អ៊ុយក្រែន -

អត្ថបទចុះផ្សាយនៅថ្ងៃ អង្គារ 11 តុលា 2011 - ព័ត៌មានទើបកែប្រើលើកចុងក្រោយ ថ្ងៃ អង្គារ 11 តុលា 2011

តុលាការប្រកាសសាលក្រមសំណុំរឿងលោកស្រី Yulia Timoshenko

អតីតនាយករដ្ឋមន្ត្រីអ៊ុយក្រែន Yulia Timoshenkoត្រូវតុលាការប្រកាសសាលក្រមថា បានចុះហត្ថលេខាលើកិច្ចព្រមព្រៀងឧស្ម័ន ដែលធ្វើឲ្យអ៊ុយក្រែនខាតប្រយោជន៍

©Reuters

ដោយ កែវ ឆាយា

ដើម្បីដោះស្រាយវិបត្តិឧស្ម័ន ដែលចំហាយវា បានជះទាំងទៅលើសហភាពអឺរ៉ុប-សហភាពដែលទទួលឧស្ម័នរុស្ស៊ី បង្ហូរកាត់តាមដែនដីអ៊ុយក្រែន នាថ្ងៃ១៩មករាឆ្នាំ២០០៩ លោកស្រី Yulia Timoshenko ពេលកាន់តំណែង ជានាយករដ្ឋមន្ត្រី អ៊ុយក្រែន ពីខែធ្នូឆ្នាំ២០០៧ ដល់ ខែមីនាឆ្នាំ២០១០ បានចុះកិច្ចព្រមព្រៀងជាមួយរុស្ស៊ី។ ដោយសារការចុះឯកសារនេះ គាត់ជាប់ចោទថា បណ្តាលឲ្យភាគីអ៊ុយក្រែនបង់ខាតអស់ ២០០លានដុល្លារ ហើយត្រូវបានចាប់ ឃុំឃាំងតាំងពី ថ្ងៃ ៥សីហាមក គឺជាង២ខែមកហើយ។ នៅថ្ងៃអង្គារនេះ តុលាការកាត់ទោសឲ្យគាត់ជាប់ពន្ធនាគាររយៈពេល ៧ឆ្នាំ។

សេចក្តីរាយការណ៍របស់កែវ ឆាយ៉ាពីទីក្រុងម៉ូស្គូ

ស្តាប់ (01:58)

11/10/2011 by កែវ ឆាយា

តុលាការក្រុង Kiev ទទួលស្គាល់រូបលោកស្រី អតីតនាយករដ្ឋមន្ត្រីអ៊ុយក្រែន Yulia Timoshenko ថា មានទោស ជុំវិញរបស់ដែលហៅថា “សំណុំរឿងឧស្ម័ន”។ តាំងពី ម៉ោង៩ព្រឹកថ្ងៃអង្គារនេះមក ចៅក្រម ជាប្រធានអង្គជំនុំជម្រះ គឺលោក Rodion Kiriyev ដោយអាន សាលក្រម បានប្រកាសថា លោកស្រី បានរំលោភលើអំណាចខ្លួនមែនពិត ពេលចុះ កិច្ចព្រមព្រៀងឧស្ម័ន ជាមួយរុស្ស៊ី កាលពីដើម ឆ្នាំ២០០៩។ តុលាការចាត់ទុកជាភស្តុតាងនៃទោសពិរុទ្ធរបស់គាត់ គឺការដែលលោកស្រី អតីតនាយករដ្ឋមន្ត្រីរូបនេះ បាននាំជាការបង់ខាតដល់ក្រុមហ៊ុនឧស្ម័ន និងប្រេងកាត របស់រដ្ឋអ៊ុយក្រែន ឈ្មោះ Naftogaz អស់១.៥០០លាន Hrivna ឬស្មើនឹង ២០០លានដុល្លារអាមេរិក។

ចំពោះទោសនេះ ភាគីរដ្ឋអាជ្ញាទាមទារឲ្យកាត់ទោសរូបលោកស្រី ជាប់ពន្ធនាគារដល់៧ឆ្នាំ។

គួររំលឹកថា ក្រសួងការបរទេសរុស្ស៊ី ទាក់ទងនឹងសាច់រឿងនេះ បានថ្លែងទៅហើយ ថា កិច្ចព្រមព្រៀង ដែលចុះនោះ គឺចុះដោយស្របនឹងច្បាប់រុស្ស៊ីផង និងច្បាប់អ៊ុយក្រែនផង។

រូបលោកស្រី Timoshenko ផ្ទាល់ មុនពេលបើកអង្គសវនាការនោះ បានថ្លែងទៅពួកអ្នកកាសែត ថា “ សាលក្រមដែលប្រកាសថ្ងៃនេះ នឹងពុំនាំឲ្យប្រែប្រួលដល់ជីវិតខ្ញុំ ដល់ការតស៊ូរបស់ ខ្ញុំឡើយ។ ជាការល្អ ដែលធាតុពិតនៃសាលក្រមនេះ គឺមិនមែនប្រកាស ដោយលោកចៅក្រម Kiriyev ទេ តែគឺ ដោយប្រធានាធិបតី ឈ្មោះ Yanoukovich។

ជាការកត់សម្គាល់ ដោយហេតុថា លោកប្រធានាធិបតី Yanoukovich ជាសត្រូវស្លាប់រស់ ទល់នឹង លោកស្រី Timoshenko ដែលជាអ្នកបស្ចិមលោកនិយមឥតរាថយ បានជា ការកាត់ទោសរូបលោកស្រីនោះ ត្រូវមតិទូទៅ បកស្រាយថា មានលក្ខណៈនយោបាយដើម្បី កាច់បំបាក់ឆន្ទៈ គូប្រជែងខ្លួននេះ។ បើលោកស្រី Timoshenko ត្រូវជាប់គុក ៧ឆ្នាំមែន នោះគាត់លែងអាចចូលប្រឡូក ក្នុងការបោះឆ្នោតសភា នៅឆ្នាំ២០១២ និងការបោះឆ្នោត ប្រធានាធិបតី នៅឆ្នាំ២០១៥។

គណៈកម្មការអឺរ៉ុប បានថ្លែងទៅហើយថា ទំនាក់ទំនងរបស់អ៊ុយក្រែនជាមួយសហភាពអឺរ៉ុប គឺអាស្រ័យ នឹងវាសនារូបអតីតនាយករដ្ឋមន្ត្រីអ៊ុយក្រែន លោកស្រី Yulia Timoshenkoនេះ៕