រុស្ស៊ី-ហ្សកហ្ស៊ី -

អត្ថបទចុះផ្សាយនៅថ្ងៃ ព្រហស្បតិ៍ 22 មីនា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 22 មីនា 2012

ហ្សកហ្ស៊ីចង់មានទំនាក់ទំនងល្អជាមួយរុស្ស៊ីប៉ុន្តែក្នុងល័ក្ខខ័ណ្ឌជាក់លាក់

លោកប្រធានាធិបតីហ្សកហ្ស៊ី Mikheil Saakachvili (ឆ្វេង) និង លោកស្រី ហ៊ីឡារី គ្លីនតុន

Reuters / Irakli Gedenidze

ដោយ កែវ ឆាយា

ស្របនឹងលទ្ធផលនៃការស្ទង់មតិចេញថ្ងៃនេះ ដោយ“ វិជ្ជាស្ថានប្រជាធិបតេយ្យនៃស.រ.អា.” បណ្តាជនហ្សកហ្ស៊ីភាគច្រើនដាច់ខាត ដល់ទៅ ៨៨% មិនពេញចិត្តទេនឹងទំនាក់ទំនងបច្ចុប្បន្នជាមួយរុស្ស៊ី ប្រទេសដែលត្រូវថ្នាក់ដឹកនាំហ្សកហ្ស៊ីសព្វថ្ងៃនិយមហៅដោយប្រើពាក្យថា “ប្រទេសជិតខាងនៅខាងជើង”។

សេចក្តីរាយការណ៍របស់ កែវ ឆាយា

ស្តាប់ (02:26)

22/03/2012 by កែវ ឆាយា

គួររំលឹកថា រុស្ស៊ីនិងហ្សកហ្ស៊ីក្លាយជាសត្រូវនឹងគ្នាតាំងពីខែសីហាឆ្នាំ២០០៨មករហូតដល់ដាច់ទំនាក់ទំនងការទូតតែម្តងក្រោយពីមានអន្តរាគមន៍ទ័ពរុស្ស៊ីចូលក្នុងរដ្ឋហ្សកហ្ស៊ីហើយជាពិសេសក្រោយពីរុស្ស៊ីទទួលស្គាល់ឯករាជ្យដែនដីអបគមរបស់ហ្សកហ្ស៊ីពោលគឺ
Abkhazie និងOssetie ខាងត្បូង។

ចំណែកការស្ទង់មតិធ្វើដោយ “ វិជ្ជាស្ថានប្រជាធិបតេយ្យនៃស.រ.អា.” ក្នុងចន្លោះពីថ្ងៃ២២មេសាដល់ថ្ងៃ៥មីនាកន្លងទៅ ហើយដែលលទ្ធផលវាទើបចេញផ្សាយថ្ងៃនេះ គឺជុំវិញសំនួរ ៖ តើបណ្តាជន ហ្សកហ្ស៊ីយល់ឃើញយ៉ាងណាដែរ ចំពោះការធ្វើកំណែទម្រង់ក្នុងប្រទេសចំពោះនយោបាយផ្ទៃក្នុងចំពោះបញ្ហាសង្គម ហើយជាពិសេសចំពោះនយោបាយក្រៅប្រទេសរបស់ហ្សកហ្ស៊ី។

ស្របនឹងលទ្ធផលទទួលបានប្រជាពលរដ្ឋហ្សកហ្ស៊ីដល់ទៅ៤៩% យល់ថារុស្ស៊ីជាគ្រោះថ្នាក់មែនពិតដល់រដ្ឋហ្សកហ្ស៊ី ហើយ៣០%ទៀតឯកភាពជាមួយមតិបែបនេះ ប៉ុន្តែគ្រោះថ្នាក់នោះ មិនជាធំណាស់ណាទេ។ មានតែ៨%ប៉ុណ្ណោះ ដែលមិនចាត់ទុករុស្ស៊ីជាគ្រោះថ្នាក់អ្វីណាទេ។

ជាការកត់សម្គាល់ ក្នុងឆ្នាំទៅមិញ នៅរុស្ស៊ីក៏មានធ្វើការស្ទង់មតិដែរ អំពីឥរិយាបថពលរដ្ឋរុស្ស៊ី ចំពោះហ្សកហ្ស៊ី។ តាមការស្ទង់មតិនោះ ហ្សកហ្ស៊ីស្ថិតនៅក្នុងចំណោម៣ប្រទេសនាំមុខគេ ជាសត្រូវ របស់រុស្ស៊ីនៅទន្ទឹមនឹងជប៉ុន និង បេឡារុស។ បីប្រទេសនេះ កាលពីមុនៗ មិនដែលមានឈ្មោះជាសត្រូវនឹងរុស្ស៊ីឡើយ។ ដ្បិតក្នុងសម្បជញ្ញៈអ្នកស្រុករុស្ស៊ីនៅសម័យមុនឆ្នាំ២០០០ តែងបានជាប់ឈ្មោះ ជាសត្រូវរបស់រុស្ស៊ី គឺអាហ្វហ្កានីស្ថាន អ៊ីរ៉ង់ អ៊ីរ់ាក់។

រីឯការស្ទង់មតិធ្វើដោយ “ វិជ្ជាស្ថានប្រជាធិបតេយ្យនៃស.រ.អា.” ក៏បង្ហាញឲ្យឃើញថា ៖
- បណ្តាជនហ្សកហ្ស៊ី ៦៦% គាំទ្រគោលជំហរប្រធានាធិបតីខ្លួន លោក Saakashvili ដែលអំពាវនាវរុស្ស៊ី ឲ្យធ្វើកិច្ចចរចា ប៉ុន្តែលុះណាតែក្នុងល័ក្ខខ័ណ្ឌដែលទីក្រុងម៉ូស្គូដកស្ថានទូតខ្លួនចេញពី Abkhazie និង Ossetie ខាងត្បូងទៅ។
- ហើយមានដល់ទៅ៧៤% ឯណោះ ដែលអនុម័តគោលដៅរបស់រដ្ឋាភិបាលហ្សកហ្ស៊ីដើម្បីឲ្យប្រទេសនេះបានចូលជាសមាជិក បក្សសម្ព័ន្ធអូតង់និងសហភាពអឺរ៉ុប។
- ចំណែកមតិ២៦% គាំទ្រដល់សំណើពួកអ្នកដឹកនាំបក្សប្រឆាំងខ្លះថាឲ្យហ្សកហ្ស៊ី សុខចិត្តប្រកែកកុំចូលបក្សសម្ព័ន្ធអូតង់អី ឲ្យតែបង្វែរដែនដីអបគមAbkhazie និង Ossetieខាងត្បូងដែលសព្វថ្ងៃកាន់កាប់ដោយកងទ័ពរុស្ស៊ីបានត្រឡប់ទៅនៅក្នុងរដ្ឋហ្សកហ្ស៊ីវិញ៕