Delicious
Digg
Facebook
Twitter
Yahoo!
Technorati
ឥណ្ឌា -
អត្ថបទចុះផ្សាយនៅថ្ងៃ សៅរ៍ 06 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 06 តុលា 2012
សមាជិកគ្រួសារ ៥នាក់បានទទួលទោសប្រហារជីវិតពីបទឧក្រិដ្ឋកិត្តិយស
សមាជិកគ្រួសារ ៥នាក់បានទទួលទោសប្រហារជីវិតពីបទឧក្រិដ្ឋកិត្តិយស
Flickr / fdrca'n'dave
នៅថ្ងៃសុក្រ ទី៥ តុលាម្សិលមិញ តុលាការទីក្រុងញូដែលីបានកាត់ទោសប្រហារជីវិតមនុស្ស ៥នាក់ជាសមាជិកក្នុងគ្រួសារតែមួយពីបទបានធ្វើទារុណកម្មលើសមាជិកក្មេងស្រីម្នាក់របស់ខ្លួនឈ្មោះ Asha និងបុរសសង្សាររបស់ក្មេងស្រីនោះឈ្មោះ Yogesh រហូតដល់ស្លាប់កាលពី ២ឆ្នំាមុន។ មូលហេតុ មកពីគ្រួសាររបស់ក្មេងស្រីនោះមិនចង់ឲ្យកូនស្រីខ្លួនឯងទៅរៀបការជាមួយបុរសម្នាក់ដែលមានវណ្ណៈទាបជាងខ្លួន។ នៅឥណ្ឌា ឃាតកម្ម និងបទឧក្រិដ្ឋកិត្តិយសរបៀបនេះបានកើតមានរាប់រយករណីជារៀងរាល់ឆ្នំា។ តែនាពេលបច្ចុប្បន្ន តុលាការបានផ្តើមចាត់ការ ដោយលែងទុកបណ្តោយទៀតឡើយ។
យោងតាមរបាយការណ៍បានមកពីការវះពិនិត្យសព គូសង្សារវ័យក្មេងទំាងពីរនាក់ត្រូវបានគេចាប់ចង រួចវាយនឹងដំបង បន្ទាប់មកយកទៅឆក់នឹងខ្សែភ្លើងរហូតដល់ដាច់ខ្យល់ស្លាប់។ មូលហេតុ មកពីនារីវ័យក្មេងដ៏ស្រស់ស្អាតមានវណ្ណៈខ្ពស់រូបនោះចង់រៀបការជាមួយបុរសសង្ហាម្នាក់ដែលមានវណ្ណៈទាបជាងខ្លួន។ គឺវណ្ណៈទាបរបស់បុរសរូបនោះឯងដែលគ្រួសាររបស់នារីវ័យក្មេងមិនអាចទទួលយកបាន។ គឺការអនុវត្តន៍តាមបែបសក្តិភូមិ ចាស់គំរិល និងអមនុស្សធម៌របៀបនេះហើយ ដែលកាលពីឆ្នំាទៅមិញ តុលាការកំពូលឥណ្ឌាបានទាមទារឲ្យមានការដាក់ទោសប្រហារជីវិតចំពោះគ្រប់បទឧក្រិដ្ឋកិត្តិយសដែលតុលាការចាត់ទុកថា ជាផលវិបាកដ៏ធ្ងន់ធ្ងរនៅក្នុងសង្គមឥណ្ឌាបច្ចុប្បន្ន។
ជាទូទៅ បទឧក្រិដ្ឋកិត្តិយសរបៀបនេះច្រើនតែកើតមាននៅតំបន់ជនបទស្ថិតប៉ែកខាងជើងប្រទេសឥណ្ឌា។ តំបន់ដែលប្រកាន់វណ្ណៈ និងអនុវត្តទំនៀមទំលាប់ប្រពៃណីចាស់គំរិល « នំមិនធំជាងនាល »។ ការសិក្សាមួយក្នុងឆ្នំា ២០១០ បានបង្ហាញថា ជារៀងរាល់ឆ្នំា មានការប្រព្រឹត្តិបទឧក្រិដ្ឋកិត្តិយសជាង ៩០០ករណីនៅក្នុងតំបន់នោះ និងដែលបានឆ្លងចូលក្នុងទីក្រុងញូដែលីទៀត។ តែការកាត់ទោសប្រហារជីវិតសមាជិក ៥នាក់ក្នុងគ្រួសារតែមួយដែលបានប្រព្រឹត្តិបទឧក្រិដ្ឋរបៀបនេះ គឺជាភស្តុតាងមួយដែលតុលាការចង់បង្ហាញពីការមិនទុកបណ្តោយឲ្យទង្វើនេះបន្តស៊ីរូងផ្ទៃក្នុងសង្គមឥណ្ឌាទេ។
បច្ចុប្បន្ននេះ ក្រុមយុវវ័យឥណ្ឌាចង់បាន និងព្យាយាមកសាងអនាគតរបស់ខ្លួនតាមបែបសម័យថ្មី។ តែបញ្ហានៅត្រង់ថា គេតែងតែជួបនឹងឧបសគ្គ និងត្រូវប្រឈមមុខជាមួយឪពុក ម្តាយដែលបន្តអនុវត្តតាមទំនៀមទំលាប់ប្រពៃណីពីបូរាណ។ សព្វថ្ងៃ រដ្ឋាភិបាលទីក្រុងញូដែលីបានព្យាយាមគិតគូរកំចាត់បញ្ហានេះ តែលទ្ធផលនៃការស្ទង់មតិបានបង្ហាញថា មានប្រជាជនឥណ្ឌាមួយភាគធំដែលជាប់ពាកព័ន្ធនឹងបញ្ហានេះនៅតែគំាទ្របទឧក្រិដ្ឋកិត្តិយសនោះ៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ