កម្ពុជា-បារាំង -

អត្ថបទចុះផ្សាយនៅថ្ងៃ ពុធ 20 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 20 មិថុនា 2012

រដ្ឋាភិបាលបារាំងតាមដានការចាប់ខ្លួនពលរដ្ឋខ្លួននៅកម្ពុជា

ដោយ លាង ដឺលុច

នៅតែមិនមានការពន្យល់ជាផ្លូវការណាមួយនៅឡើយទេ ក្នុងសំណុំរឿងនៃការឃាត់ខ្លួនជនជាតិបារាំងម្នាក់ដែលត្រូវបានសង្ស័យថាមានជាប់ពាក់ព័ន្ធនឹងលោកប៉ូ ស៊ីឡៃអតីតអ្នកនយោបាយដែលបាត់បង់ប្រជាប្រិយភាពរបស់ចិន។ រដ្ឋាភិបាលបារាំង បានថ្លែងថាបារាំងកំពុងធ្វើការងារស្និទ្ធជាមួយអាជ្ញាធរកម្ពុជាក្នុងបញ្ហានេះ។

សេចក្តីរាយការណ៍របស់ លាង ដឺលុច

ស្តាប់ (01:38)

20/06/2012

«បុរសជនជាតិបារាំងឈ្មោះ Patrick Devillers កំពុងត្រូវឃុំខ្លួននៅក្នុងនាយកដ្ឋានអន្តោប្រវេសន៍នៃក្រសួងមហាផ្ទៃ» នេះគឺជាពាក្យអះអាងយ៉ាងខ្លីដែលអ្នកនាំពាក្យក្រសួងមហាផ្ទៃលោកឧត្តមសេនីយឯក ខៀវ សុភ័គ អាចនិយាយបាន។ អ្នកនាំពាក្យក្រសួងមហាផ្ទៃបានប្រាប់វិទ្យុបារាំងអន្តរជាតិនៅថ្ងៃពុធនេះ។

អ្នកនាំពាក្យស្ថានទូតបារាំងប្រចាំកម្ពុជា លោកស្រី Laurence BERNADI ក៏មិនអាចធ្វើ អត្ថាធិប្បាយអ្វីដែរ ហើយបានណែនាំអោយអ្នកកាសែតដកស្រង់សេចក្តីប្រកាសរបស់អ្នកនាំពាក្យក្រសួងការបរទេសបារាំងវិញ។

នៅក្នុងសារអេឡិចត្រូនិកដែលអ្នកនាំពាក្យស្ថានទូតបារាំងនៅកម្ពុជាបានបង្ហាញនោះ គឺអ្នកនាំពាក្យក្រសួងការបទេសបារាំង បាននិយាយថា យើងបានធ្វើការងារដើម្បីការពារពលរដ្ឋបារាំងរបស់យើង។ យើងក៏បានធ្វើការងារយ៉ាងជិតស្និទជាមួយអាជ្ញាធរកម្ពុជាទាក់ទងនឹងការចាប់ខ្លួនពលរដ្ឋបារាំងនេះ។ យើងកំពុងតាមដានយ៉ាងប្រុងប្រយ័ត្នការអង្កេតលើករណីនេះដែរ។

សូមបញ្ជាក់ថា អ្នកនាំពាក្យនៃស្ថានទូតបារាំងនៅទីក្រុងភ្នំពេញ បានថ្លែងបញ្ជាក់ប្រាប់ទីភ្នាក់ងារព័ត៌មានបារាំង AFPនៅល្ងាចថ្ងៃអង្គារទី១៩មិថុនាថា លោក Patrick Devillers ស្ថាបត្យករបារាំង ត្រូវបានអាជ្ញាធរកម្ពុជា ចាប់ឃុំខ្លួន ហើយមន្រ្តីទទួលបន្ទុកជនជាតិបារាំងនៅបរទេសបានទាមទារឲ្យអាជ្ញាធរខ្មែរឆ្លើយបំភ្លឺពីមូលហេតុនៃការចាប់ឃុំខ្លួន លោក Patrick Devillers។

ចំណែកឯលោកទូច ណារុថ ស្នងការរនគរបាលរាជធានីបានថ្លែងថា ជនជាតិបារាំងនេះបានត្រូវចាប់ឃុំខ្លួន ពីរសប្តាហ៍មកហើយដោយមានសហការពីប្រទេសចិន។ ការចាប់ខ្លួនជនជាតិបារាំង ត្រូវបានគេសង្ស័យទៅលើទំនាក់ទំនងរវាងជនជាតិបារាំងនេះជាមួយអតីតមេដឹកនាំចិនអស់ប្រជាប្រិយភាព និងដែលកំពុងមានរឿងអាស្រូវពុករលួយផងនោះ គឺលោកប៉ូ ស៊ីឡៃ៕