេះ។
ចំពោះមុខសកម្មជនច្រើនរយនាក់ដែលបានមកជួបជុំ នៅទីស្នាក់ការកណ្តាលគណបក្សសិទ្ធិមនុស្ស នៅទីក្រុងភ្នំពេញ លោក កឹម សុខា បានអះអាងថា គណបក្សសិទ្ធិមនុស្សរបស់លោកមានសកម្មជនមកពីគណបក្សជាច្រើនបានមកចូលរួម ដូចជា សកម្មជនគណបក្សសម រង្ស៊ី, ហ្វ៊ុនស៊ិនប៉ិច, គណបក្ស នរោត្តម រណឫទ្ធិ រួមទាំងមកពីគណបក្សកាន់អំណាចទៀតផង។
កាលពីពេលថ្មីៗនេះ លោកនាយករដ្ឋមន្ត្រីហ៊ុន សែន បានបញ្ចេញឯកសារសម្ងាត់មួយស្តីពីកិច្ចសន្ទនាតាមទូរស័ព្ទជាមួយលោកកឹម សុខា។ កិច្ចសន្ទនាដែលនាំឲ្យមនុស្សជាច្រើនជឿថា គណបក្សសិទ្ធិមនុស្សបានកកើតឡើង ក្រោមការជួយជ្រោមជ្រែងរបស់លោកនាយករដ្ឋមន្ត្រី។ ឯកសារសម្ងាត់នេះបានកាត់ផ្តាច់ចំណងមេត្រីភាពរវាងគណបក្សសិទ្ធិមនុស្សជាមួយគណបក្សសម រង្ស៊ីជារៀងរហូតមក។
យ៉ាងណាក៏ដោយ នៅថ្ងៃនេះ លោកកឹមសុខាបានរិះគន់រដ្ឋាភិបាលរបស់លោកនាយករដ្ឋមន្ត្រីហ៊ុន សែន ថា មិនអាចដោះស្រាយបញ្ហាជាតិសំខាន់ៗ ដូចជា បញ្ហាបូរណភាពទឹកដី, ការកាប់បំផ្លាញព្រៃឈើ និងអំពើពុករលួយជាដើម។ លោកកឹម សុខាក៏មិនភ្លេចវាយប្រហារលើអតីតដៃគូរបស់ខ្លួនក្នុងសម្ព័ន្ធភាពអ្នកប្រឆាំងដែរ។ លោកអះអាងថា គណបក្សសម រង្ស៊ី មិនគោរពឆន្ទៈរបស់ប្រជាពលរដ្ឋដែលចង់ឲ្យគណបក្សនេះរួបរួមជាមួយគណបក្សសិទ្ធិមនុស្ស។
លើសពីនេះ ប្រធានគណបក្សសិទ្ធិមនុស្សអះអាងថា គណបក្សនៅក្រៅរដ្ឋាភិបាលបច្ចុប្បន្នក៏កំពុងរង្គោះរង្គើយ៉ាងខ្លាំងដែរ។ ដូច្នេះ មានតែគណបក្សសិទ្ធិមនុស្សមួយប៉ុណ្ណោះដែលកំពុងក្លាយទៅជាអ្នកប្រជែងតែមួយគត់ ជាមួយគណបក្សប្រជាជនកម្ពុជា ក្នុងការបោះឆ្នោត នាពេលខាងមុខ។ ការបោះឆ្នោតដែលគណបក្សសម រង្ស៊ីសង្ឃឹមថា មានសំឡេងគាំទ្រកើនឡើង រីឯគណបក្សប្រជាជនបានព្យាករថាខ្លួននឹងដណ្តើមយកឲ្យបានជាង១០០កៅអីឯណោះ ក្នុងចំណោម ១២៣ កៅអីក្នុងរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ