ជប៉ុន -

អត្ថបទចុះផ្សាយនៅថ្ងៃ អង្គារ 09 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 09 តុលា 2012

ជប៉ុនប្រទេសរងគ្រោះស៊ូណាមីចែករំលែកបទពិសោធន៍ដល់ពិភពលោក

ជំនួបពិភាក្សានៅសេនដៃ ស្តីពីការដកមេរៀនពីគ្រោះ មហន្តរាយធម្មជាតិ

ដោយ អៀង សុខម៉ិញ

មេដឹកនាំនយោបាយ និងសមាគមមនុស្សធម៌ មកពីគ្រប់ជ្រុងនៃពិភពលោក ត្រូវជួបប្រជុំគ្នាពីរថ្ងៃ ចាប់ពីថ្ងៃអង្គារទី ៩ តុលានេះទៅ នៅក្រុង Sendai ភាគឦសានប្រទេសជប៉ុន ដើម្បីរៀបជាមេរៀន សម្រាប់គ្រប់គ្នាយកទៅប្រើប្រាស់ការពារប្រទេស ពីគ្រោះមហន្តរាយមហន្តរាយធម្មជាតិ។ គ្រោះមហន្តរាយរញ្ជួយដី និងរលកស៊ូណាមី កាលពីថ្ងៃទី ១១ មីនា ឆ្នាំ២០១១ ដែលបានធ្វើតំបន់ឦសានជប៉ុនមួយភាគហិនហោចខ្ទេចខ្ទីស្ទើរបាត់ពីផែនទី ជាបទពិសោធន៍ចំបងមួយនៃការផ្តួចផ្តើមបង្កើត គម្រោងការពារគ្រោះធម្មជាតិ សំរាប់ពិភពលោកទាំងមូល។

សេចក្តីរាយការណ៍របស់ អៀង សុខម៉ិញ

ស្តាប់ (02:06)

09/10/2012

“ដាក់ការការពារគ្រោះមហន្តរាយធម្មជាតិ ជាចំណែកមួយនៃគម្រោងជំនួយអភិវឌ្ឍន៍” ! នេះហើយជាកម្មវត្ថុនៃជំនួបប្រជុំសេនដៃ (Sendai) គូសបញ្ជាក់ដោយលោក Kazushige Taniguchi តំណាងធនាគារពិភពលោកនៅជប៉ុន។ សម្រាប់លោក Taniguchi មានប្រទេសកំពុងអភិវឌ្ឍន៍ច្រើនណាស់ ដែលសាងសង់ហេដ្ឋារចនាសម្ព័ន្ធដោយគ្មានគិតខ្វល់ខ្វាយនឹងការការពារគ្រោះមហន្តរាយធម្មជាតិ។

លោកស្រី Christine Lagarde អគ្គនាយិកាFMI និងលោក Jim Yong Kim ប្រធានធនាគារពិភពលោក ត្រូវអញ្ជើញទៅពិនិត្យដោយផ្ទាល់តំបន់រងគ្រោះរញ្ជួយដី និងស៊ូណាមី នៅថ្ងៃពុធស្អែក ដែលជាថ្ងៃទីពីរនៃការជជែកពិភាក្សាដកស្រង់ពិសោធន៍ នៅទីក្រុងសេនដៃ ក្នុងក្របខ័ណ្ឌជំនួបកំពូលប្រចាំឆ្នាំអង្គការមូលនិធិរូបិយវត្ថុអន្តរជាតិ និងធនាគារពិភពលោក នៅទីក្រុងតូក្យូ ចុងសប្តាហ៍នេះ។ រាល់កិច្ចពិភាក្សានៅសេនដៃនឹងបញ្ជូនទៅកាន់គណៈកម្មាធិការអភិវឌ្ឍន៍ ដែលជាស្ថាប័នកំពូលរបស់អង្គការមូលនិធិរូបិយវត្ថុអន្តរជាតិ និងធនាគារកណ្តាលពិភពលោក ជាអ្នកសម្រេចចេញសេចក្តីថ្លែងការណ៍ចុងក្រោយ។

សេនដៃ ជាក្រុងរងគ្រោះខ្លាំងជាងគេបំផុតមួយ ពីគ្រោះរញ្ជួយដី និងរលកយក្សស៊ូណាមី ថ្ងៃទី ១១ មីនា ឆ្នាំ២០១១ និងរាលដាលជាគ្រោះនុយក្លេអ៊ែរនៅហ្វូគូស្ហ៊ីម៉ា។ តាមរយៈវិញ្ញាសារងគ្រោះមរណៈនេះ ជប៉ុននិងធនាគារកណ្តាលបានបោះផ្សាយរបាយការណ៍៣២ចំណុច ក្នុងអត្ថន័យចែករំលែកមេរៀនដែលជប៉ុនបានឆ្លងកាត់។

អ្នកនិពន្ធបានស្នើសុំឱ្យមានការចែកចាយផែនទីបញ្ជាក់ពីតំបន់ងាយរងគ្រោះ និងរៀបចំដាក់ប្រព័ន្ធប្រកាសអាសន្នមុនគ្រោះមហន្តរាយមកដល់។ ណែនាំឱ្យរោងចក្រប្រុងប្រយ័ត្នផ្នែកផ្គត់ផ្គង់ ហើយការសិក្សាក៏បានបង្ហាញឱ្យឃើញផងដែរ អំពីផលប្រយោជន៍នៃប្រព័ន្ធសង្គមតាមអ៊ីនធឺណែត ដែលអាចជួយធ្វើប្រតិបត្តិការស្វែងរក និងប្រមូលជំនួយ។ លទ្ធភាពលឿនរហ័សនៃការកសាងលំនៅដ្ឋានបណ្តោះអាសន្ន និងរក្សាប្រាក់ចំណូលឱ្យជនរងគ្រោះ គួរតែត្រូវបានគិតគូរ យ៉ាងហោចណាស់នៅពេលភ្លាមៗ៕