បញ្ចុះទម្ងន់ ការពារកុំឱ្យកើតជំងឺសរសៃឈាមបេះដូង ជំងឺមហារីក ជួយភ្ញោចសតិបញ្ញា ឬ ជួយរក្សារូបរាងឱ្យនៅ វ័យក្មេង ... ទាំងនេះសុទ្ធសឹងជាគុណប្រយោជន៍នៃការពិសារទឹកតែ (បៃតង)។ តើជាគុណប្រយោជន៍ពិត ឬគ្រាន់តែជាពាក្យឃោសនា ឬជំនឿតៗគ្នា ?
ការស្រាវជ្រាវវេជ្ជសាស្ត្រ វិទ្យាសាស្ត្រ មានកាន់តែច្រើនពីមួយថ្ងៃទៅមួយថ្ងៃ ដើម្បីវែករកសារធាតុពិតដែលមានបង្កប់នៅក្នុងរុក្ខជាតិ បន្លែផ្លែឈើ តើវាមានគុណប្រយោជន៍ និងផលប៉ះពាល់យ៉ាងណាខ្លះចំពោះសុខភាព។ ចំពោះរុក្ខជាតិ តែ ក៏ត្រូវក្រុមអ្នកស្រាវជ្រាវយកចិត្តទុកជាពិសេសដែរ។ ការសិក្សាថ្មីចុងក្រោយ របស់ក្រុមអ្នកវិទ្យាសាស្ត្រអាមេរិក បានរកឃើញថា តែបៃតង មានគុណប្រយោជន៍ខ្លាំងណាស់ ក្នុងការទប់ស្កាត់មិនឱ្យអត្រាជាតិស្ករក្នុងឈាម Glycémie របស់អ្នកជំងឺទឹកនោមផ្អែមឡើងខ្លាំងបានក្រោយពេលបរិភោគបាយ និងគ្រាប់ធញ្ញជាតិ។ ថ្វីដ្បិតតែប្រសិទ្ធិភាព “តែបៃតង” ទប់ស្កាត់បាន៥០%ការឡើងកំរិតជាតិស្ករ ជាលទ្ធផលនៃការសិក្សាលើសត្វកណ្តុរក៏ដោយ ក៏នេះជាក្តីសង្ឃឹមថ្មីសំរាប់មនុស្សលោក។ ការសិក្សាលើមនុស្សគួរតែត្រូវបានចាប់ផ្តើម។ ដោយសារថា តែគ្មានផ្តល់ផលរំខាន យើងអាចទាញយកចំណេញពីគុណប្រយោជន៍នៃតៃនេះ បានដោយ ពិសារទឹកតែ ធ្វើជាថ្នាំព្យាបាលតាមបែបធម្មជាតិ។ ការកាត់បន្ថយអត្រាជាតិស្ករ របស់តែកាន់តែមានប្រសិទ្ធិភាពខ្លាំង ប្រសិនបើអ្នកពិសារទឹកតែមួយពែង ក្រោយ ពេលទទួលទានបាយបាយ ឬ ដំឡូងបារាំង ពោត សណ្តែក ដែលសុទ្ធសឹងជាធញ្ញជាតិសំបូរទៅដោយជាតិម្សៅ។
គុណប្រយោជន៍របស់តែ មិនមែន ជារឿងនិទានទៀតទេ ! ការសិក្សាបានរកឃើញថា តែល្អចំពោះសុខភាព មកពីរុក្ខជាតិតែ មានបង្កប់ទៅដោយសារធាតុអង់ទីអុកស៊ីដង់ ធម្មជាតិ “កាតេឈីន” Catéchine” និងជាពិសេសសារធាតុ Epigallocatéchine gallate (EGCG) ដែលមានសកម្មភាពអង់ទីអុកស៊ីតដង់ ២៥ ទៅ១០០ដង លើសវីតាមីន សេ និងអឺ ទៀត។
ការសិក្សាលើសត្វ និងលើមនុស្ស បានបញ្ជាក់យ៉ាងច្បាស់ពីកម្លាំងពិសេសរបស់តែបៃតងនេះ តាមបែបវិទ្យាសាស្ត្រតែម្តង។ ជាមួយនឹងលទ្ធភាពអង់ទីអុកស៊ីដង់ដ៏ខ្លាំងក្លានេះ តែបៃតង អាចជួយកាត់បន្ថយការកើតជំងឺខ្លាញ់ក្នុងឈាម កូឡេស្តេរ៉ូល។ ការសិក្សាផ្សេងទៀត កំពុងផ្តោតទៅលើឥទ្ធិពលនៃអង់ទីអុកស៊ីដង់របស់តែបៃតងចំពោះប្រព័ន្ធសរសៃឈាមបេះដូង និងទំនាក់ទំនងជាជំងឺខ្សោយខួរក្បាល និងជំងឺមហារីក។ នៅក្នុងពេលឆាប់ៗនេះ គេនឹងកាន់តែយល់ច្បាស់អំពីគុណសម្បត្តិការពាររបស់តែ ប្រឆាំងនឹងជំងឺមហារីកពងស្វាស ប្រឆាំងនឹងដំណើររីករាលដាលនៃជំងឺមហារីកខ្លះ។
លោកអ្នកនាងបានជ្រាបហើយ អំពីលក្ខណៈពិសេសនៃរុក្ខជាតិតែ ដូច្នេះនាងខ្ញុំសូមបូកគុណប្រយោជន៍៩យ៉ាង មកបំភ្លឺលម្អិតមួយម្តងៗ ជូនលោកអ្នកនាង ទាក់ទងនឹងការជ្រើសរើសបរិភោគទឹកតែ ៖ ជាទឹកក្តៅ ជាទឹកត្រជាក់ ដាក់ទឹកកក ដាក់លាយស្ករ លាយទឹកឃ្មុំ ឬបន្ថែមក្រូចឆ្មារទៀតតាមការចូលចិត្ត។
- ជាមួយនឹងធាតុបន្សំដ៏សកម្ម EGCG តែបៃតង ជាអ្នកប្រយុទ្ធប្រឆាំងនឹងសារជាតិខ្លាញ់។ ពោលគឺបង្កើនល្បឿននៃដុតរំលាយខ្លាញ់ក្នុងខ្លួន មិនឱ្យសល់កកច្រើន ដែលជាបុព្វហេតុនាំឱ្យកើតជំងឺខ្លាញ់ក្នុងឈាម។
- បើតាមការសិក្សាស្រាវជ្រាវរបស់សកលវិទ្យាល័យ Tufts បានអួតអាងបន្ថែមអំពីសមត្ថភាពរបស់ធាតុ EGCG ថាដូចជាសារធាតុកាតេឈីនផ្សេងទៀតដែរ EGCG មានសកម្មភាពដៅទិសចំទៅរកខ្លាញ់នៅពោះ ដែលនេះអាចពន្លឿនការបញ្ចុះទម្ងន់បាន៧៧%។
- តែបៃតងមានថាមពលជួយរក្សាលំនឹងជាតិស្ករឱ្យនៅថេរ ព្រោះតែ EGCG ជួយសម្រួលការបែងចែកជាតិអាំងស៊ុយលីននៅក្នុងខ្លួនប្រាណ បញ្ចៀសមិនឱ្យជាតិស្ករឡើងខ្លាំង មិនឱ្យមានអារម្មណ៍ឆាប់នឿយហត់ និងចង់ញ៉ាំឥតឈប់ឥតឈរ។
- បើតាមការសិក្សានៅខែមេសាឆ្នាំ២០១០ តែបៃតងអាចនឹងមានប្រយោជន៍ក្នុងការប្រយុទ្ធប្រឆាំងនឹងជំងឺមហារីកសួត។ ព្រោះ EGCG មានសមត្ថភាពអាចលុបកំណើនកោសិកាមហារីកសួតបាន។
- តែបៃតងក៏ទំនងជាមានសកម្មភាពប្រឆាំងនឹងមហារីកពោះវៀនធំដែរ។ នេះបើតាមការសិក្សាមួយចំនួនផ្សេង
- កំពុងសិក្សានៅឡើយទេ ប៉ុន្តែ តែបៃតហាក់ដូចជាជួយកោសិកាមហារីកពងស្វាស ឱ្យសម្លាប់កោសិកាមហារីកដោយខ្លួនឯង ដើម្បីការពារសរីរាង្គកាយ
- អំបាញ់មិញ ខ្ញុំបាននិយាយលើកឡើងថា EGCG មានកម្លាំងអង់ទីអុកស៊ីដង់ ច្រើនជាងវីតាមីន អឺ ដល់ទៅ១០០ដង។ បើដូច្នេះមែន មានន័យថាតែបៃតងអាចជួយថែរក្សាស្បែកនៅក្មេងខ្ចីជានិច្ច និងជ្រីវជ្រួញ ! នេះក៏ព្រោះតែសកម្មភាព របស់ EGCG ដែលទៅបំផ្លាញជាឥទ្ធិពលអាក្រក់ទាំងអម្បាលម៉ានរបស់មូលេគូលមិនគ្រប់លក្ខណៈ អនាថាមួយចំនួនដែលរបាត់របាយក្នុងសរីរាង្គមនុស្ស។
- តែបៃតងមានអំណាចខ្លាំងផ្នែកអង់ទីអុកស៊ីដង់ ដូច្នេះតែបៃតងត្រូវតែមានផលវិជ្ជមានទៅលើកោសិកាស្បែកជាប្រាកដ។ កោសិកាស្បែកដែលរងការប៉ះពាល់ និងខូចខាតខ្លាំងនៅពេលមានជំងឺរ៉ាំរ៉ៃ ដូចជាជំងឺរលាកឆ្អឺង ជំងឺទឹកនោមផ្អែម ឬជំងឺមហារីក។
- ជាចុងក្រោយ តែបៃតង មានរសជាតិឆ្ងាញ់ ! ជាភេសជ្ជៈសម្រាប់ផ្សើមសរីរាង្គកាយផង និងដើម្បីឆ្ងាញ់មាត់ផង ! មួយពែងពីរពែង ក្រោយរាល់ពេលបាយ ពិតជាមិនលំបាកធ្វើ ហើយអាចសម្រួលដល់សុខភាពផង។
នៅក្នុងជីវភាពរស់នៅបច្ចុប្បន្ន គេសង្កេតឃើញតែមានពីរប្រភេទធំៗ ៖ តែបៃតង និងតែខ្មៅ។ តើតែទាំងពីរប្រភេទនេះ មានគុណប្រយោជន៍ដូចគ្នា ដែរឬទេ ?
- “តែបៃតង និងតែខ្មៅ មិនដូចគ្នាទេ ! តែខ្មៅ ជាតែដែលគេយកផ្អាប់ ឱ្យឡើងម៉ូលេគូល ប៉ុន្តែជាតិកាតេឈីនត្រូវថយចុះ ដូច្នេះសកម្មភាព ឬសមត្ថភាពអង់ទីអុកស៊ីដង់ ក៏ថយចុះទៅតាមនោះដែរ។ និយាយឱ្យចំ គឺតែបៃតងមានសារធាតុអង់ទីអុកស៊ីដង់ច្រើន និងខ្លាំងជាងតែខ្មៅ។ ហើយបើប្រៀបធៀបជាមួយកាហ្វេវិញ គឺតែ មានសារធាតុច្រើនជាង កាហ្វេខ្លាំងណាស់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ