ប្រធានាធិបតីបារាំងទៅម៉ិចស៊ិកដើម្បីបិទទំព័រខ្មៅ បារំាង-ម៉ិចស៊ិក
ចុះផ្សាយនៅថ្ងៃ៖
ស្តាប់ - ០៧:២៣
ប្រធានាធិបតីបារាំង លោកហ្វ្រង់ស័រ ហូឡង់ផ្តើមទស្សនកិច្ចពីរថ្ងៃ នៅថ្ងៃព្រហស្បតិ៍ទៅ ១០ មេសា នៅក្នុងប្រទេសម៉ិចស៊ិក។ ទស្សនកិច្ចរបស់ប្រមុខរដ្ឋបារាំងនៅម៉ិចស៊ិកត្រូវគេរំពឹងថា ធ្វើឡើងដើម្បីធ្វើឲ្យប្រសើរឡើង នូវទំនាក់ទំនងល្អរវាងប្រទេសទាំងពីរ បន្ទាប់ពីបានរងល្អក់កករអស់ប៉ុន្មានឆ្នាំមកហើយ ដោយសារសំណុំរឿងស្រ្តីបារាំងFlorence Cassez។ Florence Cassez ស្រ្តីជនជាតិបារាំងដែលត្រូវតុលាការម៉ិចស៊ិកចាប់ដាក់ឃុំអស់៧ឆ្នាំ ក្នុងបទចោទប្រកាន់ចាប់ជំរិត។
បារាំង និងម៉ិចស៊ិកបានមើលមុខគ្នាមិនចំ និងដំឡើងសរសៃកដាក់គ្នា ដោយសារតែសំណុំរឿងស្រ្តីបារាំងFlorence Cassez ដែលត្រូវបានតុលាការម៉ិចស៊ិកចោទប្រកាន់ពីបទចាប់ជំរិត នៅក្នុងទឹកដីម៉ិចស៊ិក។ ការចោទប្រកាន់ដែលស្រ្តីបារាំងតែងតែបដិសេធ។ កាលណោះ ដោយសារតែសំណុំរឿង នេះ អតីតប្រធានាធិបតីបារាំង លោកនីកូឡា សាកូហ្សី ដែលទាមទារឲ្យគេដោះលែងស្រ្តីជនជាតិបារាំង Florence Cassez បានសម្រេចលុបចោលទិវាបារាំងនៅប្រទេសម៉ិចស៊ិក។
ទើបតែនៅដើមឆ្នាំ ២០១៣ បន្ទាប់ពីទាំងបារាំង និងម៉ិចស៊ិកមានប្រធានាធិបតីថ្មី ទើបវិបត្តិការទូតរវាងបារាំង និងម៉ិចសិកបានចុះធូរស្រាលមកវិញ។ ការចរចាការទូត រវាងប្រទេសទាំងពីរបានឈានទៅដល់ការដោះលែងស្រ្តីជនជាតិបារាំងFlorence Cassez នៅខែមករាឆ្នាំ ២០១៣។ នៅពេលនោះ ដើម្បីបន្ធូរបន្ថយភាពតានតឹងរវាងប្រទេសទាំងពីរ លោកប្រធានាធិបតីបារាំងបានស្នើ ទៅលោកប្រធានាធិបតីម៉ិចស៊ិក អិនរិកពេនា នីតូ ឲ្យគេបង្កើតក្រុមប្រឹក្សាយុទ្ធសាស្រ្តបារាំង ម៉ិចស៊ិក ដែលមានតួនាទីស្វែងរកវិធានការជំរុញការវិនិយោគ និងការដោះដូរពាណិជ្ជកម្មរវាងប្រទេសទាំងពីរ។
ទស្សនកិច្ចរបស់ប្រធានាធិបតីនៅម៉ិចស៊ិកនៅថ្ងៃនេះ ក៏ជាលទ្ធផលនៃការខិតខំប្រឹងប្រែងនយោបាយការទូតរបស់បារាំង នៅប៉ុន្មានឆ្នាំចុងក្រោយនេះ។ បារាំងចង់ផ្សះផ្សារទំនាក់ទំនងល្អឡើងវិញជាមួយនឹងម៉ិចស៊ិក ដោយបិទចោលទំព័រខ្មៅងងឹត ដែលប្រទេសទាំងពីរធ្លាប់មានកន្លងមក។ លោកប្រធានាធិបតីម៉ិចស៊ិកបានសន្យាថា នឹងធ្វើទស្សនកិច្ចនៅទីក្រុងប៉ារីស នៅចុងឆ្នាំនេះវិញដែរ។
ដោយពិតទៅ គេខានបានឃើញ ទំនាក់ទំនងការទូតដ៏រឹងមាំ និងល្អប្រសើររវាងបារាំង និងម៉ិចស៊ិក អស់ជាច្រើនឆ្នាំមកហើយ។ នៅអតីតកាល ទំនាក់ទំនងល្អរវាងបារំាងនិងប្រទេសនៅអាមេរិកឡាទីនមួយនេះ ត្រូវបានកត់សំគាល់ដោយទស្សនកិច្ចរបស់លោកឧត្តមសេនីយ៍Charles de Gaulle នៅឆ្នាំ ១៩៦៤ នៅម៉ិចស៊ិក ដែលនៅទីនោះ មេដឹកនាំបារាំងដែលទទួលការស្វាគមន៍យ៉ាងអធិកអធមពីប្រជាជនម៉ិចស៊ិកបានលើកឡើងពីការតស៊ូ និងការប្រឆាំងនឹងឥទ្ធិពលរបស់សហភាពសូវៀត និងអាមេរិកាំង។
ជំនួញបារាំង ម៉ិចស៊ិក នៅស្តួចស្តើង
នៅម៉ិចស៊ិក លោកប្រធានាធិបតីបារាំងត្រូវអមដំណើរប្រធានក្រុមហ៊ុនបារាំងធំៗ និងរដ្ឋមន្រ្តីប្រមុខការទូតបារាំង លោកឡូរ៉ង់ ហ្វាប្យូស ដែលទើបតែកាន់តួនាទីបន្ថែម គឺទទួលបន្ទុកពាណិជ្ជកម្មក្រៅប្រទេស។ នៅរសៀលថ្ងៃព្រហស្បតិ៍ ប្រធានាធិបតីប្រទេសទាំងពីរត្រូវចុះហត្ថលេខាលើកិច្ចព្រមព្រៀង និងឯកសារជាង៣០ នៅក្នុងវិស័យអប់រំ សុខភាព អាកាសចរណ៍ សន្តិសុខ និងថាមពល។ នេះបើតាមរដ្ឋមន្រ្តីការបរទេសម៉ិចស៊ិក។
តាមប្រធានសភាពាណិជ្ជកម្មម៉ិចស៊ិកវិញ ទស្សនកិច្ចរបស់ប្រធានាធិបតីបារាំងផ្តោតច្រើនលើកិច្ចព្រមព្រៀង ប៉ុន្តែ នឹងមានកិច្ចសន្យាតិចបំផុតដែលនឹងត្រូវចុះហត្ថលេខាក្នុងទស្សនកិច្ចពីរថ្ងៃនេះ។ កិច្ចការជំនួញរវាងបារាំង និងម៉ិចស៊ិកជារឿងថ្មី នៅពេលដែលបារាំងនិងម៉ិចស៊ិកធ្លាប់តែទាក់ទងគ្នាផ្នែកវប្បធម៌ និងអប់រំ។ នេះបើតាមប្រធានសភាពាណិជ្ជកម្មម៉ិចស៊ិក។ រហូតមក បារាំងជាដៃគូពាណិជ្ជកម្ម នៅចំណាត់ថ្នាក់ទី ១៦ របស់ម៉ិចស៊ិក។ ទំហំដោះដូរពាណិជ្ជកម្មរវាងប្រទេសទាំងពីរមានតម្លៃជិត ៤ពាន់លានអឺរ៉ូ ដែលភាគច្រើនគឺទំនិញបារាំងដែលនាំចូលទៅលក់នៅម៉ិចស៊ិក។ យ៉ាងណាក៏ដោយ ទីផ្សារសម្រាប់អ្នកវិនិយោគបារាំង នៅម៉ិចស៊ិក មានតែ១ភាគរយប៉ុណ្ណោះ គឺនៅឆ្ងាយហៅមិនលឺ បើប្រៀបធៀបអេស្ប៉ាញ និងអង់គ្លេស។
លើកនេះ ទស្សនកិច្ចរបស់លោកប្រធានាធិបតីបារាំងទៅម៉ិចស៊ិកផ្តោតជាពិសេសទៅលើបច្ចេកវិទ្យាអាកាសចរណ៍។ ឧទាហរណ៍ ក្រុមហ៊ុនផលិតឧទ្ធម្ភាគចក្រ បារំាងអាល្លឺម៉ង់ Airbus helicopters ត្រូវចុះហត្ថលេខាលើការបញ្ជាទិញឧទ្ធម្ភាគចក្រពីខាងទាហានម៉ិចស៊ិក។ ក្រុមអ្នកជំនួញម៉ិចស៊ិកបានត្រៀមផងដែរទុនវិនិយោគ ប្រមាណ ២៥០លានដុល្លារ សម្រាប់ក្រុមហ៊ុនបារាំងដែលនឹងធ្វើការឲ្យផ្នែកអាកាសចរណ៍ម៉ិចស៊ិក។ គម្រោងសំខាន់មួយទៀត គឺក្រុមហ៊ុនបារាំងSafran ត្រូវចុះហត្ថលេខា លើកិច្ចសន្យាដើម្បីសាងសង់រោងចក្រផលិតយន្តហោះ គ្មានមនុស្សបើក នៅម៉ិចស៊ិក។
ក្រៅតែពីអាកាសចរណ៍ បារាំងក៏កំពុងសម្លឹងមើលឃើញផងដែរផ្នែកថាមពលរបស់ប្រទេសម៉ិចស៊ិក។ រដ្ឋាភិបាលម៉ិចស៊ិកថ្មី ដែលចង់បង្កើនសេដ្ឋកិច្ចប្រទេសបានធ្វើកំណែទម្រង់សេដ្ឋកិច្ចស៊ីជម្រៅ ដោយបានស្នើឲ្យមានការធ្វើឯកជនភាវូបនីយកម្មលើការធ្វើអាជីវកម្មប្រេង។ កាលពីចុងឆ្នាំ មុន សភាម៉ិចស៊ិកក៏បោះឆ្នោត ជាលើកទីមួយ ទៅតាមការចង់បានរបស់រដ្ឋាភិបាល ដោយបានសម្រេចឲ្យឯកជនលូកដៃ ក្នុងក្រុមហ៊ុនផលិតប្រេង ដែលពីមុនធ្លាប់តែស្ថិតនៅក្រោមការគ្រប់គ្រងរបស់ក្រុមហ៊ុនរដ្ឋ។ ក្រុមហ៊ុនប្រេងបារាំង Totaleកំពុងចរចាជាមួយក្រសួងថាមពលម៉ិចស៊ិកទៅលើការបូមយកឧស្ម័នហ្គាស ដែលស្ថិតនៅភាគខាងជើងម៉ិចស៊ិក។
ទំនាក់ទំនងល្អម៉ិចស៊ិក និងបារាំងនឹងត្រូវបំពុលម្តងទៀត ដោយសារសំណុំរឿង Versini
លោកស្រីMaude Versini ជាអតីតភរិយារបស់លោកArturo Montiel អភិបាលក្រុងម្នាក់នៅម៉ិចស៊ិក។ តាមកាសែតខ្លះគេថា អតីតស្វាមីរបស់Maude Versini ជាមា និងខ្លះទៀតថា ជាគ្រូដឹកនាំរបស់ប្រធានាធិបតីម៉ិចស៊ិកបច្ចុប្បន្ន។ កាលពីថ្ងៃពុធ លោកស្រីMaude Versini បានអំពាវនាវដល់ប្រធានាធិបតីបារាំង និងម៉ិចស៊ិកជួយរកយុត្តិធម៌ និងអន្តរាគមន៍ ដើម្បីឲ្យស្វាមីលោកស្រីព្រមប្រគល់កូនរបស់បីមកឲ្យលោកស្រីវិញ។ ស្រ្តីជនជាតិបារាំងនេះបានសរសេរតាមTweeterទៅប្រធានាធិបតីបារាំង និងម៉ិចស៊ិកថា លោកស្រីបានឈ្នះក្តីដើម្បីចិញ្ចឹមកូនទាំងបី ប៉ុន្តែ អតីតស្វាមីលោកស្រីបានឃាឃាំងកូនទុកនៅម៉ិចស៊ិក បន្ទាប់ពីពួកគេបានទៅធ្វើដំណើរកំសាន្ត នៅទីនោះ។
ចង់ ឬមិនចង់ ដំណើរទស្សនកិច្ចរបស់លោកប្រធានាធិបតីបារាំងនៅម៉ិចស៊ិកនឹងអាចត្រូវប៉ះពាល់ដោយសារសំណុំរឿងថ្មីនេះមិនខាន។ ជាពិសេសទៅទៀតនោះ គឺរឿងនេះត្រូវបានបំប៉ោងល្បីខ្ចរខ្ចាយ ចុះតាមកាសែត ដោយសារតែការលូកដៃ របស់អតីតភរិយារបស់លោកប្រធានាធិបតីហ្វ្រង់ស័រ ហូឡង់ ដែលលោកហូឡង់ទើបតែលែងលះ។ លោកស្រីValerie Trierweiler អតីតភរិយាទីពីររបស់លោកប្រធានាធិបតីបារាំង បានសរសេរបើកចំហរ គាំទ្រការទាមទាររបស់ស្រ្តីបារាំងខាងលើ។ ប្រមុខដឹកនាំបារាំងអាចទើសទាល់ក្នុងរឿងនេះ។ ក្នុងគំនិតមួយ លោកចង់បំពេញចិត្តប្រជាជនបារាំង ប៉ុន្តែ មួយវិញទៀត លោកក៏មិនចង់លើករឿងនេះ ទៅនិយាយជាមួយប្រធានាធិបតីម៉ិចស៊ិក ដែលនឹងធ្វើឲ្យទំនាក់ទំនង និងរូបភាពការទូតដែលកំពុងតែល្អនោះ ចុះល្អក់កករនោះទេ។ គេត្រូវរង់ចាំមើលដំណើរទស្សនកិច្ចបន្តទៀត ដើម្បីចង់ដឹងថា តើលោកប្រធានាធិបតីបារាំង ហ៊ានអារកាត់យ៉ាងណា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ