កម្ពុជា -

អត្ថបទចុះផ្សាយនៅថ្ងៃ អាទិត្យ 28 សីហា 2011 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 28 សីហា 2011

លោក ហ៊ុន សែន គំរាមដកដីសម្បទានសេដ្ឋកិច្ចពីវិនិយោគិន

លោកហ៊ុន សែន នាយករដ្ឋមន្រ្តីកម្ពុជា

©វណ្ណារ៉ា(archive)

ដោយ គី សុខលីម

លោកនាយករដ្ឋមន្រ្តី ហ៊ុន សែន នៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃសុក្រកន្លងមកបាន ព្រមានដកដីសម្បទានសេដ្ឋកិច្ចពីវិនិយោគិន និងបញ្ជាអោយក្រសួងពាក់ព័ន្ធតាមដានស្ថានភាពដួលសន្លប់របស់កម្មករ។ ការព្រមានរបស់ប្រមុខរាជរដ្ឋាភិបាល នៅពេលនេះបានធ្វើឡើង ចំពេលដែលបញ្ហាទាំងពីរនេះកក្រើកឡើង។

សេចក្តីរាយការណ៍របស់គី សុខលីមពីទីក្រុងភ្នំពេញ

ស្តាប់ (01:59)

28/08/2011 by គី សុខលីម

ដោយសង្កេតឃើញវិនិយោគិនដីសម្បទានសេដ្ឋកិច្ច និងប្រជាពលរដ្ឋតែងតែមានជម្លោះនឹងគ្នានោះ លោកនាយករដ្ឋមន្រ្តី ហ៊ុន សែន បានដាក់បញ្ជាអោយក្រសួងពាក់ព័ន្ធចុះពិនិត្យ និងដោះស្រាយ នៅតាមទីតាំងដីសម្បទានសេដ្ឋកិច្ចនានា ដែលមានទំនាស់រវាងប្រជាពលរដ្ឋ និងម្ចាស់វិនិយោគដីសម្បទាន។

បទបញ្ជាផ្ទាល់មាត់ នៅក្នុងកិច្ចប្រជុំគណៈរដ្ឋមន្រ្តី កាលពីថ្ងៃសុក្រទី ២៦ សីហា បានធ្វើឡើង ក្រោយពេលដែលវិវាទដីធ្លី តាមរយៈការវិនិយោគដីសម្បទានសេដ្ឋកិច្ច និងការវិនិយោគដីសម្បទានអភិវឌ្ឍន៍មានការរំជើបរំជួល។

របាយការណ៍របស់មជ្ឈមណ្ឌលសិទ្ធិមនុស្សកម្ពុជាដែលបានផ្សព្វផ្សាយ ជាសាធារណៈ កាលពីពេលថ្មីៗកន្លងមកនេះ បានបង្ហាញថា ប្រជាជនជិត៥ម៉ឺនគ្រួសារធ្លាប់បានប៉ះពាល់ និងអាចប៉ះពាល់ដោយសារទំនាស់ដីធ្លី។ របាយការណ៍ដដែលបានបង្ហាញឲ្យឃើញថា ផ្ទៃដី ប្រមាណជា៥ភាគរយនៃផ្ទៃដីសរុបរបស់កម្ពុជាមានពាក់ព័ន្ធនឹងទំនាស់ដីធ្លី។

លោកនាយករដ្ឋមន្រ្តី ហ៊ុន សែន បានព្រមានដកហូតដីសម្បទានសេដ្ឋកិច្ចពីវិនិយោគិនណាដែលមិនអនុវត្តការដោះស្រាយជូនប្រជាពលរដ្ឋ ដែលមានភូមិដ្ឋានយូរអង្វែង ក្នុងទីតាំងរបស់ខ្លួន។

ការព្រមានរបស់លោកនាយករដ្ឋមន្ត្រីទាក់ទងទៅនឹងដីសម្បទានសេដ្ឋកិច្ចត្រូវបានស្វាគមដោយលោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជា ប៉ុន្តែលោកសូមអំពាវនាវអោយប្រសាសន៍នេះត្រូវបានអនុវត្តដោយមានប្រសិទ្ធិភាព។

ក្រៅអំពីបញ្ហាដីសម្បទានសេដ្ឋកិច្ច លោកប្រមុខរាជរដ្ឋាភិបាលកម្ពុជា បានបញ្ជាអោយក្រសួងការងារ និងស្ថាប័នពាក់ព័ន្ធផ្សេងទៀតត្រូវចុះទៅពិនិត្យ និងដោះស្រាយ ជាបន្ទាន់ចំពោះរោងចក្រសហគ្រាសណាដែលមានបុគ្គលិកកម្មករដួលសន្លប់ ដូចជាករណីរោងចក្រ M&V នៅក្នុងខេត្តកំពង់ឆ្នាំងជាដើម។

លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាធ្លាប់បានបញ្ជាក់ប្រាប់ថា ចាប់តាំងពីដើមឆ្នាំ២០១១រហូតមកដល់ពេលនេះ កម្មកររោងចក្រកាត់ដេរជិត១ពាន់នាក់ហើយបានដួលសន្លប់។ លោក ជា មុន្នី ស្តីបន្ទោស មូលហេតុនៃការដួលសន្លប់គឺបណ្តាលមកពីស្ថានភាពការងារ និងទីកន្លែងការងារ៕