ក្រិក -

អត្ថបទចុះផ្សាយនៅថ្ងៃ ចន្ទ 07 វិច្ឆិកា 2011 - ព័ត៌មានទើបកែប្រើលើកចុងក្រោយ ថ្ងៃ ចន្ទ 07 វិច្ឆិកា 2011

ប្រទេសក្រិករង់ចាំនាយករដ្ឋមន្ត្រីថ្មី

©Reuters

ដោយ វីនស្តុន រតនា

ពិតជានឹងមានរដ្ឋាភិបាលចម្រុះ នៅប្រទេសក្រិក។ គណបក្សនយោបាយធំៗទាំងពីរនៃប្រទេសបានយល់ព្រមព្រៀងគ្នាជាប្រវត្តិសាស្ត្រ នៅល្ងាចថ្ងៃអាទិត្យ៦វិច្ឆិកាម្សិលមិញ។ កិច្ចព្រមព្រៀងគ្នានេះ ប្រមើលទុកការតែងតាំងនាយករដ្ឋមន្ត្រីថ្មី ចាប់ពីថ្ងៃចន្ទ៧វិច្ឆិកានេះ។បច្ចុប្បន្ននាយករដ្ឋមន្ត្រី Georges Papandréouនឹងលាឈប់ពីមុខតំណែង។

សេចក្តីរាយការណ៍របស់វីនស្តុន រតនា

ស្តាប់ (01:41)

07/11/2011 by វីនស្តុន រតនា

លោកGeorges Papandréouពុំទាន់បានលាឈប់ទេ ប៉ុន្តែសេចក្តីជូនដំណឹងមួយ ល្ងាចមិញ បានប្រកាសជាផ្លូវការថា គាត់នឹងពុំដឹកនាំរដ្ឋាភិបាលថ្មីឡើយ។ដូច្នេះ គាត់នឹងចាកចេញពីមុខងារខ្លួន២ឆ្នាំមុនចប់អាណត្តិរបស់ខ្លួន។

នៅថ្ងៃចន្ទ៧វិច្ឆិកានេះ ពួកអ្នកសង្គមនិយមនិងពួកអ្នកអភិរក្សនិយមត្រូវជ្រើសរើសនាយករដ្ឋមន្ត្រីថ្មី។ សំរាប់មុខតំណែងនេះ មានបេក្ខជនសំណព្វពីររូបគឺបេក្ខជនទី១ ជាបច្ចុប្បន្នរដ្ឋមន្ត្រីក្រសួងហិរញ្ញវត្ថុ លោកEvangelos Venizelos រីឯបេក្ខជនទី២ជាអតីតអនុប្រធានធនាគារកណ្តាលអឺរ៉ូបពីឆ្នាំ២០០២មកទល់ឆ្នាំ២០១០ លោកLucas Papademos។

រដ្ឋាភិបាលថ្មីតាមធម្មតា នឹងត្រូវចូលបំពេញមុខងារខ្លួននិងទទួលទំនុកទុកចិត្តពីរដ្ឋសភា ចាប់ពីពេលនេះទៅមួយសប្តាហ៍ទៀត។ អាទិភាពបន្ទាន់ទី១ គឺត្រូវធ្វើឱ្យរដ្ឋសភាក្រិកឱ្យសច្ចាប័នទៅលើផែនការថ្មីជួយសង្គ្រោះអឺរ៉ូប។ ប៉ុន្តែ គ្មានអ្វីបង្ហាញភ័ស្តុតាងថា ជារឿងងាយស្រួលនោះទេ ដោយហេតុថា គណបក្សស្តាំនិយមប្រឆាំងជានិច្ចទល់នឹងវិធានការរឹតត្បិតថ្មីៗប្រមើលទុកដោយផែនការប្រឆាំងនឹងវិបត្តិនេះ។

ពួកអ្នកសង្គមនិយមបានព្រមានប្រាប់រួចស្រេចទៅហើយថា គឺទាល់តែ បន្ទាប់ពីផែនការនេះនឹងចូលជាធរមាន ទើបការបោះឆ្នោតសភាមុនពេលកំណត់នឹងអាចប្រព្រឹត្តទៅបាន។កាលបរិច្ឆេទសំរាប់ការបោះឆ្នោតនេះ គឺថ្ងៃ១៩កុម្ភៈឆ្នាំ២០១២៕