អ៊ីរ៉ង់-ស៊ីរី -

អត្ថបទចុះផ្សាយនៅថ្ងៃ ព្រហស្បតិ៍ 20 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 20 កញ្ញា 2012

តេហេរ៉ង់ផ្តល់សព្វាវុធយ៉ាងច្រើនឲ្យស៊ីរីដោយឆ្លងកាត់តាមអ៊ីរ៉ាក់

អគ្គបញ្ជាការនៃឆ្មាំបដិវត្តន៍អ៊ីរ៉ង់ Ali Jafari ទទួលស្គាល់ថាមានសមាជិកនៃឆ្មាំបដិវត្តន៍អ៊ីរ៉ង់បានផ្តល់ជំនួយមិនមែនយោធាឲ្យទៅប្រទេសស៊ីរីនិងប្រទេសលីបង់

Flickr

ដោយ សៀក សារិន

ប្រទេសអ៊ីរ៉ង់បានប្រើអាកាសចរណ៍ស៊ីវិលសម្រាប់ធ្វើការដឹកជញ្ជូនយោធានិងសព្វាវុធយ៉ាងច្រើនឲ្យទៅប្រទេសស៊ីរី ដោយឆ្លងកាត់តាមដែនអាកាសនៃប្រទេសអ៊ីរ៉ាក់ដើម្បីជួយគាំទ្ររបបគ្រប់គ្រងបាស្ហារអាល-អាស្សាដក្នុងការវាយបង្ក្រាបក្រុមបះបោរស៊ីរី។ នេះបើយោងតាមរបាយការណ៍នៃក្រសួងយកការណ៍លោកខាងលិច។

សេចក្តីរាយការណ៍របស់សៀក សារិន

ស្តាប់ (03:20)

20/09/2012 by សៀក សារិន

សហរដ្ឋអាមេរិកតែងចោទសួរជានិច្ចអាជ្ញាធរអ៊ីរ៉ាក់ស្តីពីដំណើរហោះហើរនៃយន្តហោះអ៊ីរ៉ង់ ដែលគេសង្ស័យថាមានដឹកជញ្ជូនសព្វាវុធផ្តល់ឲ្យរបបគ្រប់គ្រងស៊ីរី ដោយធ្វើការឆ្លងកាត់តាមដែនអាកាសរបស់ប្រទេសអ៊ីរ៉ាក់។ មកទល់ពេលនេះ ទីក្រុងបាកដាដតែងថ្លែងប្រាប់ថា គេមិនអនុញ្ញាតឲ្យមានការដឹកជញ្ជូនសព្វាវុធផ្តល់ឲ្យស៊ីរីដោយប្រើដែនអាកាសអ៊ីរ៉ាក់ឡើយ។

ក៏ប៉ុន្តែ បើយោងតាមទីភ្នាក់ងារព័ត៌មាន Reuters បានឲ្យដឹងថា មានសព្វាវុធអ៊ីរ៉ង់ជាច្រើនបានត្រូវគេដឹកជញ្ជូនផ្តល់ឲ្យ របបគ្រប់គ្រងស៊ីរី ដោយឆ្លងកាត់តាមដែនអាកាសរបស់ប្រទេសអ៊ីរ៉ាក់ ហើយការដឹកជញ្ជូនទាំងនេះ បានត្រូវរៀបចំដោយឆ្មាំបដិវត្តន៍អ៊ីរ៉ង់។

ទីក្រុងតេហេរ៉ង់ដែលជាសម្ព័ន្ធមិត្តដ៏សំខាន់របស់ទីក្រុងដាម៉ាស តែងបានត្រូវគេចោទថា ជាអ្នកបានផ្តល់សព្វាវុធឲ្យ របបគ្រប់គ្រងបាស្ហារអាល-អាស្សាដក្នុងការវាយបង្ក្រាបក្រុមបះបោរស៊ីរី។ ក៏ប៉ុន្តែសកម្មភាពផ្តល់សព្វាវុធរបស់អ៊ីរ៉ង់នេះ មានលក្ខណៈធ្ងន់ធ្ងរជាងការប្រមាណទុក ដោយសារតែមានកិច្ចព្រមព្រៀងរវាងអ្នកទទួលខុសត្រូវជាន់ខ្ពស់អ៊ីរ៉ាក់និងអ៊ីរ៉ង់។

“មានយន្តហោះជាច្រើនគ្រឿងបានធ្វើការហោះហើរសឹងតែរាល់ថ្ងៃពីប្រទេសអ៊ីរ៉ង់ទៅកាន់ប្រទេសស៊ីរី ដោយឆ្លងកាត់តាមដែនអាកាសនៃប្រទេសអ៊ីរ៉ាក់ និងដោយផ្ទុកទៅជាមួយនូវឆ្មាំបដិបត្តន៍អ៊ីរ៉ង់ ហើយនិងសព្វាវុធរាប់សិបតោន ផ្តល់ទៅឲ្យកងកម្លាំងរក្សាសន្តិសុខស៊ីរី ដើម្បីវាយបង្ក្រាបក្រុមប្រឆាំងបះបោរស៊ីរី”។ នេះបើយោងតាមប្រភពការទូតនៃអ.ស.ប.។

ទីក្រុងបាកដាដវិញបានបដិសេធច្រានចោលការចោទប្រកាន់នេះ។
“លោកនាយករដ្ឋមន្ត្រីអ៊ីរ៉ាក់តែងតែជំរុញឲ្យមានការរិះរកដំណោះស្រាយវិបត្តិស៊ីរីដោយប្រើសន្តិវិធី ហើយនិងហាមឃាត់ពុំឲ្យមានការជ្រាតជ្រែកពីសំណាក់ប្រទេសដទៃចូលក្នុងបញ្ហាស៊ីរី”។ នេះជាការបញ្ជាក់បន្ថែមរបស់លោក Ali al Moussaoui ទីប្រឹក្សានៃនាយករដ្ឋមន្ត្រីអ៊ីរ៉ាក់។

រីឯសារព័ត៌មានអ៊ីរ៉ង់ជាច្រើនបានឲ្យដឹងកាលពីថ្ងៃអាទិត្យកន្លងទៅថា “អគ្គបញ្ជាការនៃឆ្មាំបដិវត្តន៍អ៊ីរ៉ង់ លោក Ali Jafari បានទទួលស្គាល់ថា មានសមាជិកនៃកងកម្លាំងឆ្មាំបដិវត្តន៍អ៊ីរ៉ង់បានផ្តល់ជំនួយមិនមែនយោធាឲ្យទៅប្រទេសស៊ីរីនិងប្រទេសលីបង់ ហើយទីក្រុងតេហេរ៉ង់នឹងរួបរួមគាំទ្រតាមផ្លូវយោធា របបគ្រប់គ្រងបាស្ហារអាល-អាស្សាដ បើប្រសិនជាមានការវាយលុកពីសំណាក់បច្ចាមិត្ត។ ក៏ប៉ុន្តែក្រសួងការបរទេសអ៊ីរ៉ង់បានបដិសេធព័ត៌មានខាងលើនេះ។

គួរបញ្ជាក់ថា យន្តហោះ Boeing 747 អ៊ីរ៉ង់ពីរគ្រឿងបានត្រូវគេចារនៅក្នុងរបាយការណ៍នៃក្រសួងយកការណ៍លោកខាងលិចថា មានជាប់ពាក់ព័ន្ធក្នុងការដឹកជញ្ជូនសព្វាវុធផ្តល់ឲ្យប្រទេសស៊ីរី។ យន្តហោះទាំងនេះត្រូវទទួលរងទណ្ឌកម្មពីក្រសួងហិរញ្ញវត្ថុអាមេរិក។

ក្រសួងហិរញ្ញវត្ថុអាមេរិកបានចារដាក់នៅក្នុងបញ្ជីខ្មៅនូវឈ្មោះក្រុមហ៊ុនអាកាសចរណ៍អ៊ីរ៉ង់ Yas Air ដែលបានដឹកជញ្ជូនសព្វាវុធផ្តល់ឲ្យទីក្រុងដាម៉ាស។ ហើយគណៈកម្មាធិការជំនាញមួយរបស់អ.ស.ប. ដែលមានបន្ទុកត្រួតពិនិត្យការអនុវត្តន៍ទណ្ឌកម្មដាក់ទៅលើទីក្រុងតេហេរ៉ង់ បានថ្លែងប្រាប់ជាច្រើនលើកថា Yas Air និង Iran Air ធ្លាប់បានដឹកជញ្ជូនសព្វាវុធឲ្យទៅប្រទេសស៊ីរី។ គណៈកម្មាធិការជំនាញមួយនេះ ក៏ធ្លាប់បានថ្លែងប្រាប់ទៀតថា អ៊ីរ៉ង់ធ្លាប់បានបញ្ជូនសព្វាវុធឲ្យទៅប្រទេសស៊ីរីដោយឆ្លងកាត់តាមប្រទេសតួកគីផងដែរ។

សូមបញ្ជាក់ថា ប្រទេសអ៊ីរ៉ង់គ្មានសិទ្ធិលក់សព្វាវុធឲ្យទៅប្រទេសដទៃទៀតឡើយ ដោយហេតុតែមានបំរ៉ាមហាមឃាត់ពីសំណាក់អ.ស.ប. ពាក់ព័ន្ធនឹងទណ្ឌកម្មអន្តរជាតិដែលបានដាក់ទៅលើកម្មវិធីនុយក្លេអ៊ែររបស់ទីក្រុងតេហេរ៉ង់៕