ភូមា-បង់ក្លាដែស -

អត្ថបទចុះផ្សាយនៅថ្ងៃ ព្រហស្បតិ៍ 23 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 23 សីហា 2012

Human Rights Watch បរិហារនយោបាយឃោរឃៅរបស់បង់ក្លាដែសចំពោះជនភៀសខ្លួនរ៉ូហ៊ីងយ៉ា

Logo អង្គការ Human Rights Watch

Human Rights Watch

ដោយ គួច គន្ធារ៉ា

នៅថ្ងៃព្រហស្បតិ៍ ទី២៣ សីហានេះ អង្គការការពារសិទ្ធិមនុស្ស Human Rights Watch បានចេញសេចក្តីថ្លែងការណ៍មួយ ដោយបានបរិហារទង្វើឃោរឃៅរបស់រដ្ឋាភិបាលប្រទេសបង់ក្លាដែសដែលបានរារំាងអង្គការក្រៅរដ្ឋាភិបាលចំនួន ៣ មិនឲ្យយកជំនួយទៅជួយក្រុមជនភៀសខ្លួនរ៉ូហ៊ីងយ៉ា។ ក្រុមជនភៀសខ្លួនរ៉ូហ៊ីងយ៉ាដែលបានរត់គេចពីអំពើហិង្សាសហគមន៍នៅក្នុងប្រទេសភូមា។

សេចក្តីរាយការណ៍របស់ គួច គន្ធារ៉ា

ស្តាប់ (02:46)

23/08/2012 by គួច គន្ធារ៉ា

អ្វីៗបានចាប់ផ្តើមកាលពីខែកក្កដាកន្លងទៅ ដោយរដ្ឋាភិបាលនៃប្រទេសបង់ក្លាដែសបានស្នើឲ្យអង្គការក្រៅរដ្ឋាភិបាលចំនួន ៣ រួមមាន អង្គការ « Médecins sans frontières » អង្គការ « Action contre la faim » និងអង្គការ « Muslim Aid UK » ឲ្យបញ្ឈប់សកម្មភាពផ្តល់ជំនួយជួយដល់ក្រុមជនភៀសខ្លួនរ៉ូហ៊ីងយ៉ាដែលបានរត់គេចពីអំពើហិង្សាសហគមន៍នៅក្នុងប្រទេសភូមាមកតំាងទីលំនៅលើទឹកដីបង់ក្លាដែស។ ទីក្រុងដាកាបានលើកយកហេតុផលថា ទង្វើរបស់អង្គការក្រៅរដ្ឋាភិបាលទំាងនោះនឹងរឹតតែជម្រុញឲ្យមានការហូរចូលក្រុមជនភៀសខ្លួនរ៉ូហ៊ីងយ៉ាបន្ថែមទៀតមកក្នុងទឹកដីរបស់ខ្លួន។ ម្យ៉ាងទៀត តំាងពីខែមិថុនាកន្លងទៅមក ប្រទេសបង់ក្លាដែសក៏ធ្លាប់បានចាប់បញ្ជូនទូកជាច្រើនដែលដឹកជនភៀសខ្លួនរ៉ូហ៊ីងយ៉ាឲ្យវិលត្រឡប់ទៅប្រទេសភូមាវិញ។

សូមជម្រាបជូនថា ប្រទេសបង់ក្លាដែសមានខ្សែព្រំដែនជាប់នឹងប្រទេសភូមាប្រវែង ២០០គីឡូម៉ែត្រ និងដែលបច្ចុប្បន្ននេះ មានជនភៀសខ្លួនរ៉ូហ៊ីងយ៉ាប្រមាណជា ៣០ម៉ឺននាក់កំពុងរស់នៅក្នុងជំរំពីរលើទឹកដីបង់ក្លាដែសស្ថិតប៉ែកខាងត្បូង ក្រោមការគ្រប់គ្រងរបស់អង្គការសហប្រជាជាតិ។ លោកនាយកអង្គការ Human Rights Watch Bill Frelick បានអះអាងថា រដ្ឋាភិបាលបង់ក្លាដែសបានព្យាយាមធ្វើទុក្ខបុកម្នេញលើក្រុមជនភៀសខ្លួនរ៉ូហ៊ីងយ៉ាដែលកំពុងរស់លើទឹកដីរបស់ខ្លួន ដើម្បីជាការបំភ័យដល់អ្នកផ្សេងកុំឲ្យរត់ចេញពីប្រទេសភូមាដែលកំពុងទទួលរងអំពើហិង្សា។ លោក Bill Frelick បានចាត់ទុកទង្វើនេះ ថាជាទង្វើឃោរឃៅ និងអមនុស្សធម៌ដែលរដ្ឋាភិបាលបង់ក្លាដែសត្រូវតែបញ្ឈប់ជាបន្ទាន់។

ជាមួយគ្នានេះ Human Rights Watch ក៏បានរំលឹកប្រាប់រដ្ឋាភិបាលទីក្រុងដាកាថា បង់ក្លាដែសក៏ជាប្រទេសហត្ថលេខីនៃកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គម និងវប្បធម៌ដែរ។ កតិកាសញ្ញាដែលចែងយ៉ាងច្បាស់ថា ប្រទេសហត្ថលេខីមិនអាចរារំាងការផ្តល់ជំនួយជាអាហារ និងថ្នំាពេទ្យទៅឲ្យប្រជាជនដែលកំពុងរស់នៅក្នុងដែនដីរបស់ខ្លួន ដោយគិតទំាងជនភៀសខ្លួនផងដែរ។ គួរបញ្ជាក់ជូនថា អង្គការក្រៅរដ្ឋាភិបាលទំាង ៣ដែលរដ្ឋាភិបាលបង់ក្លាដែសទើបរារំាងសកម្មភាពមនុស្សធម៌របស់គេ បានផ្តល់ជំនួយជួយជនជាតិភាគតិចរ៉ូហ៊ីងយ៉ាកាន់សាសនាអ៊ីស្លាមតំាងតែពីដើមទសវត្សឆ្នំា ៩០មកម្ល៉េះ។

ជនជាតិភាគតិចរ៉ូហ៊ីងយ៉ាដែលអង្គការសហប្រជាជាតិបានចាត់ទុកថា ជាអ្នកដែលបានទទួលរងការធ្វើទុក្ខបុកម្នេញជាងគេនៅលើពិភពលោក។ ជនជាតិរ៉ូហ៊ីងយ៉ាមានប្រមាណជា៨០០ ០០០នាក់រស់នៅប៉ែកខាងជើងនៃរដ្ឋអារ៉ាកាននៃប្រទេសភូមា។ ពួកគេមិនត្រូវបានរបបគ្រប់គ្រងភូមាទទួលស្គាល់ថា ជាជនជាតិពិន្ធុភាគតិចរស់នៅក្នុងប្រទេសភូមាឡើយ។ ផ្ទុយទៅវិញ ពួកគេត្រូវបានរបបភូមាចាត់ទុក ជា « ជនអន្តោប្រវេសន៍ខុសច្បាប់ »៕