អនុប្រធានាធិបតីអាមេរិកថ្កោលទោសរុស្ស៊ីថារឹបអូសទឹកដីគ្រីមេ
ប្រតិកម្មបានធា្លក់មកជាហូរហែ បន្ទាប់ពីលោកប្រធានធិបតីរុស្ស៊ី ពូទីន បានចុះ ហត្ថលេខា លើសន្ធិសញ្ញា ភ្ជាប់គ្រីមេនឹងរុស្ស៊ី នៅរសៀលថ្ងៃអង្គារទី១៨មីនា។ ជាមួយនឹងការគំរាម ដាក់ទណ្ឌកម្មថ្មីបន្ថែមទៀត លោក ចូ បៃឌិន (Joe Biden) អនុប្រធានាធិបតីអាមេរិក ដែលកំពុងបំពេញទស្សនកិច្ចនៅប្រទេសប៉ូឡូញជិតខាងអ៊ុយក្រែន បានថ្កោលទោសរុស្ស៊ី និងចាត់ទុកសកម្មភាពក្តោបយកគ្រីមេមកធ្វើជាចំណុះរុស្ស៊ី ថាជា"ការរឹបអូសទឹកដី"។
ចុះផ្សាយនៅថ្ងៃ៖
“រុស្ស៊ីបានចុះហត្ថលេខាលើសន្ធិសញ្ញាទទួលយកគ្រីមេជារបស់ខ្លួន ដែលមានតម្លៃស្មើនឹងការរឹបអូសយកទឹកដី” ! នេះជាប្រសាសន៍របស់លោក ចូ បៃឌិន ពីទីក្រុងវ៉ាសូវី ប្រទេសប៉ូឡូញ តបទៅនឹងសុន្ទរកថារបស់ប្រធានាធិបតីរុស្ស៊ីពូទីន ដែលទើបបានចុះហត្ថលេខាលើសន្ធិសញ្ញាព្រមព្រៀងជាប្រវត្តិសាស្ត្រភ្ជាប់គ្រីមេ នឹងរុស្ស៊ី ជាមួយប្រមុខដឹកនាំរដ្ឋាភិបាលគ្រីមេ ស្និទ្ធនឹងម៉ូស្គូ។
ក្រៅអំពីពាក្យថ្កោលទោស លោកចូ បៃឌិន ក៏បានបញ្ជាក់ជំហរដាច់ខាតរបស់អាមេរិក ក្នុងការបន្ថែមទណ្ឌកម្មលើរុស្ស៊ី និងរុញរុស្ស៊ីឱ្យកាន់តែឯកាលើឆាកអន្តរជាតិ។ អាមេរិកនឹងបើកជំនួបប្រជុំពិសេស នៅសប្តាហ៍ក្រោយ ជាមួយនឹងសម្ព័ន្ធមិត្តសហភាពអឺរ៉ុប ដើម្បីរិះរកមធ្យោបាយធានាសុវត្ថិភាពថាមពល ជាពិសេសថាមពលឧស្ម័នដែលសមាជិកសហភាពអឺរ៉ុបខ្លះរំពឹងយ៉ាងខ្លាំងលើរុស្ស៊ី។
សូមបញ្ជាក់ថាលោកអនុប្រធានាធិបតីអាមេរិក អញ្ជើញទៅបំពេញទស្សនកិច្ចនៅប្រទេសប៉ូឡូញ ថ្ងៃអង្គារនេះ ដើម្បីបង្ហាញពីសម្ព័ន្ធភាព និងការគិតគូររបស់អាមេរិកចំពោះប្រទេសជាមិត្ត ប្រឈមនឹងការគំរាមកំហែងរបស់រុស្ស៊ីលើអ៊ុយក្រែន។ បន្ទាប់ពីជួបពិភាក្សាជាមួយនឹងប្រធានាធិបតីប៉ូឡូញ លោកបៃឌិនបានបន្តជួបជាមួយប្រធានាធិបតីអេស្តូនី នៅក្រុងវ៉ាសូវី និងត្រូវជួបពិគ្រោះជាមួយប្រធានាធិបតីលីទុយអានី នៅថ្ងៃពុធនេះ។
ទស្សនកិច្ចមួយជុំនៅអឺរ៉ុបខាងកើតរបស់លោកអនុប្រធានាធិបតី ជាសារមួយបញ្ជាក់យ៉ាងច្បាស់ទៅកាន់អ្នកដែលចង់បង្កអស្ថិរភាពក្នុងតំបន់ថាអាមេរិកសម្ព័ន្ធមិត្តអូតង់ គោរពនិងការពារជានិច្ចប្រយោជន៍យោធារួម។ ដើម្បីធានារ៉ាប់រងការពារមិត្តនៅអឺរ៉ុបខាងកើត អាមេរិកបានបញ្ជូនជាស្រេចយន្តហោះប្រដេញប្រភេទ F-១៦ យន្តហោះដឹកជញ្ជូននិងទាហាន៣០០នាក់មកប៉ូឡូញ។ អាមេរិកក៏បានបញ្ជូនយន្តហោះប្រដេញ F-១៥ ប្រាំមួយគ្រឿងដែរសម្រាប់ពង្រឹងការល្បាតត្រួតពិនិត្យតំបន់បាល់ទិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ