ចៅក្រម Laurent Kasper-Ansemet កំពុងធ្វើការងារនៅសាលាក្តីខ្មែរក្រហម
មួយសប្តាហ៍ហើយដែលចៅក្រម Laurent Kasper-Ansemet បានមកដល់ការិយាល័យសហចៅក្រមស៊ើបអង្កេតនៅក្នុងសាលាក្តីខ្មែរក្រហម។ មន្ត្រីនៃការិយាល័យកិច្ចការសាធារណៈបានអះអាងថា ចៅក្រមជនជាតិស្វីសនេះបានចាប់ផ្តើមធ្វើការងារធម្មតា។ គឺការងារជាសហចៅក្រមស៊ើបអង្កេតអន្តរជាតិបម្រុងសម្រាប់ភាគីខ្មែរ តែជាការងារពេញសិទ្ធក្នុងឋានៈជាសហចៅក្រមស៊ើបអង្កេតអន្តរជាតិសម្រាប់ភាគីអន្តរជាតិ។
ចុះផ្សាយនៅថ្ងៃ៖
ស្តាប់ - ០១:៥៥
ចៅក្រម Laurent Kasper-Ansemet កំពុងធ្វើការងារនៅក្នុងការិយាល័យសហចៅក្រមស៊ើបអង្កេតនៅក្នុងតុលាការខ្មែរក្រហម នេះបើតាមការបញ្ជាក់របស់លោកនេត្រ ភត្រាមន្ត្រីអ្នកនាំពាក្យសាលាក្តីខ្មែរក្រហម។
ចៅក្រមជនជាតិស្វីស Laurent Kasper-Ansemet បានប្រាប់វិទ្យុបារាំងអន្តរជាតិថា លោកបានមកដល់រាជធានីភ្នំពេញនៅថ្ងៃទី២៩មករា។ ប៉ុន្តែលោកសុំមិនធ្វើអត្ថាធិប្បាយអ្វីឡើយនៅក្នុងពេលនេះ។ ស្ថានភាពនេះ ជាស្ថានភាពចម្រូងចម្រាស់រវាងរដ្ឋាភិបាលកម្ពុជានិងអង្គការសហប្រជាជាតិដែលបានបកស្រាយផ្សេងគ្នានិយមន័យនៃនីតិវិធីនៃការតែងតាំងសហចៅក្រមស៊ើបអង្កេតបម្រុងអន្តរជាតិក្នុងករណីតំណែងសហចៅក្រមស៊ើបអង្កេតនៅទំនេរ។
ចៅក្រម Laurent មិនមានអត្ថាធិប្បាយអ្វីឡើយនៅពេលនេះ ប៉ុន្តែមុនមកដល់កម្ពុជា លោកចៅក្រមរូបនេះដែលមានទំព័របណ្តាញសង្គមTwitter និង Facebookផងនោះ បានសរសេរនៅក្នុងទំព័ររបស់លោកដោយដាក់ជាសំណួរថា តើការដែលគេដឹងអំពីការតាំងចិត្តរបស់លោកក្នុងការស៊ើបអង្កេតសំណុំរឿង ០០៣និង ០០៤ គឺជាមូលហេតុដែលគេមិនជ្រើសតាំងលោកជាផ្លូវការជាសហចៅក្រមស៊ើបអង្កេតអន្តរជាតិ?
បើតាមអះអាងរបស់អ្នកនាំពាក្យសាលាក្តីខ្មែរក្រហម ការងារមួយចំនួនត្រូវការការយល់ព្រមពីចៅក្រមទាំងពីរទើបអាចដំណើរការបាន។ ហើយថាសហចៅក្រមស៊ើបអង្កេតជាតិបានបញ្ជាក់ហើយថា លោកចៅក្រម Laurent មិនទាន់ទទួលបាននីតិសម្បទាពេញលេញជាសហចៅក្រមស៊ើបអង្កេតអន្តរជាតិឡើយ។
លោកមេធាវីសុខ សំអឿនប្រធានក្រុមអ្នកច្បាប់ការពារសិទ្ធិកម្ពុជាដែលជាអ្នកតាមដានដំណើរការសាលាក្តីខ្មែរក្រហមដែរនោះ បានអត្ថាធិប្បាយការអវត្តមាននៃកិច្ចសហការពីខាងភាគីកម្ពុជា នឹងធ្វើអោយប៉ះពាល់ដល់ដំណើរការស៊ើបអង្កេតករណី០០៣ និង០០៤។
ហើយអ្នកតាមដានរូបនេះបន្តថា លោកព្រួយបារម្ភថា ការមិនទទួលស្គាល់តួនាទីពេញសិទ្ធពីភាគីកម្ពុជា ចំពោះលោកចៅក្រម Laurent អាចធ្វើអោយប៉ះពាល់ដល់ករណី០០២ដែលកំពុងនៅក្នុងសវនាការនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ