លោកJohn Kerry ទស្សនកិច្ចប្រទេសកាណាដា
កាលពីថ្ងៃអង្គារម្សិលម៉ិញ ប្រមុខការទូតសហរដ្ឋអាមេរិក លោក John Kerry បានទស្សនកិច្ចនៅទីក្រុងអូតាវ៉ា រដ្ឋធានីប្រទេសកាណាដា។ ទស្សនកិច្ចប្រព្រិត្តទៅមួយសប្តាហ៍ក្រោយការវាយប្រហារចំនួនពីរលើកដាច់ដោយឡែកពីគ្នានៅប្រទេសកាណាដា។ ទស្សនកិច្ចនេះត្រូវបានគេយល់ឃើញថា ជាការបង្ហាញសាមគ្គីភាពរវាងប្រទេសជិតខាងទាំងពីរ ជាពិសេសការគាំទ្ររបស់សហរដ្ឋក្នុងកិច្ចសហការប្រយុទ្ធប្រឆាំងអំពើរភេរវកម្ម។
ចុះផ្សាយនៅថ្ងៃ៖
ស្តាប់ - ០១:២៩
ទស្សនកិច្ចខ្លីរយៈពេលមួយថ្ងៃនេះបានចាប់ផ្តើមឡើងដោយលោក John Kerry រដ្ឋមន្រ្តីការបរទេសអាមេរិកនិងលោក John Baird រដ្ឋមន្ត្រីការបរទេសកាណាដា ដាក់កំរងផ្កានៅបូជីយដ្ឋានរំលឹកអនុស្សាវរីយ៍យុទ្ធជនពលីសម័យសង្គ្រាមលោក។ ការគោរពវិញ្ញាណក្ខន្ធនេះក៏ជានិមិត្តរូបឩទ្ទិសដល់ទាហានកាណាដាចំនួនពីរនាក់ ដែលបានស្លាប់បាត់បង់ជីវិតកាលពីសប្តាហ៍មុន ក្នុងព្រិត្តិការណ៍វាយប្រហារជាលក្ខណៈភេរវកម្មពីរដាច់ដោយឡែកពីគ្នា។
បន្ទាប់មក ប្រមុខការទូតទាំងពីរបានជួបពិភាក្សាគ្នាដោយផ្តោតលើប្រធានបទសំខាន់ៗដូចជា ការគំរាមកំហែងរបស់ក្រុមអង្គការរដ្ឋអ៊ីស្លាម ស្ថានភាពវិបត្តិនៅអ៊ុយក្រែន ការត្រួតពិនិត្យសន្តិសុខព្រំដែនកាណាដា-សហរដ្ឋអាមេរិក និងសន្តិសុខផែ្នកថាមពលរវាងប្រទេសទាំងពីរ។ នៅក្នុងជំនួបពិភាក្សាជាមួយអ្នកសារព័ត៌មាន លោក Kerry បានថ្លែងពី «ឯកភាព» និង «ការប្តេជ្ញាចិត្ត» ដែលប្រទេសកាណាដាបង្ហាញចំពោះមុខព្រិត្តិការណ៍វាយប្រហារបែបភេរវកម្មកាលពីសប្តាហ៍មុន។ លោកក៏បានថ្លែងសារបង្ហាញពីសាមគ្គីភាព មិត្តភាពដ៏ជ្រាលជ្រៅ និងការកោតសរសើរដល់ជាប្រជាពលរដ្ឋកាណាដា។
ដោយទុកអោយអាជ្ញាធរកាណាដាប្រកាសសេចក្តីសន្និដ្ឋានជាផ្លូវការក្រោយការស៊ើបអង្កេត ប្រមុខការទូតអាមេរិករូបនេះបានថ្កោលទោសការវាយប្រហារនេះ។ លោកក៏បានបញ្ជាក់ពីគំរោងផែនការកែរប្រែផែនការសន្តិសុខរវាងប្រទេសទាំងពីរ ដើម្បីបង្ការ និងចៀសវាងមិនអោយមានហេតុការណ៍នេះកើតឡើងទៀតទៅថ្ងៃអនាគត។
ប្រមុខការទូតទាំងពីរក៏បានឯកភាពគ្នាលើចំនុចរួមក្នុងយុទ្ធនាការប្រឆាំងក្រុមអង្គការរដ្ឋអ៊ីស្លាមក្នុងនោះគឺ ការធ្វើសង្គ្រាមបែបយោធា ការទប់ស្កាត់មធ្យោបាយហិរញ្ញវត្ថុរបស់ក្រុមនោះ និងការកាត់ផ្តាច់ការផ្សព្វផ្សាយមនោគមន៍វិជ្ជាជ្រុលនិយមនៅតាមបណ្តាញអ៊ិនធ័រណេត និងបណ្តាញសង្គម។
ទស្សនកិច្ចរយៈពេលមួយថ្ងៃរបស់លោក John Kerry បានបញ្ចប់តាមរយៈជំនួបពិភាក្សាជា មួយ លោកនាយករដ្ឋមន្ត្រីកាណាដា Stephen Harper។ សូមបញ្ជាប់ថាលោក John Kerry និងលោក Barak Obama ត្រូវរដ្ឋាភិបាលកាណាដាទទួលស្គាល់ថា ជាឥសរ្សជនពីររូបតំបូងគេបង្អស់ ដែលបានបង្ហាញប្រតិកម្មភ្លាមៗក្រោយព្រិត្តិការណ៍វាយប្រហារកាលពីសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ