ថ្នាក់ដឹកនាំព្រះសង្ឃគំាទ្រលោក ហ៊ុន សែន ជាបេក្ខភាពនាយករដ្ឋមន្រ្តី ឆ្នាំ២០១៣
នៅថ្ងៃអាទិត្យនេះ លោកនាយករដ្ឋមន្រ្តី ហ៊ុន សែន បានបង្ហាញពីលិខិតគំាទ្ររបស់មេដឹកនាំ ព្រះសង្ឃទំាងពីគណៈ នៅកម្ពុជា គំាទ្រចំពោះបេក្ខភាពរបស់លោក ជានាយករដ្ឋមន្រ្តី នៅឆ្នាំ២០១៣ បន្តទៀត។ ការចេញលិខិតគំាទ្រ ចំពោះអ្នកនយោបាយ របស់មេដឹកនាំព្រះសង្ឃទំាងពីរគណៈ គឺជាការលូកដៃចូលរបស់ព្រះសង្ឃ ក្នុងឆាកនយោបាយ។ តួនាទីរបស់ព្រះសង្ឃក្នុងឆាកនយោបាយកំពុងប្រទាញប្រទង់គ្នានៅឡើយ។ គណបក្សនយោបាយខ្លះចង់អោយព្រះសង្ឃនិមន្តទៅបោះឆ្នោត គណបក្សនយោបាយខ្លះមិនចង់អោយព្រះសង្ឃប្រឡូកប្រឡាក់នឹងរឿងនយោបាយឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់អ៊ឹម ណាវិនពីទីក្រុងភ្នំពេញ
បន្ទាប់ពីបានទទួលការគំាទ្រ ពីសំណាក់សមាជិកថ្នាក់ដឹកនាំគណបក្សប្រជាជនកម្ពុជា កាលពីថ្ងៃ ៧មករា កន្លងមកនេះ អោយលោកហ៊ុន សែន ធ្វើជាបេក្ខភាពនាយករដ្ឋមន្រ្តី បន្តទៀតសម្រាប់ការបោះឆ្នោតឆ្នាំ ២០១៣ខាងមុខ នៅថ្ងៃអាទិត្យ ទី ២៣ មករានេះ លោកនាយករដ្ឋមន្រ្តីហ៊ុនសែន បានបង្ហាញពីញត្តិគាំទ្របេក្ខភាពរបស់លោក អោយឈរឈ្មោះជានាយករដ្ឋមន្រ្តី មកពីមជ្ឈដ្ឋានផ្សេងមួយទៀត។
នោះគឺជាញត្តិគំាទ្រចេញពីថ្នាក់ដឹកនាំព្រះសង្ឃទំាងពីរគណៈ គឺ គណៈធម្មយុត្តិកនិកាយ និងគណៈមហានិកាយ។
នៅក្នុងពិធីបុណ្យចំរើនព្រះជន្ម សម្តេចព្រះសង្ឃ បួរ គ្រី នៃគណៈធម្មយុត្តិកនិកាយ នៅព្រឹកថ្ងៃអាទិត្យនេះ លោកនាយករដ្ឋមន្រ្តី ហ៊ុន សែន បានថ្លែងអំណរគុណចំពោះលិខិតគាំទ្រ របស់សម្តេចព្រះសង្ឈទំាងពីរគណៈ ដែលបានគំាទ្រអោយលោកឈរឈ្មោះជានាយករដ្ឋមន្រ្តីបន្តទៀត។
ការចេញញត្តិគំាទ្ររបស់សម្តេចព្រះសង្ឃ ទំាងពីរគណៈនេះ ស្របពេលដែលបញ្ហាតួនាទី របស់ព្រះសង្ឈ នៅក្នុងឆាកនយោបាយ នៅកម្ពុជា កំពុងស្ថិតនៅក្នុងស្ថានភាពប្រទាញប្រទង់នៅឡើយ។ គណបក្សនយោបាយខ្លះ មិនចង់អោយព្រះសង្ឃចូលរួមក្នុងឆាកនយោបាយ តែគណបក្សនយោបាយខ្លះទៀត គាំទ្រអោយព្រះសង្ឃចូលរួម ក្នុងការបោះឆ្នាត។
តាមច្បាប់រដ្ឋធម្មនុញ្ញ ព្រះសង្ឃក៏ជាពលរដ្ឋមានសិទ្ឋិបោះឆ្នោតដូចពលរដ្ឋទូទៅទៀត។ ប៉ុន្តែបើតាមច្បាប់គណបក្សនយោបាយវិញ ព្រះសង្ឃត្រូវបានហាមមិនអោយចូលរួមក្នុងឆាកនយោបាយ ដូចជាកងកម្លាំងប្រដាប់អាវុធដែរ។
លោក គល់ បញ្ញា នាយកប្រតិបត្តិអង្គការគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា មានយោបល់ថា ព្រះសង្ឃគួរស្ថិតនៅចន្លោះកណ្តាល រវាងអ្នកនយោបាយ ប្រសើរជាង ការគំាទ្រគណបក្សណាមួយ។
ព្រះសង្ឃនៅកម្ពុជាមានចំនួនប្រមាណ ៥ម៉ឺនអង្គ ចំនួននេះមិនច្រើនទេ បើប្រៀបធៀបជាមួយចំនួនប្រជាពលរដ្ឋមានសិទ្ឋិបោះឆ្នាត ប្រមាណ៨លាននាក់នោះ។ ប៉ុន្តែអ្នកនយោបាយតែងតែចង់អូសទាញសំឡេងព្រះសង្ឃដោយសារព្រះសង្ឃមានឥទ្ឋិពលខ្លំាងទៅលើប្រជាពលរដ្ឋខ្មែរ៨០%ដែលគោរពព្រះពុទ្ឋសាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ