អ៊ីរ់ង់ -

អត្ថបទចុះផ្សាយនៅថ្ងៃ ចន្ទ 02 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 02 កក្កដា 2012

ការបាញ់សាកល្បងកាំជ្រួចមីស្ស៊ីលនៅវាលខ្សាច់អ៊ីរ៉ង់

ការបាញ់សាកល្បងកាំជ្រួច Saeqeh នៅប៉ែកខាងត្បូងប្រទេសអ៊ីរ៉ង់ជិតច្រកសមុទ្រOrmuz

AFP PHOTO/FARS NEWS/MEHDI MARIZAD

ដោយ នុយ ប៊ែរណាដែត

ប្រទេសអ៊ីរ៉ង់ចាប់ពីថ្ងៃចន្ទ២កក្កដានេះទៅ រហូតដល់ថ្ងៃពុធ៤កក្កដា ចាប់ផ្តើមសាកល្បងកាំជ្រួចមីស្ស៊ីលនៅតំបន់វាលខ្សាច់មួយដើម្បីប្រឈមមុខទល់នឹងការគំរាមតាមផ្លូវយោធាជាយថាហេតុពីសំណាក់អ៊ីស្រាអែលនិងសហរដ្ឋអាមេរិក-នេះជាអំណះអំណាងរបស់ពួកឆ្មាំបដិវត្តន៍ឲ្យដឹងនៅថ្ងៃអាទិត្យម្សិលមិញ១កក្កដា។

សេចក្តីរាយការណ៍របស់ នុយ ប៊ែរណាដែត

ស្តាប់ (02:30)

02/07/2012

មីស្ស៊ីលបាញ់ពីដី ទៅកាន់ ដីមួយទៀត បាញ់ បានឆ្ងាយ មធ្យម និង ជិត ត្រូវបានផ្តើមបាញ់ សាកល្បងជាច្រើនគ្រាប់ចេញពីតំបន់ផ្សេងៗគ្នានៅព្រឹកមិញនេះ នៅប្រទេសអ៊ីរ៉ង់ទៅកាន់មូលដ្ឋានទ័ពអាកាសដូចគ្នានឹងមូលដ្ឋានកងកម្លាំងទ័ពនៅក្រៅតំបន់អ៊ីចឹងដែរ-នេះជាការបញ្ជាក់អះអាងរបស់លោកឧត្តមសេនីយអ៊ីរ៉ង់ Amir Ali Hajizadeh ទទួលបន្ទុកផ្នែកប្រព័ន្ធមីស្ស៊ីលនៅក្នុងកងពលអាកាសអ៊ីរ៉ង់។

មីស្ស៊ីល

IRNA

ការធ្វើសមយុទ្ធទាំងនេះ គឺជាសារមួយរបស់ប្រទេសអ៊ីរ៉ង់ ទៅកាន់ បណ្តាប្រជាជាតិចូលចិត្តផ្សងព្រេងថា កងទ័ពឆ្មាំបដិវត្តន៍អ៊ីរ៉ង់ បានត្រៀមខ្លួនជាស្រេច ក្នុងការប្រឈមមុខតទល់នឹងប្រទេសទាំងឡាយណាដែលសម្លុតបំភ័យបន្លាចប្រទេសអ៊ីរ៉ង់និងធ្វើការវាយសងសឹកតបតវិញប្រសិនបើអ៊ីរ៉ង់ អាចនឹងទទួលរងគ្រោះជាយថាហេតុពីសំណាក់បច្ចាមិត្តដោយប្រការណាមួយ-នេះជាសេចក្តីថ្លែងបន្ថែមរបស់ ឧត្តមសេនីយអ៊ីរ៉ង់ Amir Ali Hajizadeh ដែលផ្សាយនៅលើវិបសៃយ៍នៃឆ្មាំបដិវត្តន៍អ៊ីរ៉ង់ឈ្មោះ Sepah News។

គួររំលឹកថា អ៊ីរ៉ង់បានធ្វើសមយុទ្ធបែបនេះជាញយដងមកហើយនៅក្នុងអតីតកាល ក៏ប៉ុន្តែការបង្ហាញសាច់ដុំជាថ្មីនេះ គឺហាក់បីដូចជាអ៊ីរ៉ង់ចង់ព្រមានប្រាប់ជាមុនដែរថា« អ៊ីរ៉ង់មានសមត្ថភាពគ្រប់គ្រាន់អាចវាយប្រហារទៅដល់ទីតាំងយោធានានារបស់អាមេរិកាំងនៅក្នុងបណ្តាប្រទេសជិតខាង-ដូចជានៅអាហ្វហ្កានីស្ថាន-បារ៉ែន-កូវែតនិងនៅអារ៉ាប៊ីសាអ៊ូឌីតជាដើម ក្នុងករណីមានការវាយប្រហារពីសំណាក់សហរដ្ឋអាមេរិកឬអ៊ីស្រាអែលមកលើសាធារណរដ្ឋអ៊ីស្លាមអ៊ីរ៉ង់។
.
មួយវិញទៀត យោងតាមលោកឧត្តមសេនីយ Hajizadeh ការបាញ់សាកល្បងមីស្ស៊ីលទាំងនេះក្រោមឈ្មោះថា« ព្យាការីដ៏មហិមាទី៧ គឺដើម្បីអាចឲ្យគេសាកល្បងមើលប្រសិទ្ធិភាពនៃប្រព័ន្ធមីស្ស៊ីលទាំងនេះទៅលើមូលដ្ឋានយោធាក្លែងក្លាយនៅវាលខ្សាច់ Kavir នៅចំកណ្តាលប្រទេសអ៊ីរ៉ង់។

ឧត្តមសេនីយអ៊ីរ៉ង់ដដែលនេះ បានគូសបញ្ជាក់ទៀតថា"មីស៊ីលពីរធុន អាចនឹងប្រើប្រាស់គឺ មីស៊ីល Quiam ដែលអាចបាញ់ចម្ងាយបាន៥០០គមនិងមីស៊ីលធុន Khalij Fars ជាមីស្ស៊ីលប្រឆាំងនាវាចម្បាំងអាចបាញ់បានចម្ងាយ៣០០គម។

សូមបញ្ជាក់ថា ជាមួយ missiles Shahab-3អ៊ីរ៉ង់ អាចវាយប្រហារ រហូតដល់ចម្ងាយ២០០០គម ទាំងដល់ប្រទេសអ៊ីស្រាអែលទៀតផង៕