កាដាហ្វីប្រហែលជាបានផ្តល់ហិរញ្ញប្បទានឲ្យសាកូហ្ស៊ីសម្រាប់ធ្វើការឃោសនាបោះឆ្នោតនៅឆ្នាំ២០០៧
មូអាម៉ារ កាដាហ្វី មេដឹកនាំនៃរបបផ្តាច់ការលីប៊ីប្រហែលជាបានផ្តល់ហិរញ្ញប្បទានឲ្យលោកនីកូឡាសាកូហ្ស៊ីសម្រាប់ធ្វើការឃោសនាបោះឆ្នោតជ្រើសតាំងប្រធានាធិបតីបារាំងនៅឆ្នាំ២០០៧។ នេះជាការបង្ហើបឲ្យដឹងដោយគេហទំព័រនៃព័ត៌មានបារាំងឈ្មោះ Mediapart ដែលបានផ្សាយនៅថ្ងៃសៅរ៍ទី២៨មេសាបង្ហាញឲ្យឃើញនូវឯកសារផ្លូវការចេញពីក្រសួងយកការសម្ងាត់លីប៊ី។ ទាំងនេះធ្លាក់ចំពេលមួយសប្តាហ៍មុនការបោះឆ្នោតប្រធានាធិបតីនៅជុំទីពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
៥០លានអឺរ៉ូគឺជាចំនួនទឹកប្រាក់ដែលប្រហែលជាមូអាម៉ារ កាដាហ្វី មេដឹកនាំនៃរបបផ្តាច់ការលីប៊ី បានផ្តល់ជាហិរញ្ញប្បទានឲ្យលោកនីកូឡាសាកូហ្ស៊ីសម្រាប់ធ្វើការឃោសនាបោះឆ្នោតជ្រើសតាំងប្រធានាធិបតីបារាំងនៅឆ្នាំ២០០៧។ ៥០លានអឺរ៉ូនេះបានឲ្យទៅលោក Brice Hortefeux ដែលបន្ទាប់មកបានក្លាយជារដ្ឋមន្ត្រី។ លោក Brice Hortefeux ជាមិត្តជំនិតរបស់លោកនីកូឡាសាកូហ្ស៊ី ហើយក៏ជាមិត្តភ័ក្តិរបស់ឈ្មួញអន្តរជាតិម្នាក់ឈ្មោះ Ziad Takieddine ។ នេះជាការបង្ហើបឲ្យដឹងដោយគេហទំព័រនៃព័ត៌មានបារាំងឈ្មោះ Mediapart ដែលបានផ្សាយនៅថ្ងៃសៅរ៍ទី២៨មេសាឆ្នាំ២០១២ម្សិលមិញ ដោយមានភ្ជាប់មកជាមួយនូវឯកសារជាសំអាង។
ឯកសារនោះចុះថ្ងៃទី១០ធ្នូឆ្នាំ២០០៦ដែលមានហត្ថលេខារបស់លោក Moussa Koussa ដែលកាលណោះមានមុខតំណែងជាប្រមុខយកការសម្ងាត់លីប៊ី។ ឯកសារដែលនិយាយពីកិច្ចព្រមព្រៀងដែលសម្រេចបាននាឱកាសជំនួបប្រជុំនៅថ្ងៃទី៦តុលាឆ្នាំ២០០៦។
បើយោងតាមអ្នកស្គាល់របបគ្រប់គ្រងផ្តាច់ការលីប៊ី ឯកសារនេះជាឯកសារមានលក្ខណៈសមស្របចេញពីក្រសួងយកការសម្ងាត់លីប៊ី។ ហើយឈ្មួញអន្តរជាតិឈ្មោះ Ziad Takieddine បានបញ្ជាក់ថា លោកគ្មានវត្តមានឡើយនាឱកាសជំនួបប្រជុំនោះ ក៏ប៉ុន្តែលោក Ziad Takieddine ក៏ពុំបានប្រកែកពីលក្ខណៈពិតប្រាកដនៃឯកសារនោះដែរ នេះបើយោងតាម Mediapart ។
ពាក់ព័ន្ធនឹងបញ្ហានេះ លោកប្រធានាធិបតីបារាំងនីកូឡាសាកូហ្ស៊ីធ្លាប់បានឆ្លើយតបតាមរយៈទូរទស្សន៍បារាំង TF1 ថា “ជាការចោទប្រកាន់ពុំសមហេតុផល”។ ចំណែកឯអ្នកនាំពាក្យម្នាក់របស់លោកហ្វ្រង់ស្វ័រ ហូឡង់បានទាមទារឲ្យលោកនីកូឡាសាកូហ្ស៊ីថ្លែងពន្យល់ប្រជាជនបារាំងពីបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ