លោកនាយករដ្ឋមន្ត្រី ហ៊ុន សែន ចូលប្រកាសទ្រព្យសម្បត្តិតាមច្បាប់ប្រឆាំងអំពើពុករលួយ
នៅរសៀលថ្ងៃសុក្រទី ១ មេសា នេះ លោកនាយករដ្ឋមន្ត្រី ហ៊ុន សែន បានចូលខ្លួនទៅប្រកាសទ្រព្យសម្បត្តិ នៅអង្គភាពប្រឆាំងអំពើពុករលួយ។ ការប្រកាសទ្រព្យសម្បត្តិ ដែលស្របតាមប្រឆាំងអំពើពុករលួយ ត្រូវធ្វើឡើងតែក្នុងស្រោមសំបុត្រ មិនមានការប្រកាសដល់សាធារណជនឡើយ។ យ៉ាងណាក៏ដោយ លោកនាយករដ្ឋមន្ត្រី បានលើកទឹកចិត្តដល់មន្ត្រីជាប់កាតព្វកិច្ច ត្រូវប្រកាសទ្រព្យសម្បត្តិ ឲ្យបានមុនថ្ងៃ៧មេសា ដើមសប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
ក្រោយពីប្រគល់ឯកសារ ដល់មន្ត្រីអង្គភាពប្រឆាំងអំពើពុករលួយ លោកនាយករដ្ឋមន្ត្រី ហ៊ុន សែន បានថ្លែងការណ៍ទៅកាន់ក្រុមអ្នកកាសែត តាមក្បាលមីក្រូ ដែលរៀបចំទុកជាស្រេច។ លោកនាយករដ្ឋមន្ត្រី អះអាងថា លោកបានបំពេញកាតព្វកិច្ច ដោយប្រកាសទ្រព្យសម្បត្តិ ដែលជាផ្នែកមួយនៃការប្រឆាំងអំពើពុករលួយ។
តាមច្បាប់ប្រឆាំងអំពើពុករលួយ ការប្រកាសទ្រព្យសម្បត្តិ និងបំណុល ធ្វើឡើងដោយសម្ងាត់ បិទក្នុងស្រោមសំបុត្រ។ រីឯ លុយក្នុងធនាគារមិនតម្រូវឲ្យប្រកាសទេ។
លោកនាយករដ្ឋមន្ត្រីក៏បានអំពាវនាវម្តងហើយ ម្តងទៀត ដល់មន្ត្រីរាជការ និងមន្ត្រីប៉ូលិសកងទ័ព ដែលជាប់កាតព្វកិច្ច ត្រូវចូលខ្លួន មកប្រកាសទ្រព្យសម្បត្តិ ឲ្យបានយ៉ាងយូរ ត្រឹមថ្ងៃទី៧មេសា ឆ្នាំ២០១១ ដែលជាកាលបរិច្ឆេទចុងក្រោយ។
លោកនាយករដ្ឋមន្ត្រី ហ៊ុន សែន បានបញ្ជាក់ថា លោកមិនមានចំណូលអ្វី ក្រៅតែពីប្រាក់ខែទេ។ ប្រាក់ខែលោកនាយករដ្ឋមន្ត្រី មានចំនួន ៤លាន ៦សែនរៀល ស្មើប្រមាណ ១.៥០០ ដុល្លារ ក្នុងមួយខែ។
វត្តមានរបស់លោកនាយករដ្ឋមន្ត្រី ក្នុងការប្រកាសទ្រព្យសម្បត្តិពេលនេះ ត្រូវបានលោកឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលស្ថិតក្រោមរដ្ឋាភិបាលចាត់ទុកថា ជាជំនួយមួយធំណាស់ សម្រាប់អង្គភាពប្រឆាំងអំពើពុករលួយ ព្រោះគ្រាន់តែជូនដំណឹងពីរថ្ងៃមុន ពីវត្តមានរបស់លោកនាយករដ្ឋមន្ត្រី មកប្រកាសទ្រព្យសម្បត្តិ មានមន្ត្រីជាង ៥.០០០ នាក់ បានមកប្រកាសទ្រព្យសម្បត្តិ និងបំណុល។
តាមច្បាប់ប្រឆាំងអំពើពុករលួយ មន្ត្រីរាជការស៊ីវិល តាមក្រសួងស្ថាប័នរដ្ឋ ចាប់ពីប្រធាននាយកដ្ឋាន យោធា នគរបាល ចាប់ពីស័ក្តិ៥ មន្ត្រីតុលាការ និងអ្នកដែលត្រូវបានតែងតាំងពីការបោះឆ្នោត រួមមាន៖ សមាជិកព្រឹទ្ធសភា រដ្ឋសភា រដ្ឋាភិបាល និងក្រុមប្រឹក្សាខេត្ត ក្រុងស្រុកខណ្ឌ ក្រុមប្រឹក្សាឃុំសង្កាត់ ត្រូវជាប់កាតព្វកិច្ច ប្រកាសទ្រព្យសម្បត្តិ និងបំណុល។
តាមលោក ឱម យ៉ិនទៀង អ្នកជាប់កាតព្វកិច្ច ក្នុងស្ថាប័នរដ្ឋ មានជាង ២៤.០០០ នាក់។ តែមកដល់ថ្ងៃនេះ អង្គភាពប្រឆាំងអំពើពុករលួយ បានទទួលអ្នកប្រកាសទ្រព្យសម្បត្តិ និងបំណុលជាង ១០.០០០ នាក់។
ដោយឡែក រដ្ឋសភាព្រឹកថ្ងៃសុក្រ ទី ១ មេសា បានបោះឆ្នោតអនុម័ត យល់ព្រមលើការកែប្រែមាត្រាខ្លះ ក្នុងច្បាប់ប្រឆាំងអំពើពុករលួយ ដើម្បីផ្តល់អំណាចបន្ថែមដល់អង្គភាពប្រឆាំងអំពើពុករលួយ និងដើម្បីចាប់ផ្តើមអនុវត្តជំពូកទី៦ ស្តីពី ការផ្តន្ទាទោសជនពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ